¹ Lakini ye Sauli, achizidi kutisha na plaza kuvaolaga go anafunzi va Jesu, achimutua ye Kuhani Mubomu. ² Achimu-voya ye Kuhani Mubomu amupe barua za pkenda Dameski, zirizo andipka pka go masinagogi, ili achona atu va Njira ii ya imani, alume pka ache, avafunge na kuvareha Jerusalem. ³ Hata arihokala yumo njirani yuna nenda, na yunakaribia Dameski, gafula achimiripka kosi kosi ni mulangaza kula mulunguni. ⁴ Sauli achibgwa hotsi, na achisikira sauti ichim'wambira, "Sauli, Sauli, mbona unani- tsukiza? ⁵ Sauli achamba, "U ani we Bwana? Naye achamba, " Mimi ndimi Jesu unitsukizaye uwe. ⁶ Ela ema, wenjira mo mudzini, nawe udaambirwa gakupasago kuhenda. ⁷ Na vo atu vario pkenda ham'wenga naye, navo veema to na kunyamala zi, be sikira yo sauti, na vasone mutu. ⁸ Sauli achuka kula hotsi, na ariho fugula matso kaonere chitu, vachimubgwira mukono na vachimureha m'paka Dameski. ⁹ Achikala siku tahu kaona, karya wala kanwa. ¹⁰ Bai arihokala yuko Dameski, m'wanafunzi dzinare ni Anania. Bwana achim'wambira kahiza maono, "Anania!" Achamba, "Simino hano Bwana." ¹¹ Bwana achim'wambira, ema na wende m'paka njira yehewayo Nyofu, ukauze nyumba ya Juda, mutu ae-hewaye Sauli wa Tarso, maana saa ii be yunavoya. ¹² Na iye Sauli kahiza maono, yudzimona mutu dzinare ni Anania, achenjira na kum'wikira mikono dzuluye, apate Mona kaheri." ¹³ Lakini Anania achijibu, "Bwana nidzisikira habari za mutu yuyu pka atu anji, kukala, yudzihenda mai pka atakatifu va kuko Jerusalemu. ¹⁴ Haha be yuna mamulaka kula pka abomu va makuhani, avafunge atu vosini va pkehao uwe Bwana pka dzinaro. ¹⁵ Ela Bwana achim'wambira, "Uwe nenda tu, pka kukala, mutu yuyu be ni chombo changu nidzicho-chitsagula Mimi, arihale Dzina rangu mbere za atu va Mataifa, Afalume, na pka ana va Israeli. ¹⁶ Maana ninda-monyesa garigo manji, gandigo mupasa kuteswa pka ajili ya Dzina rangu. ¹⁷ Anania achihala hatua achenda,achenjira mo nyumbani, achi-m'wikira mikono achamba, "Ndugu yangu Sauli, Bwana yudzinihuma, iye Jesu, iye ariye kombo-rera ko njirani uriho kala unadza, upate kuona kaheri, na ukadzazwe na Roho Mutakatifu. ¹⁸ Mara gafula, vichibgwa vitu kula matsoni m'wapke, vitu here makoko, achipata kuona, achema,na achibatizwa. ¹⁹ Achirya chakurya, na kupata nguvu. Na ye Sauli achakala ko Dameski ham'wenga na vo anafunzi pka siku kadhaa. ²⁰ Mara achimuhubiri Jesu kahiza go masinagogi, kukala iye Jesu be ni m'wana wa Mulungu. ²¹ Na atu vosini vachi shangaa, vachamba, "Jee seye yuno ariye vabananga atu,various eha Dzina rino ko Jerusalemu? Na haha were yukudza pka kusudi riro, avafunge na kuvahirika pka abomu va makuhani? ²² Na Sauli achizidi kukala hodari, achi-vaenjiza hofu Ayahudi variokala Dameski, achithibitisha kukala Jesu ndiye Masihi. ²³ Baada ya Siku nyinji