¹ Ak kingot kong'alaljin ichek bik, kopkonji icheget tisiik ak kiptaiyatab hekalut ak Sadukaik. ² Kotinyei neregek amu kiinet bik ak koamda eng' Jeiso ng'eetyetab che kibek. ³ Ak kinam icheget, ak kotoorji korgoret agoi mutai: amu kiga koimen. ⁴ Ago kiiyan che chang' eng' ichek che kigas ng'olyot; ak kiek koitetab murenik olo bo elfusiek mut. ⁵ Ak eng betut ne kiirube noto koyumgei bounik ak boisiek ak sirik eng' Jerusalem. ⁶ Ak Anas tisiindet ne o, ak Kaiapa, ak Johana, ak Aleksandaro, ak tugul che bo oretab tisiindet ne o. ⁷ Ak kingo kagonde ichek kwenung'wai, koteebe kole, Nee kamuget ne koyae ni, anan eng' kainetab ng'o? ⁸ Kingonyi anyun Petero Tamirmiriet ne Tilil, koleji ichek, Akwe bounikab bik ak boisiek, ⁹ ngemache keginech rani agobo boisiet ne mie ne kogiyachi chito ne nyalulat, ole kogisoopto chichito; ¹⁰ ingonaak anyun eng' akwe tugul, ak eng bik tugul che bo Israel ole, eng' kainetab Jeiso Kristo ne bo Nasaret, ne kiogartat akwe, ne kiing'et Jehovah eng' che kibek, tononi chichi eng' yu, eng taing'wong', ko kagosob eng inendet. ¹¹ Inendet koita ne kiosas akwe teegik, ne kiga kiyai koek metitab luita. ¹² Ama mi yetunet eng' chito age: amu mami kainet age eng' kureretab kipsengwet, ne kigigochi bik, ne kanyol kesorunenech. ¹³ Ak kingogeer nyiganatetab Petero ak Johana, ak konai kole bik che ma kinet, ama toogunotin, kokwong'io; ak kinai kole, kicham komi koboto Jeiso. ¹⁴ Ak kingogeer chito ne kogisoob kotononi koboto ichek, ko mata komuch komwa kiy agobo noto. ¹⁵ Ago ye kingo kagong'at ichek komanda eng' kapkiruok, kong'alal ichegei. ¹⁶ Kole, Kiitoi nee bichu? amu naat eng' bik tugul che menyei Jerusalem kele koyaak iman eng ichek kwong'utiet ne o, ama kimuchi ketiiye. ¹⁷ Ago si mata koiyestaat eng' kwenutab bik, konyolu keger kong' ichek, si mata kong'alalji chi age tugul eng' kainanito kogeny. ¹⁸ Ak kiguur ichek, ak kong'at ichek, koleji, amatata kong'alal agot kitigin anan konetis eng' kainetab Jeiso. ¹⁹ Ago kiwolji Peter ak Johana ichek koleji, Ngo mie eng' taitab Jehovah kegasak kosiir Jehovah, oruoch akwe. ²⁰ Amu magimuchi kesisye kobate kemwa tuguk che kigegeer ak che kigegas. ²¹ Ak kingo kagoger kong' ichek kogeny, kounda koba, ko mata konyor ng'olyot ne iruokyine, amu bik; amu kiitoror bik tugul Jehovah agobo noto koyaak. ²² Amu kisiirei artam kenyisiekab chichoto kiyaak eng' inendet kwong'utionoto bo kasoobet. ²³ Ak kingo kageunda, koba ole mi bikwai, ak komwaita tugul che kamwachi tisiik che eechen ak boisiek. ²⁴ Ak kingogas ichek, komwachi Jehovah eng' kutit ne o eng' kabwatet agenge, koleji, Ee Kiptaiyat, inye ne kiiyai kipsengwet ak ng'weny ak tugul che mi oloto. ²⁵ Ne kiimwa eng' Tamirmiriet ne Tilil eng' kutitab kwandanyo Daudi kiboitiondeng'ung', ile, Kilya si kobolyo Bororiosiek, Ak kobwatoti bik tuguk che manamegei ak kiy? ²⁶ Kitetgei laitorinikab ng'weny, ak koyumgei bounik, Agobo Kiptaiyat, ak Kristo nenyi: ²⁷ Amu iman kituitos eng' nganasani Herod ak Pontio Pilato agine koboto Bororiosiek ak bikab Israel, kole kogirinda Kiboitiondeng'ung ne Tilil Jeiso, ne kiil, ²⁸ Si koyai kit age tugul ne kisib kong'at eung'ung' ak ng'omnateng'ung' kole kosulda. ²⁹ Ak nguno anyun Kiptaiyandani, keer kertaeng'wai bo kong'. Ak igochi otwogiguk komwa ng'olyondeng'ung eng' nyiganet tugul. ³⁰ Ye iitoi inye eung'ung' isoobi bik; si koyaak kaborunoik ak kwong'utik eng' kainetab Kiboitiondeng'ung' ne Tilil, noto ko Jeiso. ³¹ Ak kingo kagosa, kotumdumgei ole kiga koyumjigei; ak kinyi ichek tugul Tamirmiriet ne Tilil, ak kimwa ng'olyotab Jehovah eng' nyiganatet, ³² Ak kibo muguleldo agenge ak sobondo agenge tuiyet ne kiga koyan. Ak ma mwa chi agot agenge kole, nenyi kiy age tugul ne kitinyei; ago kiyamdoi tugukwai tugul. ³³ Ak kibaorian che kiyoktoi eng' kamuget ne o agobo ng'etyetab Kiptaiyat Jeiso, ak kitebe mieindo ne o ichek tugul. ³⁴ Amu kima komi agot agenge eng' kwenung'wai ne kibanani kiy: amu tugul che kitinyei korotinwek anan gorik, ko kialda, ak koib tuguk che kiga alde kobwa ³⁵ konde kelyekab che kiyoktoi: ak kigipchechi chi age tugul ne kinyalili. ³⁶ Ak kialda Josep mbaret ne kitinye, inendet ne kitochi che kiyoktoi kainet ne bo aeng' koguure Barnaba (ne ye kiweech, ko Weritab kagaigaet), Lawindet, chito ne kibunu Kupro, ³⁷ ak koib siling'isiek konde kelyekab che kiyoktoi.