¹ Na Sauli were yunaona ni tototo ko kufwapke ye Stefano. Bai Siku iyo kuchombola shida bomu ya mateso pka ro Manisa kuko Jerusalemu. Atu vosini vachi-tsamukana kahiza itsi ya Uyahudi na Samaria, isihokala vavo mitume tu hacheye. ² Atu aeri vachimuzika Stefano, na vachimuhendera sherehe bomu sana ya go mazishi. ³ Ela iye Sauli be achiri-bananga ro Manisa, weenjira nyumba pka nyumba na kuburuta atu, ache pka alume na kuva tsuha jela. ⁴ Lakini vavo atu vario tawanyika, vepkenda kuko na kuko vachihubiri neno ra Mulungu. ⁵ Filipu weteremuka na achenjira mudzi wa Samaria na achivahubiria Jesu Masihi. ⁶ Na makundi mabomu ga atu pka nia m'wenga, vachisikiza go maneno garigo nenwa ni iye Filipu na kona zo ishara arizokala yuna zihenda. ⁷ Pka kukala pepo achafu veombola pka atu anji variokala vadzi golomopka, vachi rira pka sauti bomu, na atu anji vario kala va holoza na vidende vehola. Na kuchikala na furaha bomu kahiza mudzi uwo. ⁹ Na mutu mum'wenga kahiza uwo mudzi wa Samaria, dzinare no Simeoni, ambaye ho m'wanzo be were yunahenda utsai, were yuna shangaza atu va taifa ra Samaria, achamba iye be ni mutu mubomu. ¹⁰ Atu vosini vachi-musikiza kulaiza mutite hata mubomu, vachamba mutu yuyu be ni uwezo wa Mulungu urio mubomu. ¹¹ Vachimusikiza pka kukala were yudzi-vashangaza pka muda mure, pka uwo utsai-we. ¹² Ela variho m'wamini ye Filipu wakati achihubiri habari mbidzo za ufalume wa Mulungu na dzina ra ye Jesu Masihi, vachibatizwa. ¹³ Hata iye Simioni m'wenye naye pia achibatizwa, achibgwirana na Filipu, achi-shangaa ariho ziona zo ishara na miujiza mibomu iriyo hendeka ¹⁴ Na vo mitume variokala ko Jerusalemu variho sikira kukala yo Samaria idzi-kubali Neno ra Mulungu, vachivahirika Petero na Johanna kuko. ¹⁵ Bai variho teremuka kuko, vachi-vavoyera vahochere Roho Mutakatifu. ¹⁶ Pka kukala, kufikira wakati uwo, Roho Mutakatifu were bado kadza vatimira, were vabatizwa tu, pka dzina ra Jesu. ¹⁷ Kisha, Petero na Johana vachika mikono dzulu yao, navo vachihochera Roho Mutakatifu. ¹⁸ Bai ye Simioni variho ona kukala atu vanapewa Roho Mutakatifu, pka pkikirwa mikono ya go mitume, achimala avape pesa. ¹⁹ Achamba, "Nipani nami uwezo uu, ili chila mutu nindiye m'wikira mikono yangu, ahochere Roho Mutakatifu. ²⁰ Ela ye Petero achim'wambira, "Pesayo naipotelee mbali ham'wenga na uwe m'wenye, pka kukala unafikiria kukala chipawa cha Mulungu be chinapatikana pka pesa. ²¹ Uwe be kuna fungu wala sehemu kahiza jambo riri. Pka kukala moyo wa pkako be kausawa mbere za Mulungu. ²² Bai tubu kahiza ui uu, ukamuvoye Bwana, ili chikala indiwezekana, be usamehewe fikira za moyo wa pkako. ²³ Pka kukala nina kona be ukahiza utsungu here wa nyongo, na kisha ukahiza chifungo cha ui. ²⁴ Simioni achi-jibu achamba, "Nivoyerani m'wi m'wi pka Bwana, ili gasini-bgwire mambo gaga mudzigo gomba hata m'wenga. ²⁵ Navo variho mrigiza kushuhudia na kuhubiri neno ra Bwana, vachuya Jerusalemu, vachihubiri injili kahiza vi dzidzi vinji vya Asamaria. ²⁶ Bai malaika wa Bwana achim'wambira Filipu achamba, "Uka na wende upande wa m'waka, hats pkenye yo barabara iteremukayo kula Gaza, nayo no njira ya nyika. ²⁷ Naye achuka achenda, mara achimona mutu wa kushi, towashi,m'wenye mamulaka tsini ya Kandake, malikia wa Kushi, ariye ipka dzulu ya hazinaye yosi, naye were yudzenda ko Jerusalemu kuvyoya. ²⁸ Achikala be yuna-uya, yusegere m'wapke garini achisoma chuo cha nabii Isaya. ²⁹ Roho achim'wambira Filipu, "Sonjera hehi na riri gari, ukabgwirane naro. ³⁰ Bai ye Filipu achenda malo, na achimusikira yunasoma chuo cha nabii Isaya, na achim'wambira, " Jee gana kuelelea go usomago? ³¹ Bai achamba, "Ninda wezadze kuelewa, chikala mutu kanda nilongoza? Achimusihi ye Filipu apande no garini na asagale ham'wenga naye. ³² Na ro fungu ra maandiko ambaro ye Mukushi were yuna risoma be ni riri, "We longozwa pkenda matsinzoni here ng'onzi, Na here m'wana ng'onzi anyamalavyo zi, mbere za iye akataye nyoga, vivyo vivyo naye kanda fugula kanware. ³³ Kahiza haliye ya kudzi-bgwaga, hukumuye yeuswa. Nani andiye eleza chi-vyaziche? Maana wo uzimawe be udzuswa kahiza itsi. ³⁴ Iye towashi achimujibu Filipu achamba, Nakuvoya, nabii yuno, be yunagomba maneno gani pka mutu hiye, jee habari zino zina muhusu iye m'wenye au no za mutu munjine? ³⁵ Filipu achifugula kanware, naye achanza pka andiko riro, achimuhubiri ye Mukushi habari mbidzo za Jesu. ³⁶ Bai varihokala vananenda mo njirani, vefika hanye madzi, ye towashi achamba, "Lola madzi si gano, ni noni chinani-zulia nisi-batizwe? ³⁷ Filipu achamba, " Uchamini pka moyo-wo wosini,be ina wezekana. Ye Mukushi achamba, "Naamini kukala ye Jesu Masihi ndiye m'wana was Mulungu. ³⁸ Mukushi achamba to gari remeswe, Filipu naye Towashi vachiteremuka vosini madzini naye Filipu achimubatiza. ³⁹ Kisha variho panda kulaiza mo madzini, Roho wa Bwana,achimunyakula ye Filipu, na ye Toashi be kamonere kaheri, bai wepkenda achi-hamirwa mo njirani. 40 Ela Filipu achonewa kahiza Azoto, na arihokala yunachira, achi-hubiri injili kahiza midzi yosi, hata achifika kaisaria.