¹ Pka malaika va kanisa ra Saudi andika: ' Mautu ga yuyatu abgwiriraye ziratu roho fungahe za Mulungu na nyenyezi fungahe. ' " Nagamaya mahendogo. Una nguma ya kukala umoyo, ela wefwa. ² Lamuka ugaimarishe garigosala, ela gahehi na kufwa, kpakukala sigaonere mahendogo gadzitimira matsoni kpa Mulungu wangu. ³ Kpa vivyo kumbukira, garatu urigogahochera na kugasikira, gatii na utubu. Ela usiholamuka nindadza here mng'evi, na kundamanya ni saa ngahi nindihokudzirira. ⁴ Ela kuna madczina machache ga atu kahi za Sardi ambavo kavachafuire nguo zao. Vandatsembera hamng'enga nami vachikala vavala nguo nyeruhe kpa sababu vanasitahili. ⁵ Iye andeshinda yundavwikpa mavazi meruhe na sindaweza kurifuta dzinare kombola kahi za chitgabu cha uzima; na nindarihadza dzinare mbere za baba, na mbere za malaika. ⁶ Uchikala na sikiro, sikiza Roho agaambiravyo makanisa. " ⁷ Kpa malaika wa kanisa ra Philadefia andika: maneno ga ariye mutakatifu na jeri, ariye na funguo za Daudi, nikufugula na kakuna afungaye, nikufunga na kakuna awezaye kufugula. ⁸ Namanya udzirohenda. Lola, nidzikpikira mbereyo muryango uriofugulwa ambao kakuna awezaye kuufunga. Namanya una nguvu chache, ela udcziritii neno rangu na kudzarikana dzina rangu. ⁹ Lola! Vosi vario va sinagogi ra shetani, varatu vaambao vavo ni Ayahudi na kumbe sevo ta vanakeenga, nindavahenda vadze vasujudu mbere za magulugo, na vandamanya kukala nekuhenza. ¹⁰ Kpakukala wetunza amuri yangu kpa uvumirivu na utabiti, nindakurinda pia kahi za saayo ya kujezwa ambayo inadza kahi za urimng'engu wosi, kuvajeza varatu vosi vaishio kahi za ntsi. ¹¹ Nadza upesi. Bgwirira sana chiratu urichonacho ili asikaleho mutu wa kuihala tajiyo. ¹² Nindzamuhenda iye andeshinda kukala nguzo kahi za hekalu ra Mulungu wangu, na kandaombola konze kamare. Nindarandika kpakpe dzina ra Mulungu wangu, dzina ra mudzi wa Mulungu wangu (Jerusalemu mbisha, utimao tsi kula dzulu mulunguni kpa Mulungu wangu) na dzina rangu risha. ¹³ Iye ariye na sikiro, na asikire ambago Roho yunagomba kpa makanisa. ' ¹⁴ " Kpa malaika va kanisara Laodikia andika: ' Manenoge ariye Amina, wa kukuluhirwa na shudiani mng'aminifu, mutawali dzulu ya uumbaji wa Mulungu. ¹⁵ Namanya udzichohenda, na kukala uwe kupeeho wala moho, natamani kukala undekala peho ama moho! ¹⁶ Vivyo, kpa sababu uwe uloholoho, kumoho wala peho, nindakpahika wombole kanwani mng'angu. ¹⁷ Kpakukala unaamba, " Mino ni shaha, nidzikala na mali nyinji, na simala chochosi. " Ela kumanya kukala uwe be kunamana kamare, uwakusononekerwa, masikini, chipofu na huhu. ¹⁸ Sikiza ushauri wangu: Gula kpangu dahabu iriyosafishwa kpa moho ili ukale shaha, na nguo nyeruhe za kung'alang'ala ili udzivishe mng'enye na usonyese waibu wa huhuro na mafuha ga kudzihaka kahi za matsogo upate kona. ¹⁹ Chila nimuhenzaye, namulongoza na kumufundisha here imupasavyo kuishi; kpa vivyo, kala mujeri na utubu. ²⁰ Lola naema muryangoni na ninabisha. Yoyosi asikiraye sauti yangu na kufugula muryango, nindadza na kpenjira mng'akpe nyumbani, na kurya chakurya naye na iye hamng'enga nami. ²¹ Iye ashindaye, nindamupa hachi ya kusagala hamng'enga nami dzulu ya chihi changu cha enzi, here dzaviratu mimi nirivyoshinda na kusagala hamng'enga na Baba dzulu za chihiche cha enzi. ²² Iye ariye na sikiro, naasikize chiratu ambacho Roho nagaambira makanisa. "