¹ Baada ya gaga neona malaika anne vadzema kpenye pembenne za dunia, vadzizulia peponne za tsi kpa nguvu ili kukala hasikale na peho zivumazo kahi za tsi, dzulu ya bahari wala dzulu ya muhi wowosi. ² Nichona malaika munjine achidza kula maomborero ga dzua, ariyekala na muhuri wa Mulungu ariyehai. Achirira kpa sauti bomu kpa malaika anne ambavo vepewa rruhusa ya kuiduru tsi na bahari: ³ " Musiiduru tsi, bahari, wala mihi mupaka hundihokala hudziika muhuri kahi za vipaji vya vitswa vya ahumiki va Mulungu wehu. " ⁴ Nichisikira idadi ya varratu varioenjizwa muhuri: 144,000, ambavo veenjizwa muhuri kula chila lukolo lwa atu va Israeli: ⁵ 12,000 kula kahi za lukolo lwa Yuda veenjizwa muhuri, 12,000 kula lukolo lwa Rubini, 12,000 kula kahi za lukolo lwa Gadi. ⁶ 12,000 kula kahi za lukolo lwa Asheri, 12,000 kula kahi za lukolo lwa Naftali, 12,000 kula kahi za lukolo lwa Manase. ⁷ 12,000 kula lukolo lwa Simoni, 12,000 kula lukolo lwa Lawi, 12,000 kula lukolo lwa Isakari, ⁸ 12,000 kula lukolo lwa Zebuloni, 12,000 kula lukolo lwa Yusufu, na 12,000 kula lukolo lwa Benjamini veenjizwa muhuri. ⁹ Baada ya mambo gaga nelola, na kpekala na kundi bomu ambaro kakuna mutu andeweza kuritala-kula chila taifa, lukolo, jamaa, na luga-vadzema mbere za chihi cha enzi na mbere za mng'anang'onzi. Vekala vavala zurungi reruhe na vana mavungo ga mitende mikononi mng'ao, ¹⁰ na vekala vacheha kpa sauti ya dzulu: " Wokofu ni kpa Mulungu ambaye yudzisagala kahi za chihi cha enzi, na kpa mng'anang'onzi! " ¹¹ Malaika vosi variokal vadzema kuzunguluka chihi cha enzi na kuvazunguluka varatu atumia hamng'enga na viumbe venye uhai anne, vachizama tsi aridini na vachiika masura gao dzulu ya aridi mbere za chihi cha enzi na vachimng'abudu Mulungu, ¹² vachamba, " Amina! Nguma, utukufu, hekima, shukurani, heshima, uwezo na nguvu vikale kpa Mulungu wehu kare na kare! Amina! " ¹³ Kisha mumng'enga wa varatu atumia achinuza, " Vano ni aniani vadziovala zurungi reruhe, na valahi? " ¹⁴ Nichimng'amba, " Bwana mukubwa, unamanya uwe, " na achinambira, " Vava ni varatu variola kahi za diki bomu. Vadzifula mazurungi gao na kugahenda meruhe kpa damu ya mng'anang'onzi. ¹⁵ Kpa sababu ii, vambere za chihi cha enzi cha Mulungu, na vanamng'abudu iye usiku na mutsana kahi za hekalure. Iye adziyesagala dzuluya chihi cha enzi yundasambaza hemare dzulu yao. ¹⁶ Kavandaona nzala kaheri, wala chihu kaheri. Dzua karindavocha, wala dzoho ra kocha. ¹⁷ Kpakukala mng'anang'onzi ariye kahi za chihi cha enzi ndakala muchungaji wao, na ndavalongoza kahi za chemichemi ya madzi ga uzima, na Mulungu ndafuta chila tsozi kahi za matso gao. "