¹ Nichisikira sauti bomu icheha kula kpenye hatu hatakatifu na ichamba kpa varatu malaika afungahe, "Nenda ukamng'age dzulu ya dunia mabakuli mafungahe ga hasira ya Mulungu. " ² Malaika wakpanza wepkenda mng'aga bakulire kahi za dunia, majeraha mai genye maumivu makali gekudza kpa atu venye alama ya ye munyama, kpa varatu varioabudu vigangovye. ³ Malaika wa hiri wemng'aga bakulire kahi za bahari; ichikala here mulatso wa mutu ariyefwa, na chila chumbe chirichohai baharini chefwa. ⁴ Malaika wa hahu achimng'aga bakulire kahi za myuho na chemichemi za madzi; zichikala milasto. ⁵ Nichisikira malaika wa madzi achamba, " Uwe umuhtakatifu uriyeko na uriyekalako. Mutakatifu-kpa sababu udzizireha hukumu zizi. ⁶ Kpa sababu vemng'aga mulatso wa aumini na alombi, udzivapa vavo kunwa mulatso, ndo vasitahilicho. " ⁷ Nichisikiramadabahu ichijibu, " Ndevyo! Bwana Mulungu atawalaye dzulu ya vyosi, hukumuzo ni jeri na za hachi. " ⁸ Malaika wanne achimng'aga kombola kpenye bakulire dzulu y dzua na richipewa ruhusa ya kocha atu kpa moho. ⁹ Veochwa kpa dzoho ritisharo, na vachirikufuru neno ra Mulungu, mng'enye nguvu dzulu ya mabigo gosi. Kavatubire wala kavamupire iye utukufu. ¹⁰ Malaika wa tsano achimng'aga kula kpenye bakulire kahi za chihi cha enzi cha munyama, na dziza richifunika ufwalumewe. Vesaga meno kahi za maumivu makali. ¹¹ Vachimuhukana Mulungu wa mulunguni kpa sababu ya maumivu gao na majeraha gao, na kavatubire kpa chiratu varichochihenda. ¹² Malaika wa tandahu wemng'aga kombola kpenye bakulire kahi za muho mubomu, Frati, na madzige gachoma ili aweze kutengeneza njira kpa afwalume vandiokudza kombola maomborero ga dzua. ¹³ Nichona roho tahu kolo zirizoonekana here vyulwa vyombolavyo konze ya mulomo wa riratu rihambalatsi, yuyatu munyama, na yuyatu mulombi wa ulongo. ¹⁴ Ni roho za nyagu zihendazo miujiza na ishara. Vekala vachihenda kpa afwalume va dunia yos ili vaweze kuvakusanya hamng'enga kpa viha kahi za siku bomu ya Mulungu,atawalaye dzulu ya vyosi. ¹⁵ ("Lola! Ninadza here mng'evi! Baha yuyatu adumuye kahi za kuchesa, atsunzaye mavazige ili asiweze kpenda konze ko yuhuhu na kona aibuye. ") ¹⁶ Vevareha hamng'enga kahi za sehemu iriyoehwa kpa Chiebrania Amagedoni. ¹⁷ Malaika wa fungahe wemng'aga kombola kpenye bakulire kahi za anga. Kisha sauti bomu ichisikirika kombola hatakatifu na kombola kpenye chihi cha enzi, ichab a, "Idzigoma." ¹⁸ Kpekala na mienge ya mng'angaza wa chikpakpara, ngurumo, visindo vya chikpakpara, na tetemeko bomu ra tsi ambaro karidzawahi konekana duniani hangu anadamu vakaleko, riro ni tetemeko bomu vyenye. ¹⁹ Mudzi mubomu wegavika kahi za sehemu tahu, na midzi ya mataifa ichibgwa. Kisha Mulungu achimukumbukiza Babeli mubomu, na achiupa mudziuwo chikombe chirichokala chidzodzala divai kombola kpenye hasiraye iriyo kali. ²⁰ Chila chisiwa chichangamika na mirima kayonekanire kaheri. ²¹ Mvula bomu ya mawe, ichikala na uziho wa talanta, ichidima kula mulunguni dzulu ya atu, na vachimulani Mulungu kpa mabigo ga mvula ya mawe kpa sababu riratu bigo rekala baya sana.