¹ Wakati siku ya Pentecost iriho fika, vekala vosini va hatu ham'wenga. ² Gafula, sauti here ya peho ya chi kukuzi ya nguvu yetima kula mulunguni na ichodzaza nyumba yosini varimo kala vasegere. ³ Kuchi vaomborera here chemi za moho, ambazo ze tsamuka na zichisagarira chila mum'wenga ariye kala yu mumo nyumbani. ⁴ Vosini vacho dzazwa Roho Mutakatifu na vachanza kugomba luga nyinjine here Roho arivyo vaajalia kugomba. ⁵ Bai, pke kala na Ayahudi vanaishi Jerusalemu, atu aeri, na atu vakombola chila itsi kahiza dunia. ⁶ Wakati ii sauti ina sikirika, makutano gekudza ham'wenga, na vachi shangaa pka sababu vesikira chila mutu yunagomba lugaye m'wenye. ⁷ Va changalazika vosini na vachi maka, vachamba, "Lolani, vano vosini vagombao se Agaliaya? ⁸ Ina kaladze bai huna vasikira vanagomba luga zehi fwi fwi hurio valwa nazo? ