¹ Nichilola wakati mng'anang'onzi arihofugula mumng'enga kahi za yo mihuri mifungahe, nichisikira mumng'enga wa vo viumbe anne venye uhai achamba kpa sauti ya kuhalana na chikpakpara, " Nzoo! " ² Nichilola na hekala na farasi mng'eruhe! Ariyemupanda wekala na zinje(upinde) na achipewa taji. Weombola here mushindi ashindaye ili ashinde. ³ Haho mng'anang'onzi arihofugula muhuri wahiri, nichisikira chumbe mng'enye uhai wahiri achamba, " Nzo! " ⁴ Kisha farasi munjine achombola - mutune here moho. Ariyemupanda wehewa ruhusa ya kuusa amani duniani, ili atu vatsinzane. Yuyu ariyemupanda wehewa panga bomu. ⁵ Mng'anang'onzi arihofugula uratu muhuri wahahu, nichisikira chumbe mng'enye uhai wahahu achamba, " Nzo! " Nichona farasi mng'eruhe, na ariyemupanda yuna chipimo mng'akpe mikononi. ⁶ Nichisikira sauti iriyoonekana kukala ya mumng'enga wa varatu venye uhai ichamba, " Chibaba cha ngano kpa dinari mng'enga na vibaba vihahu vya shayiri kpa dinari mng'enga. Ela usigaduru mafuha na divai. " ⁷ Mng'anang'onzi arihofugula muhuri wanne, nesikira sauti ya chumbe mng'enye uhai wanne ichamba, " Nzo! " ⁸ Kisha nichona farasi wa ivuivu. Ariyemupanda dzinare weehwa mauti, na kuzimu were inamutua. Vepewa mamulaka dzulu ya robo ya tsi, kolaga kpa panga, kpa nzala na ukongo na kpa anyama va tsakani kahi za tsi. ⁹ Mng'anang'onzi arihofugula muhuri wa tsano neona tsini ya madabahu maroho ga varatu variolabgwa kpa sababu ya neno ra Mulungu na kula na ushuhuda varioubgwira tototo. ¹⁰ Vachirira vyenye vachamba, " Paka rini, mutawala wa vyosi, mutakatifu na mujeri, undahukumu vakalao dzulu ya tsi, na kurihiza chisasi cha mulatso wehu? " ¹¹ Kisha chila mumng'enga wehewa zurungi reruhe na vachambwa kukala vanapaswa kutariza chidogo ta indihotimira hesabu sawa na ahumiki anzao na nduguzao vachiche na vachilume indihotimira ambao vandaolabgwa, here dzaviratu varivyoolabgwa vavo. ¹² Mng'anang'onzi arihofugula muhuri wa handahu, nelola na hekala na tetemeko bomu ra tsi. Dzua rekal reru pii here gunia ra singa, na mng'ezi wosi uchikala here mulatso. ¹³ Nyenyezi za mulunguni zichibgwa hotsi here muhi upakasavyo matundage uchitukuswa ni kusi. ¹⁴ Anga yeangamika here gombo ririroviringishwa. Chila murima na chisiwa vyetsamishwa hatuhe. ¹⁵ Kisha afwalume va ntsi na atu vamanyikanao, na majemedari, mashaha, enye nguvu na chila mumng'enga ariye muhumng'a na huru, vachidzifitsa mapangoni na kahi za miamba ya mirima. ¹⁶ Vachiyambira mirima na mawe, " Hubgwerereni, hufitseni husonewe ni usowe ye asagalaye kpenye chihi cha enzi na komboza hasira ya mng'anang'onzi. ¹⁷ Kpakukala siku yao bomu ya mateso ihehi na nani awezaye kuivumirira? "