¹ 1Ak kitogostoi Petero ak Johana hekalut eng' sait ne bo saet, sait sogol. ² Ak kigiganabi chito ne ki solomwo kong'ete komi moetab kamet, ne kicham kindoi betut age tugul kurgetab hekalut ne kigiguure kararan, si kosomei tuguk bik che kibendi hekalut orit. ³ Ko ye kingogeer inendet Petero ak Johana komachei koba hekalut orit, kosom kole kogochi kagochinet. ⁴ Ak kiichiilji kong' Petero inendet koboto Johana, ak koleji, Keerech. ⁵ Ak kiinyal inendet ichek, kolen nyorune kiy. ⁶ Ago kile Petero, Matinye feda ak tahabu; ago agonin ne atinye. Ng'eet eng' kainetab Jeiso Kristo ne bo Nasaret, ak iwendote. ⁷ 7Konam anyun inendet eut ne bo tai, ak kong'eet: ak kinyor kimnatet ngunoto kelyekyi ak kowekab ng'woniot. ⁸ Ak king'eet kochokyi, ak kotonon, ak kitoi kowendot; ak kiba hekalut orit koboto icheget, kowendoti, kosogoroti, ak kolosu Jehova. ⁹ Ak kigeer bik tugul inendet kowendoti ak kolosu Jehovah. ¹⁰ Ak kinai icheget kole, inendet ne kicham kotebche kosome konunoik eng' kurget ne kiguure Kararan ne bo hekalut: ak kikwong'io mising' ak kotang'any agobo noto kagoyaak eng' inendet. ¹¹ Ak kingota konamoti chichoto Petero ak Johana, koruai bik tugul ole mi ichek eng' keterut ne kiguure ne bo Solomon, kokwong'dos mising'. ¹² Ak ye kingogeer Petero, kowolji bik koleji, Akwe bikab Israel, kalya si okwong'ie agobo ni? anan kalya si ochiiljech kong' ko u ne olen ache che kagigochi inendet kowendot eng' kamugennyo anan eng' imandanyo? ¹³ Jehovah ne bo Abraham, ak ne bo Isak, ak ne bo Jakobo, Jehovah ne bo kwanisiekyo, ko kagotoror Kiboitiondennyi Jeiso, ne kiogoite ak kioeesye inendet eng' taitab Pilato, ye kiga kobegechi kotiach inendet. ¹⁴ Ago kioeesye akwe Inendet ne Tilil ak ko bo Imanda, ak osom ole kegonok rumindet, ¹⁵ Ak kiobar Ne o ne bo sobondo; ne kiing'eet Jehovah eng' che kibek; ki baorinikab noto ache. ¹⁶ Ak kagogochi kainennyi chichi kimnatet, mu kayanet eng' kainennyi, chichi ogeere ak ongen akwe; ee, kayanet ne mi eng' Jeiso ko kagogochi chichi sobet ¹⁷ Ak nguno nyun, che kitupche, angen ale, kioyai noto amu kima ongen, ko u ye kiyai bounikwok agichek. ¹⁸ Ago tuguk che kiga kobor Jehovah eng' tai eng' kutuswekab maotik tugul, kole tun nyalili Kristo nenyi, ko kagoyai noto kosulda. ¹⁹ Osigu anyun ak owalage, si kobiit kibukto tengekwogikwok, si kobwa nyun betusiek che bo kamuung'et che bunu taitab kiptaiyat; ²⁰ si koyok Kristo ne kigilewenwok, inendet Jeiso: ²¹ Ne kanyol kotaach kipsengwet agoi betusiek che kiwale tuguk tugul komiagitu, che king'alale Jehovah eng' kutuswekab maotikyik che tililen che kimi kong'ete taunetab ng'weny. ²² Kimwa Musa iman, kole, Ing'etwok Kiptaiyat Jehovah maotiot ne bunu che otupche, ne u ane; ogas it inendet eng' tuguk tugul che te che mwawok. ²³ Ak tun king'emei kiwong'u eng' kwenutab bik, chito age tugul ne magase it maotiondonoto. ²⁴ Ee, ak maotik tugul kong'ete Samuel, ak ichek che kipkoni let eng' inendet, tugul che te che king'alal, ko kimwa agichek agobo betusiechu. ²⁵ O werikab maotik, ak che bo kayomiset ne kiiyomisgei Jehovah ak kwanisiekwok.Kileji Abraham, Kiberuri bororiosiek tugul che bo ng'weny eng' keswondeng'ung'. ²⁶ Ak ye kingo kagong'eet Jehovah Kiboitiondennyi, koyokwok akwe korok si koberurok, ak koistoe chi age tugul eng' akwe tengekwogikyi.