¹ Kisha nichona kahi za mukono wa kulume wa yuyatu ariyekala yudzisagala kahi za chihi cha enzi, ritabu ririroandikpa mbere na nyuma, na rekala ridzenjizwa mihuri mifungahe. ² Nemona malaika ariye na nguvu achihubiri kpa sauti bomu, " Nani asitahiliye kurifugula ritabu na kuivunza mihuriye? " ³ Kakuna mutu mulunguni wala duniani wala tsini ya dunia ariyeweza kurifugula wala kurisoma. ⁴ Nerira kpa utsungu kpakukala kakupatikanire yoyosi ariyesitahili kurifugula wala kurisoma. ⁵ Ela mumng'enga wa atumia achinambira, " Usirire. Lola! Simba wa kabila ra Yuda, sina ra Daudi, yudzishinda, na yunaweza kurifugula na mihuriye mifungahe. " ⁶ Kahi za chihi cha enzi na viumbevenye uhai anne na kahi za atumia, neona mng'anang'onzi yudzema, achonekana here ariyeolabgwa. Wekala na pembe fungahe na matso mafungahe-zizi ni roho fungahe za Mulungu zirizohumng'a duniani kosi. ⁷ Achenda achirihala kula kahi za mukono wa kulume wa yuyatu ariyesagala kahi za chihi cha enzi. ⁸ Arihohala ritabu, viumbe venye uhai anne na atumia shirini na anne vachizama ra tsi mbere za mng'anang'onzi. Chila mumng'enga wekala na chinubi na bakuli ra dahabu ririroodzala uvumba ambago ni mavoyo ga atakatifu va Mulungu. ⁹ Veemba wira musha: " Unasitahili kurihala ritabu na kuifugula mihuriye. Kpakukala wetsinzwa, na kpa damuyo uchimugulira Mulungu atu va chila kabila, luga, jamaa na taifa. ¹⁰ Uchivahenda ufwalume na makuhani kpaajili ya kumuhumikira Mulungu wehu, navo vandatawala dzulu ya tsi. " ¹¹ Kisha nelola na nichisikira sauti ya malaika anji variochizunguluka chihi cha enzi na viumbe venye uhai na atumia. Idadi yao yekala kumi maalufu kpa kumi maalufu na maalufu kpa maalufu. ¹² Vachamba kpa sauti bomu, " Nasitahili mng'anang'onzi ambaye yudzitsinzwa kuhochera uwezo, ushaha,hekima, nguvu, heshima, utukufu na nguma. " ¹⁴ Viumbe venye uhai anne vachamba, " Amina! " Na atumia vachizama tsi na kpabudu.