¹ Nichipewa here lufiho lure lwa muvungu, mum'wenga achinambira, "Uka na ukapime ro hekalu ra Mulungu na yo madhabahu, na vavo vavoyao mo ndani. ² Ela usipime ro baraza ra konze ra hekalu, pka kukala atu va Mataifa vepewa haho. Vanda-uvyoga wo mudzi mutakatifu pka muda wa miezi mirongo mine na miri. ³ Nami ninda-vapa mashahidi vangu airi kutabiri pka muda wa siku elifu m'wenga na magana mairi na mirongo mihandahu vachikala vadzivwala magunia. ⁴ Vava mashahidi be ni mihi miri ya mizeituni na vyango viri ambavyo vidzema mbere za Bwana wa dunia nzima. ⁵ Na be chikala mutu yoyosi yunda- vahasiri, moho nikombola kanwani m'wao na kuvarya vo adui zao. Na mutu achimala kuvadhuru ni lazima aolabgwe pka njira ii. ⁶ Vava mashahidi be vana uwezo wakufunga anga ili mvula isinye kahiza siku za unabii wao. Pia vana nguvu za kugaluza madzi gakale damu, na kulaani yo itsi pka chila aina ya bigo, wakati wowosi vachihenza. ⁷ Wakati vandiho marigiza wao, ye munyama aombolaye pkenye ro dzina risiro na m'wisho, yundahenda viha na vavo. Yundavashinda na kuvao-laga. ⁸ Maiti zao be indatsamuka kahiza barabara za wo mudzi mubomu, ambao chiroho ni here Sodoma, na Misiri, kisha ni haho Bwana wao ariho sulubiwa. ⁹ Pka siku tahu na nusu, atu va chila kabila, jamaa, luga na chila taifa, vandalola miiri yao, wala kavanda ruhusu izipke makaburini. ¹⁰ Na vavo vakalao dzulu za yo itsi vandahamirwa, na kushangilia, hata vanda-humirana zawadi, pkakukala vo manabii airi vevatesa vavo variokala vanaishi kahiza yo itsi. ¹¹ Na baada ya so siku tahu na nusu roho ya uzima ilayo pka Mulungu inda vaenjira, navo vandaema pka magulu gao. Wasi wasi mubomu be undavapata atu vavo vandio vaona. ¹² Kisha vandasikira sauti bomu kombola mulunguni, ichivaambira, "Nzoni kuku!" Navo vandenda dzulu mulunguni kahiza ingu, kuno adui zao vachilola. ¹³ Na kahiza saa iyo, pkekala na tetemeko ra itsi, na sehemu m'wenga kahiza kumi ya wo mudzi ichibgwa. Atu elifu fungahe vandafwa pka ro tetemeko ra yo itsi, na vandio baki azima vanda-ogoha na kumupa muvera Mulungu wa mulunguni. ¹⁴ Ole wa hiri uchira. Lola! Ole wa hahu unadza haraka. ¹⁵ Kisaha malaika wa fungahe be achibiga gundare, na sauti bomu zichamba ko mulunguni, "Utawali wa dunia be udzikala wa Bwana wehu na ye Masihiwe, yunda-tawala hata kare na kare. ¹⁶ Kisha go atumia mirongo miri na ane, vasegereo pkenye vihi vyao vya enzi mbere za ye Mulungu, vachibgwa chi uso-uso hotsi vachimu-sujudia Mulungu. ¹⁷ Vachamba, "Huna-kushukuru uwe Bwana Mulungu Mubomu utawalaye vyosini, uriyeko na ambaye wekalako, pka sababu udzihala uwezo wosi urio mubomu na pkanza kutawala. ¹⁸ Na mataifa ve tsukirwa, ela hasirayo nayo yekudza, na wakati uchidza wa kuhukumiwa vavo variofwa, na kuvapa mushahara vo atum'wao manabii na atakatifu, vavo varogohao dzinaro, atite pka abomu na wati-wo ufika uvabanange vavo vabanangao dunia." ¹⁹ Kisha Hekalu ra Mulungu ambaro rikuko mulunguni richifugulwa, na sanduku-re, ra chilagane richonekana ndani ya mo m'wapke hekaluni. Kuchikala na lumete na sauti ya chi-pkapkara, na tetemeko ra itsi na mvula ya mawe nyinji sana.