¹ Ee Teopilo, kiatet eng' baruet ne bo tai,tugul che kitoi Jeiso koyai ak konet, ² agoi betut ne kigimuti kwo barak, ye kingo kagogochi ng'atutiet eng' Tamirmiriet ne Tilil che kiyoktoi che kiga kolewen. ³ Icheget che kiiborjigei kosobei ye kingobata nyalildanyi, eng' kaborunoik che chang'. King'ang'jigei icheket eng' betusiek artam, ak kong'alalji icheket agobo tuguk che bo bounatetab Jehovah. ⁴ Ak kingo kagoyumjigei koboto icheget, kong'at koleji, amat obe eng' Jerusalem, ago ogany kayomisiet ne bo Kwanda, noto kiogasena ⁵ amu kiibatisanis Johana iman eng' beko; ago kibatisanok eng' Tamirmiriet ne Tilil kotomo kogesgei betusiek che matia. ⁶ Noto anyun, ye kingo kagoyumgei, koteebe inendet, koleji, Kiptaiyandani, iwekyini Israel bounatet eng' betusiechoto? ⁷ Koleji icheket, "Mabotok onai betusiek anan kenyisiek, che kigonde Kwanda eng' bounatennyi inegei. ⁸ Ago otaache kamuktaet, ye tun kanyonjok Tamirmiriet ne Tilil: ak oegu baorinikyu eng' Jerusalem ak eng' Judea komugul ak Samaria, ak agoi tabandab ng'weny." ⁹ Ak ye kingo kagomwa Kiptaiyat Jeiso tuguchu, ye kito kogeerei kimut inendet kwo barak; ak kitaach boldet inendet ak kobetito eng' taing'wai. ¹⁰ Ak ye kingoto konyali kipsengwet kochiljini kong' koto kowendi, ogeer anyun, kitononso biko aeng'u eng' ye negite icheget kolaachi ngoroik che leelachen. ¹¹ Che kimwa agichek, kole, Akwe bikab Galili, kainee si otononse ak onyali kipsengwet? tun nyonei Jeiso nito, ne kagimut kwo kipsengwet kobunei oling'wong', ko u yu kogeere kowendi kipsengwet. ¹² Koweektage anyun koba Jerusalem kobunu tulwet ne kiguure tulwetab Emitik, ne legite Jerusalem, ne imegei ak bandab betutab sabato. ¹³ Ye kingo kagoba go, kolany got ne bo barak, ole kitebe; agot Petero, Johana, Jakobo, Andrea, Pilipu, Tomas, Bartolomayo, Matayo, Jakobo ne bo gab Alpayo, Simon Selote, ak Judas ne bo gab Jakobo. ¹⁴ Kitebi tugul eng' kabwatet agenge eng' kagiiletab ge ne bo saet, koboto chebiosok, ak Maria kametab Jeiso, ak tupchosiekab Jeiso. ¹⁵ Ak kitonon Petero eng' kwenutab che tupcho eng' betusiechoto, (ki chang' bik che kiga tuiyo, ki olo bo bogol agenge ak tiptem), ak kile, ¹⁶ Che kitupche, ko nyolu kosulda sirutik, che kiga mwa Tamirmiriet ne Tilil eng' tai eng' kutitab Daudi agobo Judas, ne ki kandoindet ne kiindochini ichek che kinamei Jeiso. ¹⁷ Amu kigiititech, ak kinyor kebebertannyi eng' boisioni. ¹⁸ (Ak kinyor chichi mbaret eng' melektab tengektannyi: ak kingobut kosieb mo, kobetak moet, komong' agutanikyi tugul. ¹⁹ Ak kinaak ng'olyondonoto eng' tugul che menyei Jerusalem; kot keguure mbaranato Akeldama eng' kuting'wai, noto ko, Mbaret ne bo korotik. ²⁰ Amu sirat eng' bukuit ne bo Tienwogikab kalosunet, kole, Ingoek karatia ole menyei, Ak amat komeny chi oloto: ak, Ingonam chito age boisiennyi. ²¹ Ingobiit age eng' biko che kicham kebendoti tugul eng' betusiek tugul ye kicham komong'u Kiptaiyat Jeiso ak komandoi eng' kwenunnyo, ²² kotaune kabatisanetab Johana, agoi betut ne kigimuti kwo barak kobunei olinyo, ak kanyol koek age eng' bichuto baoriat kobotech agobo ng'eetyennyi. ²³ Ak kilewen biko aeng', Josep ne kigiguure Barsaba, ne kigiguure kainennyi ne bo aeng' Justo, ak Matia. ²⁴ Ak kisa, kole, "Inye, Kiptaiyat, ne ingen mugulelwekab biko tugul, iboruech eng' bichu aeng', ne kailewen ²⁵ si kobiit konam kebeberta eng' boisioni ak kayoktaoni, ne kiibute Judas, si kobiit kwo oldanyi." ²⁶ Ak kiser barbarek agobo icheket; ak kiibutyi barbariat Matia, ak kigiitito che kiyoktoi taman ak agenge.