¹ Bai varihokala vana gomba na varau atu, makuhani, na shikari va ro hekalu, na masadukayo vachidza haho. ² Vachi huzunika sana maana Petero na Johana vanafundisha atu na kuhubiri habari za Jesu na ufufulo wa afu. ³ Vachi vabgwira na vachi vaika jela muhadi madzacha, maana were ni dziloni. ⁴ Lakini anji kahiza vavo atu variokala vadzisikira gago mahubiri veamini, na hesabu ya vavo ana alume vario amini yepata elifu tsano. ⁵ Bai iriho fika siku ya hiri, vavo vilongozi, azee na masadukayo vekutana ham'wenga ko Jerusalemu. ⁶ Na Anasi Kuhani mubomu wekala haho, na Kayafa, na Johana, na Iskanda, na jamaaze vosi ye kuhan mubomu. ⁷ Kisha vachi vaika Petero na Johana haho kahi kahi, vachivauz, "Ni pka zani na pka dzina ra hiye mudzi henfa gano?" ⁸ Bai Petero achikala yo dzala Roho Mutakatifu, achivaambira, "Hem'wi abomu va atu, na atumia va Israeli. ⁹ Huchiala kesini rero na kunena habari za jambo ridzo ariro henderwa yuyau mukonngo, jinsi arivyo hola. ¹⁰ Bai sasa naimanyikane, pkenu mosini na atu vosini va Israeli, kukala mutu yuyu wemire mbere zeu ni muzima, ni pka sababu ya Dzina ra Jesu wa Nazareti, ambaye m'wi m'wi m'wemu sulubisha, Ela Mulungu wemu fufula kahiza afu. ¹¹ Iye Jesu Masihi ndiye dziwe, riro ririrokahalwa ni m'wi m'wi adzengi, naro ridzikala dziwe bmu rapembeni. ¹² Wala kakuna wokofu kahiza mutu munjine, maana kakuna dzina rinjine tsini ya mbingu variro pewa anadamu ili vaokolwe pka riro. ¹³ Bai variho ona ujasiri wa Petero na Johana, na kumanya kukala be ni atu va kawaida na kavana elimu, vasio na maarifa, ve shangaa, vachimanya kukala vekala ham'wenga na Jesu. ¹⁴ Na pka sababu, vemona iye mutu ariye hozwa wemire ham'wenga navo, bai kavakarire na ra kugomba ¹⁵ Vachi vaamba, vaombole mo barazani, na vachi shauriana mumo enye pka enye. ¹⁶ Vachamba,"Huva hendedze atu vano? Maana ni wazi kukala muujza mubomu udzihendeka pka atu vosini vakalao Jerusalemu, na kahuweza kuukana. ¹⁷ Ela pka neno riri risi enere kahiza atu, na huvatishe vasigombe kaheri pka mutu yoyo pka dzina riri. ¹⁸ Vachi vaeha ndani barazani, na vachi vabiga marufuku, vasigombe kabisa wala kufundisha pka dzina ra Jesu. ¹⁹ Ela Petero na Johana achijibu na vachi vaambira, "Pkamba ni ni tototo mbere za Mulungu, kuvasikiza m'wi m'wi kuriko Mulungu, bai hukumuni enye. ²⁰ Maana fwifwi kahunda richa kunena mambo madzo hurigo gaona na kugasikira. ²¹ Baada ya kuvatisha kaheri, vachi vafugula, kava onere njira ya kuvapa adabu, pka sababu ya atu, pka ,kukala atu vosini vere ,vachimulika Mulungu pka gago gadzigo hendeka. ²² Pka kukala yuyu m'wana mulume ambaye yu hola uwete, were napata miaka mirongo mine. ²³ Baada ya kufugulwa, Petero na Johana, vachenda pka atu vao, vachi vaeleza mambo gosini vadzigo ambirwa ni abomu va makuhani na atumia. ²⁴ Variho gasikira gago, vachi mulutira Mulungu sauti zao pka moyo mum'wenga, vachamba " Mulungu, uwe ndiwe uriye umba mbingu na itsi na bahari na vitu vyosini viriyo muo. ²⁵ Nawe we nena kahiza Roho Mutakatifu kahiza kanwa ya mutumishio Daudi, "Mbona itsi za mataifa zina henda fujo, na atu vana fikiria upuzi? ²⁶ Weamba, "Afalume va dunia be vana dzipanga ham'wenga, na atawali vana ore rana, dzulu ya Bwana, na dzulu ya Masihiwe." ²⁷ Maana ni jeri Herode na Pontio Pilato, ham'wenga na Mataifa na atu va Israeli, vekusanyika ham'wenga kahiza mudzi uu, dzulu ya mutumishi Mutakatifuo Jesu uriye muhaka mafuha. ²⁸ Vachi henda gago gosini ham'wenga, ambago mukonoo we panga hangu m'wanzo gahendeke. ²⁹ Sasa Bwana lola vitisho vyao na uvaajalie atumishio kunena neno ra pkako kahiza ujasiri. ³⁰ Goloza mukono wa pkako ili uhoze na kuhenda ishara na maajabu pka dzina ra mutumshio mutakatifu Jesu." ³¹ Baada ya kuvoya, haho hatu variokakala vaham'wenga be hachi tukuka, na vosini vachodzazwa kahiza Roho M'weri, na vachinena neno ra Mulungu pka ujasiri. ³² Na jamii ya atu va rio amini, vekala na moyo mum'wenga na roho m'wenga. Kahana mutu ariye amba kukala chitu chochosi be nichangu, ela vekala na na vitu vyosini pka ushirika. ³³ Pka nguvu nyinji vo mitume vachomboza ushuhuda wa kufufuka pka Bwana Jesu, na neema bomu ya Mulungu ichikala dzulu yao vosini. ³⁴ Kahakarire na mutu hata mum'wenga ariye kala na uhitaji, pka sababu atu vosini variokala na viwanja au nyumba, veguza na vachireha pesa zosini vadzizopata. ³⁵ Na vachika maguluni ha mitume, na chila mutu achigavirwa kulingana na hitajire. ³⁶ Na Josefu, ariye ehewa ni mitume Barnaba(maanaye, ni m'wana wa faraja),mulawi, na ni mutu wa Kipro. ³⁷ Weguza mundawe ario kala nao, achireha zo pesa, na achizikamaguluni ha mitume.