¹ Ak kole anyun tisiindet ne o, Tos u choto tuguchu? ² 2Kole Stepano, Mureju, che kitupche, ak kwanisiekyok, ogaso, Kimongji Jehovah ne bo torornatet kwandanyo Abraham, kimi Mesopotamia, kitomo komeny Haran. ³ 3Ak koleji, Mong'u eng emeng'ung' ak ole mi biguk, ak inyo emet ne ta aborun. ⁴ Komong' anyun eng' emetab Kaldeik ak komeny Haran, ak kingo kagome kwandanyi, kouu Jehovah inendet konyo emonito omenye rani. ⁵ Ak kima igochi borotet inendet eng' oloto, acha, agot ole indoi keldanyi: ak kiiarorji kole, tun igochin inendet ak iyotennyi eng' let, ye kitom kosich lakwa. ⁶ Ak kimwa Jehovah ko u ni, Kole egu lagokyi bunotik eng' emetab bik alak, ak koyai ichek koek ak keyachi ne ya eng' kenyisiek bogol ang'wan. ⁷ Ak eng bororionoto ratei ichek, komwa Jehovah kole, aruokyini, ak ye ibata noto komong' ak koboisiewa eng' olito. ⁸ Ak kiigochi inendet (Abraham) arorutiet ne bo kamuratanet, ak kosich anyun Abraham Isak ak komuratan inendet eng' betut ne bo sisit, ak kosich Isak Jakobo ak kisich Jakobo kwanisiekyo taman ak aeng'. ⁹ Ak ye kingoam ng'et kong' boisiechoto agobo Joseph koaldochi inendet Misiri, ago kimi Jehovah koboto inendet. ¹⁰ Ak kisor inedet eng' nyalilwogikyi tugul ak kogochi chamet ak ng'omnatet eng' taitab Parao, laitoriatab Misiri ne kiinde inendet koek bounindet eng emetab Misiri ak eng gonnyi tugul. ¹¹ Kinyo anyun rubet eng' emetab Misri komugul ak Kanan, ak nyalilda ne o, amu manyor kwanisiekyo amitwogik. ¹² Ye kingogas Jakobo kole mitei bek Misiri, koyokto kwanisiekyo eng banda ne bo tai. ¹³ Ak eng' banda ne bo aeng' koborjigei Joseph tupchosiekyi ak kinaak anyun eng' Parao bikab Josep. ¹⁴ Eng' yoto anyun koyokto Josep kole keguur kwandannyi Jakobo, ak bikyi tugul che kiitei bik tamanwogik tisab ak mut. ¹⁵ Ak kochortagei anyun Jakobo kwo Misiri, ak komechi oloto inendet ak kwanisiekyo agichek. ¹⁶ Ak kigila ichek koba Sekem ak ketupchi Kererit ne kiga goale Abraham kamanutietab feda eng' werikab Hamor kwandab Sekem. ¹⁷ Ak ye kingorik betut ne bo arorutiet, ne kigaiiyosiechi Jehovah Abraham, koyabak anyun bik ak kotesogis eng' Misiri, ¹⁸ agoi kobiit laitoriat age eng' Misri, ne kima kongen Josep. ¹⁹ King'omenji inendet bororiennyo, ak koyachi ne ya kwanisiekyo, si kolakta manyurunikwai si masopcho. ²⁰ Ak kigisich Musa eng' betusiechoto, ak ki kararan inendet mising'; ak kigigu inendet eng' gotab kwandanyi arawek somok. ²¹ Ak kingo kagemeto, konyo chebo Parao, komut, ak kogu koek werinnyi. ²² Ak kiginet Musa ng'omnatet tugul ne bo Misrik; ak ki kim eng' ng'alekyi ak boisionikyi. ²³ Ak ye kingoit olobo kenyisiek artam, kobwat eng' muguleldanyi korutochi tupchosiekyi, lakogab Israel. ²⁴ Ak ye kinyalili age eng' ichek, kotoret inendet, ak koyaaktochi mugetut inendet ne kaginyalili, kokwer Misirindet kobar: ²⁵ ak kilen inendet naei tupchosiekyi kole igochin Jehovah ichek sorunet eng' eunnyi; ago ma nai. ²⁶ Ak eng' betut ne kisubi noto kochunji ichek kobortos, ak kimachei kooiyo ichek, koleji, Mureju, otupche akwe; kalya si oyachige ne ya? ²⁷ Ago kitoorta inendet ne kiyachi nin age ne ya, ak kole, Ng'o ne koindein iegu bounindet ak kiruoget kot iruokwech? ²⁸ Imache ibara ko u ye koibar Misrindet amut? ²⁹ Kimwee Musa anyun amu ng'olyondonoto, kwo koek bunotyo eng' emetab Midian, ole kisikyi werik aeng'. ³⁰ Ak kingobata kenyisiek artamu, komong'ji inendet malaikaiyatab Kiptaiyat eng' ong'atet ne bo tulwetab Sinai, eng mat ne kilale eng ketit ne samum. ³¹ Ak kingogeer Musa kioto, kokwong', ak kingorikta kole kogeer, kotwek kutitab Kiptaiyat, ³² kole, Ai Jehovah ne bo kwanisieguk, Jehovah