¹ Mum'wenga wa vavo malaika afungahe wekala yuna vikombe mafungahe achinambira, "Nzoo, nindakonyesa hukumu ya ye malaya mubomu akalaye dzulu za madzi manji. ² Ambaye vo afalume va dunia vadzi-zinga naye, na vo kalao dzulu za itsi vadzi-revywa pka uchi wa umalayawe. ³ Ye malaika achinihala kahiza Roho hata ko nyika, nichona m'wanamuche, yusegere dzulu za munyama mutune sana, yudzodzala madzina ga makufuru, yuna vitswa vifungahe na pembe kumi. ⁴ Na ye m'wanamuche iye were yuvipka nguo za zambarau na tune, yudzi-pambwa pka dahabu na mawe ga bei, na lulu. Naye wekala yubgwira chikombe cha dahabu mo mukononi, chidzodzala matsukizo na uchafu wa usharatiwe. ⁵ Na kahiza cho chirangu cha usowe, were ridzandipka dzina ra siri, "BABELI MUBOMU, MAME WA MALAYA NA MATSUKIZO GA ITSI." ⁶ Kisha nichimona ye m'wanamuche, yudzirea pka wo mulatso wa atakatifu, na pka wo mulatso wa mashahidi va Jesu. Nami niriho-mona be neangalazika vibomu. ⁷ Ela iye malaika achinambira, "Pka noni unashangaa? Ninda-pkeleza siri ya yuyu m'wanamuche na iye munyama adziye mupanda, m'wenye vyo vitwa vifungahe na zo pembe kumi. ⁸ Ye munyama uriye mona, be wekalako, naye kako kaheri, ela yutayari apande kula ko kuzimu naye ende pkenye uharibifu. Na vavo vakalao dzulu za itsi, ambao madzina gao be kaga-aandikirwe kahiza chitabu cha uzima hangu pkipka musinji wa urim'wengu, vanda shangaa vachimona ye munyama, kukala iye wekalako, naye kako kaheri, naye yukudza. ⁹ Haho ndiho henye akili za enye hekima. Vivyo vitswa vifungahe be ni mirima mifungahe, asagarirayo iye m'wanamuche. ¹⁰ Nayo mirima pia ni afalume afungahe. Atsano vebgwa made, na mum'wenga be kaho, na munjine kadzambwe kudza. Naye achidza be inabidi akale muda mufuhi tu. ¹¹ Ye munyama ariyekalako ela sasa kaho, iye pia ni mutawala wa ine, ela ni mum'wenga wa vavo afungahe, na iye naye wenda pkenye uharibifu. ¹² Na zo pembe kumi urizo ziona ni afalume kumi ambao kavadza hochera ufalume, ela navo vanda hochera mamulaka pka muda wa saa m'wenga ham'wenga na iye munyama. ¹³ Vava vana mupango mum'wenga, navo vandamupa nguvu zao na mamulaka iye munyama. ¹⁴ Navo vandahenda viha na iye M'wana Ng'onzi, na iye M'wana-Ng'onzi be yunda-vashinda, pka kukala iye ni Bwana wa Mabwana na Mufalume wa Afalume, na vavo vario ham'wenga naye, ndivo vario-ehewa na atsagulwa na aaminifu. ¹⁵ Kisha iye malaika be achinambira, "Gago madzi udzigo gaona, haho asagalaye iye malaya, be ni atu, makutano, mataifa na luga. ¹⁶ Na zizo pembe kumi udzizo ziona, na iye munyama, vavo vanda-mutsukirirwa iye malaya, navo be vandamuhenda chia na huhu, vandaurya wo m'wiriwe na kisha vawoche pka moho. ¹⁷ Maana ye Mulungu yudzika mioyoni m'wao kutsukula kusudi na shauri m'wenga na kumupa ye munyama ufalume wao hadi maneno ga Mulungu gatimire. ¹⁸ Na iye mng'anamuche uriye mona, be ni uwo mudzi mubomu utawalao dzulu za falume zosi za dunia.