kuchira, vachihenda nzama ili vamolage. ²⁴ Ela yo njama yao be ichi-manyikana naye Sauli. Vachi-motea no miryangoni mutsana na usiku ili vapate kuomolaga. ²⁵ Ela vo anafunzie vachi-muhala na usiku, vachimu teremusha ukutani achikala yundani ya kahu. ²⁶ Na Sauli arihofika Jerusalemu, wejeza kudziunga na anafunzi navo vachimogoha vosini, vasamini kukala iye naye be no m'wanafunzi. ²⁷ Lakini Barnaba achimuhala, achimuhirika pka mitume, achivaeleza jinsi arivyomona Bwana ko njirani, na kukala wegomba naye Bwana, na jinsi arivyo hubiri pka ushujaa ko Dameski pka Dzina ra Jesu. ²⁸ Naye Sauli achikala ham'wenga na vo mitume ko Jerusalemu, achenjira na kombola ham'wenga na vo. ²⁹ Achihubiri pka dzina ra Jesu pka ushujaa munji, achinena na kuhojiana na Ayahudi va Chiyunani. Na vo pia vachijeza kumolaga. ³⁰ Ela vo ndugu variho pata habari, vachi-muhala mupaka Kaisaria, vachimu-hirika ende Tarso. ³¹ Bai kanisa richipata raha kahiza Uyahudi wosini na Galilaya na Samaria, na richi-dzebgwa, richenderera na konjezeka kahiza hofu ya Mulungu na faraja ya Roho Mutakatifu. ³² Hata Petero arihokala yuna-zunguluka zunguluka pande zosini, achivatere-mukira atakatifu variokala vanaishi Lida. ³³ Achimona mutu mu'mwenga kuko, dzinare ni Ainea, mutu yuyu were yukala chitandani pka miaka minane, maana were yuholoza. ³⁴ Petero achim'wambira, Ainea, Jesu Masihi yuna kuhoza, uka, udzihandikire m'wenye, naye Ainea achuka. ³⁵ Na atu vosini variokala Lida na Sharoni vachimona na vachi- mugalukira Bwana. ³⁶ Na m'wanafunzi mum'wenga wekalako Yafa, dzinare no Tabitha, (tafusiriye ni Dorikasi ).Yuyu m'wanamuche were yudzodzala mahendo madzo na zawadi arizokala yunao-mboza pka masikini. ³⁷ Kahiza siku zizo achilum'wa, na achifwa, na variho marigiza kumojesa, vachimulaz dzulu gorofani. ³⁸ Na pka kukala wo mudzi wa Lida were u hehi na Yafa, na vo anafunzi vere vasikira kukala Petero yu kuko, vachihuma atu airi va mutue Petero, kumusihi nakum'wambira, "Usichelewe kudza pkehu. ³⁹ Petero weuka na achibgwirana navo. Arihofika, vachimuhirika dzulu gorofani, na go magungu gosini be gachema hehi naye, gadzi -muzuguluka kuno gana rira, na kumonyesa zo nguo arizo-zishona ye Dorikasi wakati ni muzima. ⁴⁰ Bai Petero achivaomboza konze vosini, achibiga magoti, achivoya, kisha achiloza pka ye maiti, achamba, "Tabitha, uka. Naye maiti achifugula Mateo, na arihomona ni Petero, achi-dzunula na kusagala. ⁴¹ Petero achimupa mukono, achimunula, na baada ya kuvaeha vo atakatifu na magungu, achim'wika mbere zao, hali ni muzima. ⁴² Habari zizi be zichimanyikana kahiza mudzi muzima wa Yafa, na atu anji be vachim'wamini Bwana. ⁴³ Bai ye Petero achikala siku nyinji chidogo kuko Yafa, nyumbani kpa mutu mum'wenga, dzinare ni Simioni, mutengezaji wa chingo.