¹ Ak kingoit betutab Pentakost, ko kimi tugul komosta agenge. ² Ak kimong' eng' sainoto cheet ne bunu kipsengwet ko u kibuget ne usei eng' kimnatet ne o, ak kinyi got komugul ole kitebe. ³ Ak kimong'ji ng'elyebwek che pcheotin, ko u che bo mat; ak kitebe age tugul eng ichek. ⁴ Ak kinyi ichek tugul Tamirmiriet ne Tilil, ak kitoi kong'alale kutuswek alak, ko u ye kiigochi Tamirmiriet kong'alal. ⁵ Ak kimi Yahudik che kimenye Jerusalem, bik che kigonyiti Jehovah, che kibunu bororiet age tugul ne mi kureretab kipsengwet. ⁶ Ak kingogas cheonoto, koyumjigei tuiyet, ak kokowong'io, kolen, ⁷ Ogeer anyun, tos ma Galilik chu tugul ng'alaldos? ⁸ Ak katepto ano si kegas ache chi tugul eng' kutinnyo, ne kigisiktech? ⁹ Partik ak Medoik ak Elamik, ak che menye Mesopotamia, ak Judea ak Kapadokia, ak Ponto ak Asia, ¹⁰ ak Prugia ak Pampulia, ak Misri ak komoswek che bo Libya che legite Kurene, ak toek che bunu Rom, Yahudik koboto che kibunji Yahudik eng' kayaneng'wai, ¹¹ Kretik ak Marabuk, kigase ichek kong'alali eng' kutuswekyo boisionik che eechen che bo Jehovah. ¹² Ak kitang'any tugul, ak kogerer met, kolejigei ichegei, Egu nee ng'olyondoni? ¹³ Ago kichombil alak kole, Kabogityo eng' divaik che leelach. ¹⁴ Ago kitotonon Petero koboto taman ak aeng', ak koleji, eng' kutit ne o, Akwe bikab Judea, ak akwe tugul che omenye Jerusalem, ingonaak ni eng' akwe, ak oepchi it ng'alekyu. ¹⁵ Amu mabogityo bichu, ko u ye obwati; amu ta ko sait somok kityo; ¹⁶ ago nito ne kimwaei maotiot Joel; kole, ¹⁷ Mwaei Jehovah kole, Tun eng' betusiek che bo let, Arong'jini bik tugul tamirmirennyu, Ak komaoten werikwok, Ak kogeer murenikwok ng'ang'utik, Ak koruotyi boisiekwok karuotitaosiek: ¹⁸ Arong'jini tamirmirennyu eng' betusiechoto; Ee, agot otwogikyu murenik ak tibik, si komaoten. ¹⁹ Ak abarte kwang'utik eng' kipsengwet barak, Ak kaborunoik eng' oli bo ng'weny; Korotik, ak mat, ak iyenetab iyeto. ²⁰ Kiwale asista koik mesundeito, Ak kewal arawet koek korotik, kotom koit betutab Kiptaiyat, Betut ne o ago ne toogunot: ²¹ Ak tun kisoru age tugul ne kuurei kainetab Kiptaiyat. ²² Akwe bikab Israel, ogas ng'alechu: Jesu ne bo Nasaret, chito ne kiibarta Jehovah eng' akwe eng' boisionikab kimnatet ak kwong'utik ak kaborunoik, che kiyai Jehovah eng' inendet eng' kwenung'wong', ko u ye ongen akwe; ²³ Inendet ne kiigoito Jehovah eng' begechinetab ng'olyondennyi ak naet ne kiga kechob eng' tai, kiogartat akwe inendet ak obar eng' eunekab bik che bistoe n'gatutik: ²⁴ Inendet ne kiing'et Jehovah ko kagotiach eng' ng'wanindo ne bo meet: amu kima komuchi meet konam inendet. ²⁵ Amu kimwa Daudi agobo