¹ Momoche anyun ,chi kitupche, ale oegu chi monget, ole kimito kwanisiekyo tugul ng'wenyutab boldet, ak kibun tugul araraita. ² ak kibatisanji tugul Musa eng' boldet ak araraita. ³ ak kiam tugul amdit agenge ne bo tamirmiriet, ⁴ ak kiee tugul eet agenge ni bo tamirmiriet. amu kiee tugul eng' ruandet ni bo tamirmiriet ni kirub iche, ak ruandanoto ko ki Kristo. ⁵ Ago kima baibaichi mising' Jehovah chi chang' eng' iche; amu kigiserta eng' ong'atet. ⁶ Kiek tuguchu anyun kaborunoikyo, si magimakyi tuguk chi yaachen, ko u yo kimakyige iche mising'. ⁷ Amoegu chi sae kanamok, ko u alak ing' iche, ko u yo kigisiir kele, kitebi ng'weny biko koamis ak koee, ak kong'etyo ko urerensot. ⁸ Amata kisogse, ko u yo kiae alak eng' iche, ak kiibutyo eng' betut agenge elufusiek tuptemu ak somok. ⁹ Nda ketiem kiptaiyat, ko u yo kitiem alak eng' iche, ak kibar erenok. ¹⁰ Amato ng'unyng'ungye ko u yo king'unyng'unyo alak eng' iche, ak kibok eng' ng'emindet. ¹¹ Kiaak anyun tuguchuto eng' iche si koek kaborunet; ak kigisir agobo kateunennyo, ache chi kagochonjet kagesunetab kenyisiek ¹² nyoto anyun ng'oripge si ma tebut inendet ne ibwoti kole tononi. ¹³ Kima namak yomset kobate nyoto ne imuchi komuitae chi tugul; ago bo iman Jehovah ni machomdook keyomak kosiir ni te ne imuchi; ago koboto yomsonoto aei agine oret ni ochilile, si kobiit omuch omuite. ¹⁴ Nyoto anyun, chamanikyu oyestae biteetab kanamonik. ¹⁵ Ang'ololi ko u yo ang'ololjini biko chi ng'omen; obesie kito no mwoe. ¹⁶ Kigombet ni bo kaberuret ni kiberuri, ko tos ma amdaet ni kibutuli ko tos ma amdaet ni bo bortab Kristo? ¹⁷ Amu ache chi ki biko chi chang'; ko ki makatiat agenge, borto agenge; amu kiome ache tugul makatiat agenge. ¹⁸ Ogeer Israel -o ing' atebtab borto: tos matinye amdaet ak kaptisisiet iche chi ame tiseiwyek? ¹⁹ Amwoe nee anyun? amwa ale kiyni ne kieng'jin kanamonik nda tos kiy kanamwet? ²⁰ Ago tuguk chi igoitoi Bororosiek koeng'jini oik, ago ma Jehovah: amamoche oae amdaet ak oik, ²¹ Momuchi oee kikombetab kiptaiyat, ak kikombetab oik. momuchi oam ing' mesetab kiptaiyat, ak mesetab oik. ²² Nda kitoche kiptaiyat konyor ng'etkong? Tos kigimen kosiir inendet? ²³ chamdaat tuguk tugul; ago ma rugut tugul chi nyolu. Chamdaat tuguk tugul; ago ma tuguk tugul chi teekse. ²⁴ Ama tocheng'jige chi chechi inegei, ago chi bo chitab kokwennyi. ²⁵ Kiy age tugul ni kioldoi eng' kabany, oam, amoteeb kiy amu kabwatet; ²⁶ amu bo kiptaiyat ng'weny, ak chi nyiitat ng'weny. ²⁷ Ngo kuurok age eng' iche chi moiyoyni kole kobaak, ak omoche obe; ko kiy age tugul anyun ni kagindeno taing'wong' oam ama to teebi amu kabwatet. ²⁸ Ago ngo lenok chi age tugul, kagigoitoi kii koek tiseiywot, ko moam, amu inendet ni kagoborun, ak amu kabwatet. ²⁹ Kabwatet ni amwoe ko ma ningung', ago bo age; amu kalya si koruokyi katiagennyu kabwatet age? ³⁰ ngo atooche eng' kongoi ko amu nee si kemwataena yaitio eng' kito ni koagoite kongoi ? ³¹ Nyoto anyun ngoame, nda ngoee nda mbo ing' kiy age tugul ni oae, oae tugul otorori Jehovah. ³² Amonach Yahudik nda yunanik, nda kanisetab Jehovah; ³³ mbo ko u yo oboiboien biko tugul eng' tuguk tugul, mocheng'e kelunennyu agine, ago kelunet ni bo chi chang', si kobiit kesor.