¹ Wakati ye Mwana-ng'onzi ariho fugula muhuri wa fungahe, kuchikala na kunyamala ko mulunguni kpa muda wa here nusu saa. ² Kisha nichona malaika afungahe, ve mao mbere za Mulungu, na vachipewa magunda mafungahe. ³ Kisha malaika munjine achidza, yudzibgira bakuli ra dhahabu renye uvumba, wemire ho madhabahuni. Achipewa uvumba munji ili pkamba awomboze ham'wenga na go mavoyo ga atakatifu vosini kahiza yo madhabahu ya dhahabu mbere ya cho chihi cha enzi. ⁴ Mosi wa wo uvumba, ham'wenga na go mavoyo ga vo atakatifu, uchipanda mbere za Mulungu kulaiza mikononi m'wa ye malaika. ⁵ Malaika achihala bakuli ra uvumba na achenjiza moho kula pkenye yo madhabahu, achiutsuha tsini dzululu ya dunia, na kuchombola sauti chi-pkapkara na sauti ya lumete na mu- tetemeko wa itsi. ⁶ Na vo malaika afungahe variokala na magunda mafungahe vachikala be vatayari kugabiga. ⁷ Malaika wa pkanza achibiga ro gundare, na kuchombola mvula ya mawe na moho uriotsanganyikana na mulatso, Vichi-tsuhiwa hotsi ili pkamba murongo wa m'wenga kahiza tahu wa dunia ushe, na moho uchitsoma mihi na nyasi zosini. ⁸ Malaika wa hiri achibiga ro gundare, na utu here murima mubomu, urio-kala unaaka moho uchitsuhiwa baharini, na sehemu m'wenga kahiza tahu ya yo bahari ichikala mulatso. ⁹ Sehemu m'wenga kahiza tahu ya anyama va baharini vachifwa, na sehemu m'wenga ya tahu ya zo meli zichibanambwa. ¹⁰ Malaika wa hahu achibiga ro gundare, na nyenyezi bomu ichibgwa kula ko mulunguni, ichaka here taa, na ichibgwerera sehemu m'wenga kahiza tahu ya yo miho na visima vya madzi. ¹¹ Na dzina ra yo nyenyezi ni Pakanga. Na sehemu m'wenga kahiza tahu ya go madzi gachikala utsungu na atu anji vachifwa. ¹² Malaika wa ine naye achibiga ro gundare, sehemu m'wenga kahiza tahu ya wo mulangaza wa dzua na wo mulangaza wa m'wezi, na sehemu m'wenga ya tahu ya zo nyenyezi, ili pkamba sehemu m'wenga ya tahu ya mutsana be ikale chiza na wo usiku dza vivyo. ¹³ Kisha nichilola, na nichisikira nzuzi ahurukaye kahi kahi ya mulungu, acheha pka sauti bomu, "Olewao, Olewao, Olewao vavo vakalao dzulu za dunia! Pka sababu ya sauti za gunda zidzizosala za malaika ahahu, va rio hehi kuzibiga."