¹ Sasa pkekala na mutu fulani Kaisaria, dzinare ni Kornelio, wekala ni mubomu wa chikosi cha askari wa Chitaliano. ² Wekala ni mutu wa kumogoha Mulungu na wem'wabudu ham'wenga na nyumbaye yosi, were yunaomboza sadaka nyinji pka atu na kumuvoya Mulungu siku zosini. ³ Muda wa saa chenda za mutsana, weona wazi wazi kahiza maono, malaika wa Mulungu yukudza mbereze. Malaika achim'wambira, "Kornelio" ⁴ Kornelio achimulola sana, achogoha achamba, "Kuna noni Bwana? Malaika achim'wambira, mavoyo ga pkako na sadakazo be zifika dzulu na kukala ukombusho mbere za Mulungu. ⁵ Sasa bai, hirika atu vende Yafa, ukam'wehe Simioni, aehewaye Petero. ⁶ Iye be ni mujeni was mutu mum'wenga, dzinare no Simioni, mutengezaji wa chingo, ambaye nyumbaye be iko pwani, yunda pkambira mambo gakupasago kuhenda. ⁷ Bai, baada ya ye malaika ariye gomba naye ariho-uka, Kornelio achi-vaeha atu airi gahiza vo atumishie va nyumbani, na shikari mum'wenga ambaye were yuna m'wamini maana yuna muhudumia. ⁸ Kornelio achi-vaeleza mambo gosini adzigo gaona, na achivahuma Yafa. ⁹ Hata siku ya hiri, variho kala vananenda na kukaribia wo mudzi, Petero were yupanda dzulu gorofani, pkenda voya, were inapata saa chenda za mutsana. ¹⁰ Achigwirwa no dzala, ela varihokala vanajita, Petero wezimia. ¹¹ Achona mbingu zifuguka, na chombo chichi-teremushwa, here nguo bomu, ina teremushwa pka pembe- ze ine hata hotsi. ¹² Ambayo mo ndani, were muna aina zosini za anyama venye magulu mane, na anyama vosini vahambalao, na tsongo vosini vahurukao hewani. ¹³ Kisha sauti ichimu-dzirira ichamba, "Uka, Petero, utsinze urye." ¹⁴ Ela ye Petero achamba, "Hata, Bwana, sababu sidzarya kamare chitu ambacho no chichafu au najisi. ¹⁵ Sauti ichi-mudzirira mara ya hiri, ichim'wambira, " Virivyo takaswa ni Mulungu be usivyehe najisi. ¹⁶ Jambo riri be richihenda mara tahu; kisha cho chombo chi chi hocherwa kaheri ko dzulu mulunguni. ¹⁷ Bai ye Petero arihokala yuna wasi wasi mo moyoni, maanaye ni noni mambo gano nidzigo gaona, vavo atu various hum'wa ni Kornelio, vachikala va ho muryangoni vachuza nyumba ya Simoni. ¹⁸ Vacheha na kuza kukala, ye Simioni aehewaye Petero yunakala mumo. ¹⁹ Na Petero arihokala yuna fikiri gago maono. Roho achim'wambira, "Kuna atu ahahu vanakutafuta. ²⁰ Bai uka na uteremuke uvatue, usihende shaka, pka kukala Mimi ndimi nidziye vahuma. ²¹ Bai Petero achiva-teremukira vavo atu, naye Petero achamba, " Mimi be ndiye mutu, mumu-tafutaye. Mukudza pka saabu yani? ²² Vachamba, Kornelio ambaye ni mubomu wa shikari, ambaye yuna mogoha Mulungu, kisha yuna sifa mbidzo pka taifa rosini ra Ayahudi, weonywa ni malaika mutakatifu kuhuma atu pkako, apate kusikiza maneno kula pkako. ²³ Bai Petero achiva-karibisha vakale ajenie. Kurihocha madzacha, Petero achuka, achombola ham'wenga navo, na baadhi ya ndugu variokala ko Yafa pia vachimutua. ²⁴ Bai Siku ya hiriye, vachifika Kaisaria. Na Kornelio were be yunavarinda, na were pia yudzi-kusanya mbarize na pia asenae. ²⁵ Bai Petero arihokala achenjira, Kornelio weuka achenda muhochera, achimu-bgwera maguluni achim'wabudu. ²⁶ Lakini Petero achimunula, achim'wambira, ema, mimi nami be ni m'wanadamu. ²⁷ Na kahiza kugomba naye,achenjira ndani, achona atu anji vakusanyika ham'wenga. ²⁸ Petero achivaambira, "M'wi m'wi be munamanya kukala sesawa be sisawa mutu ariye Muyahudi asibgwirane na mutu ariye wa taiga rinjine au kum'wendera, ela Mulungu yudzini-kahaza, nisim'wehe mutu yoyosi muchafu au najisi. ²⁹ Pka sababu iyo nidzi kudza nidziho-ehewa, nisikahale, bai navauza, no neno rani mudziro nehera? ³⁰ Kornelio achamba, "Siku tahu zidzizo chira, saa dza ii yenye, yaani saa chenda, nere nina voya m'wangu nyumbani, nichona mutu yudzema mbere zangu, m'wenye na nguo za kung'ala. ³¹ Achamba, Kornelio, kuvoya-ko kudzisikirwa, na sadakazo be zidzi-kumbukirwa mbere za Mulungu. ³² Bai sasa, huma atu vende Yafa, um'wehe Simioni aehewaye Petero, yunakala kahiza nyumba ya Simioni, mutengezaji wa chingo, hehi na pwani, naye achidza, yunda gomba nawe. ³³ Ndo nami, nichihuma mara m'wenga atu vadze pkako, nawe be udzihendato kudza. Bai sasa, fwi fwi hosini be huhaha mbere za Mulungu, hupate kusikiza maneno gosini udzigo amuriwa ni Bwana. ³⁴ Bai Petero achifugula kanware achamba, "Hakika nidzinamanya kukala ye Mulungu be kana upendeleo. ³⁵ Ela kahiza chila taifa, mutu amogohaye Mulungu na kuhenda hachi ni kukubaliwa ni iye. ³⁶ Munamanya zo habari mbidzo Arizona- vahirikira atu va Israeli za amani kuhusu Jesu masihi ndiye Bwana wa vosini ³⁷ Jambo riro, be m'wi m'wi munamanya, ririro enera kahiza Uyahudi wosi, richanzira Galilaya, baada ya ubatizo ario hubiri Johana. ³⁸ Habari za Jesu wa Nazareth, jinsi Mulungu arivyo muhaka mafuha pka Roho Mutakatifu na nguvu, naye achi-zunguluka kuko na kuko, achihenda kazi mbidzo na kuhoza atu vosini vario-onerwa ni Ibilisi, pka kukala be ye Mulungu were yuham'wenga naye. ³⁹ Nafwi be humashahidi we mambo gosini arigo gahenda kahiza itsi yosini ya Ayahudi na kahiza Jerusalemu, ambaye vemolaga na vachi muhajika muhini. ⁴⁰ Ela ye Mulungu achimufufula siku ya hahu, na achimujalia konekana. ⁴¹ Se pka atu vosini, ela pka vo mashahidi variokala vatsagulwa ni Mulungu, na ndo fwi fwi, hurio hwenwa na kurya ham'wenga naye, baada ya kufufuka-pke kula pka nyufu. ⁴² Achihulagiza huva hubirie atu na kuvashuhudia kukala yuyu Jesu ndiye ariye amuriwa ni Mulungu akale Muhukumu wa atu va rio moyo na vario-fwa. ⁴³ Kuhusu yuyu Jesu Masihi, manabii vosi vana munena kukala pka dzinare, chila mutu andiye m'wamini yundapata kusirwa dambize. ⁴⁴ Bai Petero arihokala yunagomba maneno gago, Roho Mutakatifu achivatimira atu vosini various sikira ro neno. ⁴⁵ Na vavo atu vario-tahiriwa, vario amni, vachi shangaa, vavo atu vario kudza na Petero, pka sababu atu va Mataifa navo vam'wagirwa chipawa cha Roho Mutakatifu. ⁴⁶ Pka kukala vadzi-vasikira atu va Mataifa vachigomba pka luga na kumutukuza Mulungu. Ndo Petero achijibu, ⁴⁷ Nani awezaye kuzulia madzi, ili atu vano vasibatizwe, atu ambao navo vahochera Roho Mutakatifu dza fwi fwi? ⁴⁸ Achiamuru go atu vabatizwe pka dzina-re Jesu Masihi. Ndo vachimusihi Petero azidi kukala navo pka Sikh kadhaa.