¹ Kisha malaika wa tsano achibiga tarumbetaye. Neona nyenyezi kula mulunguni iriyokala idzebgwa duniani. Nyenyezi yepewa ufunguo wa dzina ririrolongoza kpenye dzina risiro na mng'isho. ² Wefugula dzina risiro na mng'isho, na mosi uchipanda dzulu kpa misitari kula ndani ya dzina here mosi wombolao kuleza tanuru bomu. Dzua na anga zegaluka zichikala chiza kpa sababu ya mosi urioombola dzinani. ³ Ndani ya mosi mabanzi veombola kudza dzulu ya dunia, navo vepewa nguvu here iratu ya inje dzulu ya dunia. ⁴ Veambwa vasiduru makodza kahi za tsi wala mumera wowosi wa mani maitsi au muhi, isihokala tu atu ambavo kavakalire na muhuri wa Mulungu kahi za vikomo vya masura gao. ⁵ Kavapewerwe ruhusa ya kolaga atu, bali kuvatesa tu kpa miezi mitsano. Utsungu wao wekala here uratu wa kulumng'a ni inje amulumaho mutu. ⁶ Kahi za siku zizo atu vandatafuta chifo, ela kavandachipata. Vandatamani kufwa, ela chifo chindavachimbira. ⁷ Mabanzi vehalana na farasi variotayarishwa kpa viha. Vitswani mng'ao mng'ekala na vitu here taji ya dahabu na masura gao gekala here ga binadamu. ⁸ Vekala n nyere here za anaache na meno gao gekala here ga simba. ⁹ Vekala na vifua here vifua vya chuma na sauti za mavava gao gakala here sauti ya magari manji ga viha na farasi vaingaomalo kpenda vihani. ¹⁰ Vekala n michira ilumayo here inje; kpenye michira yao vekala na nguvu ya kuduru atu kpa miezi mitsano. ¹¹ Vekala na here mufwalume dzulu yao malaika wa dzina risirokala na mng'isho. Dzinare kahi za Chiebrania ni Abudoni, na kahi za Chiyunani nadzina Apolioni. ¹² Ole ya kpanza idzichira. Lolani! Baada ya riri kuna maafa mairi gadzago. ¹³ Malaika wa tandahu achibiga tarumbetaye, na nichisikira sauti ichombola kahi za pembe ya madabahu ga dahabu ambayo i mbere za Mulungu. ¹⁴ Sauti yemng'ambira malaika wa tandahu ariyekala na tarumbeta, " Varichire malaika anne ambavo vadzifubngwa kahi za muho mubomu Efrata. " ¹⁵ Malaika varatu anne variokala vadzitayarishwa kpa saa iyo maalumu, siku iyo, mng'ezi uo, na mng'aka uo, verichirwa vavaolage teluti ya anadamu. ¹⁶ Idadi ya shikari variokala dzulu ya farasi yekala 200,000,000. Nesikira idadi yao. ¹⁷ Vivi ndivyo nirivyoona farasi kahi za maono gangu na varatu variopanda dzulu yao: Vifua vyao vyekala nitune here moho, buluhu iriyoiva na manjano isiyoiva. Vitswa vya farasi vyehalana na vitswa vya simba, na milomoni mng'ao mng'eombola moho, mosi na [salifa]. ¹⁸ Teluti ya anadamu veolabgwa ni gaga mabigo mahahu: moho, mosi na salifa iriyoombola kahi za milomo yao. ¹⁹ Kpakukala nguvu ya farasi yekala kahi za milomo yao na kahi za michira yao-kpakukala michira yao yekala here muhambalatsi, na vekala na vitswa ambavyo vevihumira kuvenjiza majeraha anadamu. ²⁰ Atu variosala, varatu ambavo vekala kavadzaolabgwa ni mabigo gaga, kavatubiire mahendo gao varigokala vadzihenda, wala kavarichire kpabudu nyagu na milungu ya dahabu, feda, shaba, mawe na mihi-vitu ambavyo kaviweza kona, kusikira wala kutsembera. ²¹ Wala kavatubiire wolagaji wao, utsai wao, uasherati wao wala njira zao za wevi.