¹ Oegu kosupikchu ko inye osupi Kristo. ² Aloswok anyun tupchosiek , amu abkato eng' tuguk tugul ak oribe ng'atutik ko u ye kainetak. ³ Onai anyun nyi ole metitab chi age tugul ko Kristo, ago metitab kwanda ko muren ago metitab Kristo ko Jehovah. ⁴ Muren age tugul nyi maoteni nda kosa kotukot metinyi ko maknyit metinyi . ⁵ Ago chepyoso age tugul ne soe nda koamndoi logoiywek ko yatat metit ,kagotewer metinnyi "amu kagergeit ak chi ne inemunot met. ⁶ Amu ngo ma tugot metitab chepyoso , ko ingetilji agine sumeek, ago ngo kalilano eng' chepyoso ketilji summek nda kinem , ko ngotuch metinnyi. ⁷ Monyolu kotuche met mureno amu inendet kerkeindo ak torornatetab Jehovah, ago kwondo ko torornatetab muren. ⁸ Amu mo bo muren kwondo, ago bo kwondo murenet. ⁹ Amele kigichopchini muren, kwony ago kigichopchi kwony muren eng' kaptisisiet. ¹⁰ Makat anyun kwony kotinye baunatet eng' metinyi amu malaikaisiek. ¹¹ Agot kora ko momi mureno ngo momi kwony, ama mi kwony ngo mami mureno eng' Kiptaiyat. ¹² Ko u ye kibunu kwony muren, ko u nyoto agine kosiche kwony muren ago tuguk tugul ko bo Jehovah. ¹³ Oruokchige kira, tos nyolu kwony kosa koatukot metinyi? ¹⁴ Tos ma inetok bitet olu u? Kele ngo tinye mureno sumeek chi koen ko kalilanet eng' inendet? ¹⁵ Ago ngot kotinye kwony sumeek che koen,ko torornatenyi nyoto, amu kigigochi sumeechoto asi kotugege. ¹⁶ Ngot ko mi chi nyi tiysot, ko makitinye biitet nyi u nyoto ama mi kora eng' kanisetab Jehovah. ¹⁷ Amwowok anyun nyi ale melen oloswok amu tuiyosiek chi aname amu otuisoti ma eng' chi kororon ago eng' chi yaachen. ¹⁸ Ne tai anyun, ogase ole ye otuiye eng' hekalut komi besiet kwenung'wong'. ¹⁹ Amu mi besiosiek kwenung'wong' nyi matiny si kotook iche chi bo iman eng' kwenung'wong'. ²⁰ Yo kotuiyechi komasta agenge ko mosikchine oam meseetab Kiptaiyat. ²¹ Amu eng' omisieng'wong' kosib konemu age ak ame age rubet kobogiti age. ²² Nee? Tos motinye gorik chi kiamisie ak chi kiesie ? nda koreny kanisetab Jehovah ? Ak ogochi kalilanet iche chi motinye? .Amwowok nee anyun? Tos aloswok eng' nyito?Olo maloswok. ²³ Kianyorune Kiptaiyat nyoto kiagonok akwe ko u ye kinam makatiat Kiptaiyat Jeiso eng' kemounoto kiging'wektoi inendet. ²⁴ Ak ye kingo kakomwa kongoi, kobutul ak kole , nyi ko bortanyu nyi kibutuli amu akwe.Oyai nyito komugul obgatena. ²⁵ Ko u nyoto kora, ko kiib kigombet ak komuus ak kole, nyi ko arorutiet nyi leel eng' korotichu oyae nyito si obgatena. ²⁶ Komugul anyun ye oame makatiat ak oee kikombet ,obortoi meetab Kiptaiyat agoi Konyo. ²⁷ Ara anyun ale tugul nyi ame makatiandani ak nda aee kikombani ama nyoljini, koipchige kiruoget nyi bo borto ak korotikab Kiptaiyat. ²⁸ Ago ngosiachge chi age tugul kotom koam makatiat ak koe kigombet. ²⁹ Amu inendet nyi ame ak koee ama nyoljini, koamchnike ,koechinike kiruok amu moikuiyo bortab Kiptaiyat. ³⁰ Nyoto amu nee si konyolultos ak komiandos chi chang' eng' akwe ak ko ruisot chi chang'. ³¹ Amu Ngot kitigonige acheget , ko tun kumakiruokwech. ³² Ago yo kiruokwech Kiptaiyat, si ma tun kiruokwech ak ng'weny. ³³ Nyoto anyun,tupchosiekchu, yo kotuiye oamisie, okanyge. ³⁴ Ak ngu ame chi rubet, koamis eng' gaa kotom kocho si moruogchige eng' kotuiyeng'wong'.Ak ng'alek alak che kiosir, anyoni achobe.