¹ Kisha nichona malaika munjine mubomu achitima tsi kombola dzulu mulunguni. Were yudzifubngwa kahi za ingu, na kpekala na zinje ra mvula dzulu ya chitswache. Usowe wekala here dzua na maguluge here nguzo za moho. ² Webgwirira chitabu chitite mukononi mng'akpe chirichokala chidzifugulwa, naye weika chiguluche cha kurya dzulu ya bahari na chiguluche cha kumotso dzulu za tsikavu. ³ Kisha wegomba kpa sauti bomu here ya simba angurumaho, na haho arihounula sautiye dzulu vikpakpara vifungahe vyenguruma. ⁴ Vikpakpara vifungahe virihonguruma, were bado chidogo nandike, ela nesikira sauti kula mulunguni ichamba, " Tsunza ikale siri chiratu ambacho vikpakpara vifungahe vigomba. Usandike. " ⁵ Kisha malaika niriyemona yudzema dzulu ya bahari na tsikavu, weunula mukonowe dzulu mulunguni ⁶ na kurya chiraho kpa yuyatu aishiye kare na kare-ariyeumba mbingu na vyosi virivyomo, duniani na vyosi virivyomo, na bahari na vyosi virivyomo: " Kakundakalako kuchelewa kaheri. ⁷ Ela kahi za siku iratu, malaika wa fungahe andihofikahehi kubiga tarumbetaye, ndo siri ya Mulungu indihotimizwa, here arivyotangaza kpa ahumikive alombi. " ⁸ Sauti niriyoisikira kombola mulunguni yenambira kaheri: " Nenda, hala chitabu chitite chirichofunulwa ambacho chi mukononi mng'a malaika ariyeema dzulu ya bahari na dzulu ya tsikavu. " ⁹ Kisha nekpenda kpa malaika na nichimng'amba anipe chitabu chitite. Achinamba, " Hala chitabu urye. Chindaihenda tumboyo ikale na utsungu, ela kahi za mulomowo chindakala tamu here asali. " ¹⁰ Nehala chitabu chitite kula mukononi mng'a malaika na nichichirya. Mulomoni chere chitamu here asali, ela baada ya kuchirya, tumbo rangu rekala na utsungu. ¹¹ Kisha baadi ya sauti zenambira, " Unapaswa kutabiri kaheri kuhusu atu anji, mataifa, luga na afwalume. "