inendet, kole, Kiageere Kiptaiyat kotugul komi tainnyu; Amu mi inendet eunnyu ne bo tai, si ma kitumduma: ²⁶ Amu noto anyun kiigasgei muguleldanyu, ak kibaibait ng'eleyptanyu ak koboto noto komeng'isiei bortanyu agine eng' kamang'unet. ²⁷ Amu mebagakyini sobondanyu oldab che kigobek, Amegoitoi neng'ung' Ne Tilil kogeer nunet. ²⁸ Kiigona anai ortinwekab sobondo; Inyiitwa boiboiyet eng' taing'ung'. ²⁹ Mureju ak che kitupche, amwawok komie agobo boiyot ne o Daudi, ale, kime ak kigitub, ak mitei kererinnyi kwenunnyo agoi ra. ³⁰ Ak amu ki maotio, ak kiingen kole kiga koyosiechi Jehovah inendet kole, indoi Jehovah ng'echerennyi chito ne tun bunu iyotennyi. ³¹ Kingogeer nito anyun, kong'alal agobo ng'etyeetab Kristo kole, ma kibagakyin inendet oldab che kibek, ama nunei bortanyi. ³² Kiing'et Jehovah Jeiso nito, ne ki baorinikyi ache tugul. ³³ Amu itororot inendet eng' eutab tai ne bo Jehovah, ak ko kagetaach eng' Kwanda kayomisiet ne bo Tamirmiriet ne Tilil, ko kagorong' anyun nito ogeere ak ogase. ³⁴ Kimatogosta Daudi kipsengwetisiek, ago kimwa inendet kole, Kileji Kiptaiyat Kiptaiyandennyu, Tebe eunnyu ne bo tai, ³⁵ Agoi ayai buniguk koek ng'echeretab kelyeguk. ³⁶ Ingonai anyun komie got komugul ne bo Israel, kole, kigoyai Jehovah inendet koek Kiptaiyat ak ko Kristo, Jeiso nito ne kiogartat. ³⁷ Kingogas anyun nito, kotoor mugulelwekwai, ak koleji ichek Petero ak che kiyoktoi chun alak, Che kitupche, kiyai nee? ³⁸ Koleji Petero ichek, Osigu, si kibatisan age tugul eng' akwe eng kainetab Jeiso Kristo agobo nyoetab kaat ne bo tengekwogikwok; si otaach konunetab Tamirmiriet ne Tilil. ³⁹ Amu neng'wong' kayomisoni, ak lagokwok, ak tugul che mi ole loo, ak tugul che ta koguurei Kiptaiyat Jehovah nenyo kobwanji inendet. ⁴⁰ Ak kibaorian eng ng'alek alak che chang', ak kogiil, koleji, Osoruge eng' ibini kunur. ⁴¹ Kigibatisan anyun icheget che kitaach ng'olyondennyi: ak kigitesyi ichek betunoto bik olo bo elfusiek somok. ⁴² Kiigiiljigei ichek tugul konetisietab che kiyoktoi ak yamdaet, eng' butuletab makatiat ak sautik. ⁴³ Ak kinyor chi tugul kaiyweisiet: ak kiyaak kwong'utik che chang' ak kaborunoik eng' che kiyoktoi. ⁴⁴ Ak kimi tugul kibagenge che kiga koyan, ak kiyamdoi tuguk tugul; ⁴⁵ ak kialda mbarenikwai ak tuguk alak che kitinyei, ak kopchechi ichek tugul che te che kinyalili chi age tugul. ⁴⁶ Ak kimi hekalut betut age tugul kotebchei eng' kabwatet agenge, ak eng' butuletab makatiat eng' ga, ak kiamisiei eng' kagasetab ge, ak eng' muguleldo agenge, ⁴⁷ kolosu Jehovah, ak kiiboiboi ichek bik tugul. Ak kitesyin Kiptaiyat betut age tugul icheget che nyoru sorunet.