¹ Kisha nichona munyama achombola baharini. Wekala napembe kumi na vitswa vifungahe. Kahi za pembeze kpekala na taji kumi, na kahi za chitswache kpekala na maneno gakukufuru Mulungu. ² Yuyu munyama niremona ni here tsui. Maguluge gekala hre ga dubu, na mulomowe wekala here wa Sumba. Riratu rihambalatsi richimupa nguvuze kula chihiche cha enzi, na mamulaka garigo na nguvu sana ya kutawala. ³ Chitswa cha munyama mumng'engawaho cheonekana kukala na jeraha bomu ambaro rindesababisha mautige. Ela jerahare richihola, na dunia yosi ichishangazwa na ichimutua munyama. ⁴ Pia vachirabudu rihambalatsi, maana remupa mamulaka yuyatu munyama. Vachimng'abudu munyama pia, na vachenderera kpamba, " Nani here munyama? " na " Nani awezaye kubigana nayhe? " ⁵ Munyama achipewa mulomo ili agombe maneno ga kudzisifu na matusi. Weruhusiwa kukala na mamulaka kpa miezi arubaini na miri. ⁶ Vivyo munyama achifugulwa mulomowe kugomba matusi dzulu ya Mulungu, achirihukana dzinare, eneo arirokala achiishi na varatu vaishio mulunguni. ⁷ Munyama weruhusiwa kuhenda viha na aumini na kuvashinda. Pia, wepewa mamulaka dzulu ya chila mbari, atu, luga na taifa. ⁸ Vosi varioishi duniani vandamng'abudu iye, chila mumng'enga ambaye dzinare karidzaandikpa, kula uumbi wa dunia, kahi za chitabu cha uzima, ambacho ni cha mng'anang'onzi, ambaye wetsinzwa. ⁹ Chikala yoyosi yuna sikiro, na asikize. ¹⁰ Chikala mumng'engawaho yudzihalwa mateka, na kpenye mateka yundanenda. Chikala mumng'engawaho yundaolabgwa kpa panga, kpa panga yundaolabgwa. Uu ni mng'eho wa uhurivu na uvumirivu naimani kpa vavo varioatakatifu. ¹¹ Tena nichona munyama munjine yunadza kula ardini. Wekala yuna pembe mbiri here ng'onzi na achigomba here rihambalatsi. ¹² Weonyesa mamulaka gosi kahi za munyama yuyatu wa kpanza kahi za uwepowe, na kuhenda kahi za dunia na varatu varioishi vachimng'abudu yuyatu munyama wa kpanza, yuyatu ambaye jerahare ridzihola. ¹³ Achihenda miujiza iriyo na nguvu, hata achihenda moho utime duniani kula mulunguni mbere za atu, ¹⁴ na kpa ishara weruhusiwa kuhenda, achivakenga vavo vaishio duniani, achivaambira vatengeneze chigango kpa heshima ya munyama ambaye wekala yudzijeruhiwa kpa panga, ela bado weishi. . ¹⁵ Weruhusiwa kulavya pumuzi kahi za chiratu chigango cha munyama ili chigango chiweze kugomba na kusababisha varatu vosi variokahala kumng'abudu munyama vaolabgwe. ¹⁶ Pia achilazimisha chila mumng'enga, asiye na tamani na mng'enye nguvu, shaha na masikini, huru na mutumng'a, kuhochera alama kahi za mukono wa kulume au kahi za chipaji cha uso(chikomo). ¹⁷ Yekala kaiwezekana kpa chila mutu kuguza wala kugula isihokala ariye na alama ya munyama, na ii ni namba iwakilishayo dzinare. ¹⁸ Ii inahitaji busara. Chikala yoyosi na ufahamu, muriche aweze kuhenda hesabu ya namba ya munyama. Maana ni namba ya chibinadamu. Nambaye ni 666.