¹ " Kpa malaika va kanisa ra Efeso andika: ' Gaga ni maneno ga yuyatu abgwiririraye ziratu nyenyezi fungahe kahi za mukonowe wa kulume. Iye atsemberaye kahi za vinara vya dahabu vya taa fungahe naamba vivi, ² " Namanya ambachoudzichihenda na bidiiyo ya na uvumirivuwo tabiti, na kukala kuweza kuhusiana navo vario ai, na udzivajeza vosi vadzehao kukala ahumiki na kumbe sevo, na vadzonekana kukala alongo. ³ Namanya una subira na uvumirivu, na udzitsupira manji kpa sababu ya dzina rangu, na kudzatsoka bado. ⁴ Ela riri ndiro nirironaro dzuluyo, udziuricha uhenzoo wa kpanza. ⁵ Kpa vivyo kumbukira urihobgwa, ukatubu na kuhenda mahendo urigohenda hangu mng'anzo. Usihotubu, nindadza kpao na kuchusa chinaracho kula hauhe. ⁶ Ela uwe una riri, kugenzi garatu abago Anikolai vadzigahenda, ambago hata mimi sigenzi. ⁷ Chikala una sikiro, sikiza garatu ambago Roho yunagaambira makanisa. Na kpa iye ashindaye nindamupa chibali cha kurya kula kpa muhi wa uzima urio kahi za Paradiso ya Mulungu. ⁸ " Kpa malaika va kanisa ra Smirna andika: ' Gaga ni maneno ga yuyatu abaye ni mng'anzo na mng'isho ambaye wefwa na kukala muzima kaheri: ⁹ " Nagamanya matesogo na umasikinio (ela uwe u shaha), na ulongo wa varatu vadzehao ni ayahudi (ela sevo-vavo ni sinagogi ra Shetani). ¹⁰ Usogohe mateso gandigokupata. Lola! Ibilisi namala kuvatsuha baadi yenu jela ili mupate kujezwa, na mundateseka kpa siku kumi. Kalani aaminifu ta kufwa, na nindavapa taji ya uzima. ¹¹ Chikala una sikiro, sikiza Roho agaambiravyo makanisa. Iye ashindaye kandapata madara ga mauti ya hiri. ' ¹² " Kpa malaika va kanisa ra Pagamo andika: ' Gaga ndigo agombago iye ariye na upanga mukali, urio na makali kpiri. ¹³ " Namanya hatu uishiho - hatu chiriho chihi cha enzi cha shetani. Ta vivyo uwe unaribgwira sana dzina rangu, na kuikanire imaniyo iriyo kpangu, ta sikuziratu za Antipasi shahidi wangu, mng'aminifu wangu, aryeolabgwa kahi zenu, haho ndiho Shetani yunaishi. ¹⁴ Ela nina mambo machache dzuluyo: unavo kuko atu vabgwirao mafundisho ga Balaamu, iye ariyemufundisha Balaki kpika vikpazo mbere za ana va Iziraeli, ili varye vyakurya virivyoombozwa sadaka kpa milungu na kuzini. ¹⁵ Kahi za hali iyo iyo, hata uwe unavo baadi yao vabgwirao mafundisho ga Anikolai. ¹⁶ Bai tubu! Na usihoheenda vivyo, nadza upesi, na nidzaheenda viha dzulu yao kpa upanga wombolao mulomoni mng'angu. ¹⁷ Chikala una sikiro, sikiza Roho achambiracho makanisa. Iye ashindaye, nindamupa baadi ya mana iriyofitswa, pia nindamupa dziwe reruhe ririroandikpa dzina risha dzuluye, dzina ambaro kakuna arimanyaye isihokala iye arihocheraye. ' ¹⁸ " Kpa malaika va kanisa ra Tiatira andika: " Gaga ndo mane ga mng'ana wa Mulungu, iye ariye na matso here mng'enge wa moho, na nyayo here shaba iriyosuguiwa sana: ¹⁹ " Namaya ambacho udzihenda - uhenzoo na imani na huduma na uvumirivuwo tabiti, na kukala chiratu urichohenda vivi kaibuni ni zaidi ya chiratu uchohenda mng'anzo. ²⁰ Ela ninarir dzuluyo: unamuvumirira mng'anamuche Jerebeli adzehaye mng'enye mulombi muche. Kpa mafundishoge, yunavatsuha ahumiki vangu kuzini na kurya chakurya chirichoombozwa sadaka kpa vigango. ²¹ Nemupa muda wa kutubu, ela katayari kuutubira uovuwe. ²² Lola! Nindamupa kpenye chitanda cha maradi, na varatu vahendao usherati naye kpenye mateso makali, vinjinevyo vatubu kpa arichohenda. ²³ Nindavabiga anae vafwe na makanisa gosi vandamanya kukala mimi ndimi nigatsaguzaye maazo na tamaa. Nindamupa chila mumng'enga weenu kadiri ya mahendoge. ²⁴ Ela kpa baadi yenu muriobaki kahi za Tiatira, kpa varatu vosi musiobgwira fundisho riri, na musiomanya chiratu ambacho baadi nikpeha mafundisho ga Shetani, naamba kpenu, ' Sindaika dzulu yenu muzigo wowosi. ' ²⁵ Kpa dzambo rorosi, lazima mukale imara mupaka nindihokudza. ²⁶ Yeyosi ashhindaye na kuhenda chiratu nirichohenda mupaka mng'isho, kpakpe iye nindamupa mamulaka dzulu ya mataifa. ²⁷ ' Yundavatawala kpa fimbo ya chuma, here mabakuli ga ulungo, yundavavunza vipande vipande. ' ²⁸ Here nirivyohochera kulakpa baba, nindamupa pia nyenyezi ya madzacha. ²⁹ Uchikala una sikiro, sikiza chiratu ambacho Roho yunavaambira makanisa. '