¹ Bai Petero na Johana vepanda pkenda hekaluni, ham'wenga saa ya mavoyo, saa chenda. ² Na mutu mum'wenga ariye valwa chiwete hangu tumboni m'wa mameye, wetsukulwa ni atu na kudzaipka muryango wa hekalu chila siku.Kahiza muryango wa hekalu wehe wao Mudzo,ili avoye sadaka pka vo atu venjirao hekaluni. ³ Mutu yuyu ariho vaona Petero na Johana, vachenjira hekaluni wevoya apewe sadaka. ⁴ Petero, achimukata matso, ham'wenga na Johana, achim'wamba, "Hulole fwi fwi." ⁵ Bai chiwete achivalola, achitarajia kupata chochosi kula pkao. ⁶ Ela Petero achim'wabira "Sina pesa au dhahabu, ela niricho nacho ndicho nikupacho. Pka dzina ra Jesu Masihi wa Nazareti, ema na wenende." ⁷ Achimubgwira mukonowe wa kurya, Petero achimunula, gafula nyayoze na vifundo vya maguluge vipata nguvu. ⁸ Achi dzunula ye chiwete na achema na achanza kutsembera na achenjira ndani ya hekalu ham'wenga navo, achenenda, achi ruka ruka na kumusifu Mulungu. ⁹ Atu vosini vachimona yuna nenda na yuna musifu Mulungu. ¹⁰ Vachimaya kukala ni iye ndiye ariyenkala yuna sagala ho muryangoni achivoya sadaka henye wo muryango Muzuri, vachi shangaa na kustaajabu pka mambo gadzigo mupata. ¹¹ Bai ariho kala yudziva bgwira Petero na Johana, atu vosini vachi kusanyika malo mbere zao kahiza mufunga wa Solomoni, vachi shangaa sana. ¹² Wakati Petero arihoona gaga, wejibu vo atu, "Hem'wi atu va Israeli, mbona munashangaa na gaga, au mbona muna hubgwagira matso fwi fwi, here hudzimuhenda enende pka nguvu zehu fwi fwi, au pka utakatifu wehu fwi fwi? ¹³ Mulungu wa Burahimu na wa Isaka na wa Jakobu, Mulungu wa baba zehu, yudzi mutukuza mutumishiwe Jesu, ambaye m'wi m'wi m'wemuguza na kumukahala mbere za Pilato,ariye kala yudzamua afugulwe. ¹⁴ Ela m'wi m'wi m'wemukahala ye mutakatifu, iye m'wenye hachi, muchimala mupewe molagi. ¹⁵ Muchi molaga, ye mubomu wa uzima, ambaye Mulungu wemufufula kahiza nyufu, na fwi fwi be humashahidive. ¹⁶ Na pka imani kahiza dzinare, dzinare ridzi m'wenjiza nguvu mutu yuyu, ambaye muna mona na kumumanya, na imani ya yuyu kahiza Jesu Masihi, idzimu henda yuyu akale muzima wa afya mbere zenu mosini. ¹⁷ Bai sasa ndugu zangu, namanya m'wehenda gaga pka kusa manya, here na vo abomu enu varivyo henda. ¹⁸ Ela mambo gago ambago Mulungu we ga hubiri hangu zamani, pka kanwa za manabii-ve vosini, kukala Masihiwe yunda teswa, yudziga timiza vivyo. ¹⁹ Tubuni sasa, na mugaluke ili dambi zenu zifutwe. ²⁰ Zipate kudza nyakati mbidzo za kuburudishwa pka kukala pka Bwana, na apate kumuhuma Jesu Masihi, muriye ikirwa hangu kapindi. ²¹ Ambaye yebidi kuhochera ko mulunguni, hata udze musimu wa kuhenda lusha vitu vyosini. Nyakati zirizo nenwa ni Mulungu pka kanwa za manabii atakatifu hangu m'wanzo wa urim'wengu. ²² Musa maana weamba, ye Bwana Mulungu wenu, yunda yunda va emesera nabii, kahiza ndugu zenu, here mimi be musikireni iye chila chitu avaambiracho. ²³ Na indakala, chila mutu asiye musikiza iye nabii, yunda banabgwa na kutembwa na atue. ²⁴ Ni jeri manabii vosini hangu Samueli na vavo variokudza baadaye, ve nena kuhusu habari zizi na kutabiri siku zizi. ²⁵ M'wi m'wi be mudzikala ahoho va manabii na va chilagane cha pkapke, ambago Mulungu we lagana na baba zehu, achim'wambira Burahemu, kahiza chi vyazicho makabila gosini ga urim'wengu ganda barikiwa. ²⁶ Mulungu baada ya kumu fufula mutumishiwe Jesu, we muhuma pkenu pkanza,ili pka kuva barikia, na pka kumu galuza chila mum'wenga wenu na mai ga pkapke.