ne bo Abraham, ak ne bo Isak, ak ne bo Jakobo. Kobotan Musa, ko mata kogany kogeer. ³³ Koleji anyun Kiptaiyat inendet, Icheru kweoniguk eng' kelyeguk, amu tilil ng'onyut yoto itonone. ³⁴ Kiageer iman nyalildab bikyu che mite Misri, ak kiagas tigeneng'wai, ak kaachoruge si kobiit asor ichek: nyo anyun nguno, ayokten iwe Misri. ³⁵ Ki Musa nito ne kiga esio ichek, kolen, Ng'o ne koindein iegu bounindet ak kiruogindet? Inendet kora ne kiiyokto Jehovah eng' eutab malaikaiyatab ne kimong'ji inendet eng' ketit si kobiit koek bounindet ak katiagindet. ³⁶ Kiimut anyun inendet ichek komanda, ye kingo kagoyai kwong'utik ak kaborunoik eng' emetab Misiri, ak eng' Nyanjet ne Birir, ak eng' kenyisiek artam eng' ong'atet. ³⁷ Musa nito ko noto ne kileji lagogab Israel, Ing'eetwok Jehovah maotiot ne tun bunu che otupche, ne u ane. ³⁸ Nito ko inendet ne kimi kaniset eng' ong'atet koboto malaikaiyat ne king'alalji inendet eng' tulwetab Sinai, ak koboto kwanisiekyo: ne kitaach ng'alek che soptos si kogonech. ³⁹ Ago kima kas it kwanisiekyo inendet, ago kiesio inendet, ak kiweektagei mugulelwekwai Misri. ⁴⁰ Koleji Aron, Yaiywech kanamonik kondoenech: amu magingen ole katepto Musa nito, ne kiimutwech kemong'une emetab Misri. ⁴¹ Ak kiyai anyun moita eng betusiechoto, ak koipchi tiseiywot kanamwonoto, ak koboiboitu eng' boisionikab eunekwai. ⁴² Ak kotuptochi anyun Jehovah batai ichek, ak kogoito ichek koot lugetab kipsengwet; ko u ye sirat eng' bukuitab maotik, kele, Tos kiogona che kiyagi che kageeny ak tiseiywek eng' kenyisiek artamu eng' ong'atet? ⁴³ Ak kioib akwe emait ne bo Molok. Ak kecheiyat ne bo kanamwet Repan, kanamonik che kioyai si osa: Ak autok obe Babulon bitonin. ⁴⁴ Kitinyei kwanisiekyo emait ne bo baornatet eng' ong'atet, ko u ye kiga koaror, ak kora ko inendet ne kimwachi Musa koleji ko u kergeindo ne kiga kogeer. ⁴⁵ Noto ne kiib kwanisiekyo agichek eng' betusiekwai koboto Josua , ye kingo namei bororiosiek che kion Jehovah eng' taitab kwanisiekyo, agoi betusiekab Daudi; ⁴⁶ ne kinyor chamet eng' taitab Jehovah, ak kosom konyor meng'otetab Jehovah ne bo Jakobo. ⁴⁷ Ago Solomon ne kiitekyi got. ⁴⁸ Ago inendet ne toror mising mamenye gorik che kigiyae eunek, ko u ye mwae maotiot, kole, ⁴⁹ Ng'echerenyu ne bo laitornatet kipsengwet, Ak ng'weny ko ng'echeretab kelyekyu: Tos oteekwa got ne u nee? mwaei Kiptaiyat: Anan ano ole amuung'e? ⁵⁰ Tos ma eunnyu ne kiyae tuguchu tugul? ⁵¹ Akwe che uui kaat che ma kimuratan mugulelwek ak itik, ogirindoi Tamirmiriet ne Tilil kotugul: ko u ye kiyae kwanisiekwok, oyae ak akwe ko u noto. ⁵² Ng'o eng maotik ne ma us kwanisiekwok? ak kibar che kisib kobar nyonunetab Chito ne bo Imanda; ne kaoegu akwe nguno ng'wektoik ak rumik. ⁵³ Akwe che kiotaach Ng'atutiet ko u ye kiging'at eng' malaikaisiek, ak ma orib. ⁵⁴ Ak ye kingogas ng'alechuto kong'wonegitu mising eng' mugulelwekwai, ak konyei kelek agobo inendet. ⁵⁵ Ago kiinyal kipsengwet kochiilji kong' ko nyiitat inendet Tamirmiriet ne Tilil, ak kigeer lilindab Jehovah, ak Jesu kotononi eng' eutab ne bo Jehovah. ⁵⁶ Ak kile, Ogeer anyun, ageere kipsengwetisiek ko kagoyatagis, ak kotononi Weritab chi eng' eutab tai ne bo Jehovah. ⁵⁷ Ago kibolyo eng' kutit ne o, ak koger itikwai, ak kotorombenji kibagenge. ⁵⁸ Ak kitoorta inendet komanda eng' nganaset, ak kolage koik: ak kiinde baorinik ngoroikwai kelyekab muren age ne kigigure Saul. ⁵⁹ Kolach anyun Stepano, koguurei Kiptaiyat, kolen, Kiptaiyat Jeiso, taach tamirmiriennyu. ⁶⁰ Ak kigutuny, ak komwa eng' kutit ne o, kole, Kiptaiyat, ameiityi ichek tengegi. Ak kingo kagomwa nito, konuuch.