¹ Kisha nichilola na nichona M'wana ng'onzi be yudzema dzulu ya wo Murima wa Sayuni, ham'wenga naye, vo atu elifu gana na mirongo mine na ane, venye dzinare na dzina ra Babaye ridzandipka pkenye virangu vya nyuso zao. ² Nami nichisikira sauti kula mulunguni, here sauti ya madzi manji, na here sauti bomu ya chi-pkapkara. Nayo sauti niriyo isikira, ni here abiga vinubi vachibiga vinubi vyao. ³ Vachemba wira musha mbere ya cho chihi cha enzi, na mbere za vo enye uhai ane na azee. Na kakuna hata mum'wenga ariye ariyeweza kudzifundisha wira uwo ela ni vo atu elifu gana m'wenga na mirongo mine na ane vario-kombolwa duniani. ⁴ Vava ni vavo ambavo kavadzi-chafuire na ache, pka kukala ni anaali. Vava ndio vamutuao ye M'wana Ng'onzi hohosi endaho. Vava vegulwa kulaiza pka anadamu, ni malimbuko pka Mulungu na pka ye M'wana Ng'onzi. ⁵ Na kahiza milomoni m'wao kamonekanire ulongo, maana kavana ila yoyosi. ⁶ Kisha nichona malaika munjine achihuruka kahikahi ya ko dzulu ya mulunguni, m'wenye ujmbe mudzo wa kare na kare, avaambire vavo vakalao dzulu za dunia, pka chila taifa, chila kabila na luga na jamaa. ⁷ Achigomba pka sauti bomu, "Mogoheni Mulungu na kumulika, sababu saa ya hukumuye be ifika. Muvoyeni iye hacheye ariyeumba mbingu na itsi na bahari na vyanzo vya madzi. ⁸ Kisha malaika munjine, malaika wahiri achituiriza, achamba, "Udzebgwa, udzebgwa Babeli mubomu, ambaye wevarevya mataifa mataifa gosini divai ya umalaya-we. ⁹ Kisha malaika munjine wa hahu achituiriza, achamba pka sauti bomu, "Mutu yoyosi andiye m'wabudu ye munyama na cho chizuka-che, na kuhochera yo alama pkenye chirangu cha usowe au m'wapke mikononi. ¹⁰ Mutu ye pia yundanwa divai ya hasira ya Mulungu ambayo im'wabgwa bila kutsanganywa na mmadzi, kahiza chikombe cha hasiraye, naye be yundateswa pka moho na chibiriti, mbere za malaika atakatifu na mbere za ye M'wana Ng'onzi. ¹¹ Na mosi wa maumivu gao nikupanda dzulu hata kare na kare na kavana raha usiku na mutsana, vavo vamusuju-diao ye munyama na chizukache, na chila ahocheraye alama ya dzinare. ¹² Haho sasa ndiho henye kungoja na kuvumirira pka atakatifu, vavo vabgwirao sharia za Mulungu na imani ya Jesu Masihi ¹³ Nichisikira sauti kula Mulunguni ichamba, "Andika gaga: Baha afu vafwao kahiza Bwana, hangu vivi sasa. Nijeri yunagomba Roho, vapate koya baada taabu zao, maana mahendo gao be gandatuana navo. ¹⁴ Kisha nichilola na nichona ingu reruhe, na dzulu ya ingu riro, yusegere mum'wenga, mufano wa m'wanadamu, mwenye chiremba cha dahabu kahiza chitswache na mundu mukali mukononi m'wapke. ¹⁵ Na malaika munjine achombola mo hekaluni na achigomba pka sauti bomu, kum'wambira iye ariyesagala ho dzulu ya ingu: Hala mundu wa pkwako na wanze kuvuna, maana saa ya kuvuna ifika, pka kukala mavuno ga yo dunia gadziivwa. ¹⁶ Kisha iye ariyekala yusegere dzulu ya ro ingu, achiu-chiza wo mudu dzulu ya dunia na yo dunia ichivunwa ¹⁷ Kisha malaika munjine achombola kahiza ro hekalu rako mulunguni, iye naye yuna mundu mukali. ¹⁸ Na malaika munjine achombola pkenye yo madhabahu, iye m'wenye uwezo dzulu za moho, naye be achimu-gombera pka sauti bomu iye m'wenye mundu mukali achamba, "Hala wo munduo mukali, ukavune vibutsa vya zo zabibu, maana zo zabibuze be zidziivwa sana. ¹⁹ Bai malaika iye achiu-hirika wo mundu duniani, na achivuna zo zabibu za dunia, na achizitsuha zo zabibu kahiza pipa bomu ra divai ya hasira ya Mulungu. ²⁰ Tsudzo riro re-tikiliswa konze ya wo mudzi, na milatso ichombola kahiza ro pipa mupaka hafumbwaho farasi pka ure wa here maili magana mairi vivi.