¹ Ishara bomu yeonekana dzulu mulunguni: mng'anamuche ariyefinikpa na dzua, na achikala na mng'ezi tsini ya maguluge na taji ya nyenyezi kumi na mbiri yekala dzulu ya chitswache. ² Were yunalutsunga na were yunarira kpa sababu ya utsungu wa kudzifugula. ³ Na ishara injine yeonekana mulunguni: Lola! kpekala na rihambalatsi ribomu ritune ambaro rekala na vitswa vifunghe na pembe kumi, na kpekala na taji fungahe kpenye vitswavye. ⁴ Muchirawe weburuta teluti mng'enga ya nyenyezi mulunguni na kuzitsuha tsi duniani. Rihambalatsi reema mbere za mng'anamuche ariyekala ariyekalahehi kudzifugula ili achikala nadzifugula, ripate kumiza muhohowe. ⁵ Wedzifugula mng'ana, muhoho wa chilume, ambaye yundagatawala mataifa gosi kpa fimbo ya chuma. Mng'anawe wenyakulwa dzulu kpa Mulungu na kpenye chihiche cha enzi, ⁶ na mng'anamuche achichimbira nyikani, hatu ambaho Mulungu were yudziandaa eneo kpaajiliye, ili aweze kuhudumiwa kpa siku 1,260. ⁷ Bai kpekala na kondo mulunguni, Mikaeli na malaikave vachibigana na riratu rihambalatsi, naro rihambalatsi ribomu na malaikave vachibigana navo. ⁸ Ela rihambalatsi karikalire na nguvu za kutosha kushinda. Kpavivyo kakukalire na nafasi kaheri mulunguni kpaajiliye na malaikave. ⁹ Rihambalatsi ribomu-riratu rihambalatsi ra kare rehwaro bilisi au shetani ariye ni kukenga dunia yosi, achitsuhiwa tsi duniani, na malaikave vachitsuhiwa tsi hamng'enga naye. ¹⁰ Kisha nichisikira sauti bomu kula mulunguni: " Vivi wokofu ukudza, nguvu na ufwalume wa Mulungu wehu, na mamulaka ga Kristowe. Kpakukala mushitaki wa ndugu zehu yudzitsuhiwa tsi-ambaye wevashitaki mbere za Mulungu wehu dii cho. ¹¹ Vemushinda kpa milatso ya mng'anang'onzi na kpa neno ra ushuhuda wao, kpa maana kavahenzere sana maisha gao, ta kufa. ¹² Kpa vivyo, shangiliani, mng'i mbingu, na mosi mukalao ndaniye. Ela ole wa tsi na bahari kpa sababu shetani yutima kpenu. Yudzodzalwa ni hasira kali, kpa sababu yunamanya kukala na muda muchache. ¹³ Rihambalatsi ririhomanya kukala ritsuhiwa tsi, remutua mng'anamuche ariye wekala yudzidzifugula muhoho wa chilume. ¹⁴ Ela mng'anamuche wepewa mavava mairi ga nyuni mubomu, ili aweze kubuuruka mupaka hatu harihotengenezwa kpaajiliye kuko nyikani, sehemu ambayo andetunzwa, kpa wakati, nyakati na nusu wakati-hatu asihoweza kuhafikirira ye muhambalatsi. ¹⁵ Muhambalatsi wemng'aga madzi kombola mulomoni mng'akpe here muho, ili ahende garika ya kumuhosa. ¹⁶ Ela tsi yemusaidia mng'anamuche. Yefugula kanware na ichiumiza wo muho arioutsitsa muhambalatsi kula mulomoni mng'akpe. ¹⁷ Kisha rihambalatsi richimutsukirirwa ye mng'anamuche naro richuka na kuhenda viha na uvyalowe wosi-varatu vatiio amuri za Mulungu na kubgwiririra ushuhuda kuhusu Jesu. ¹⁸ Kisha rihambalatsi richema dzulu ya mutsanga wa ufuo wa bahari.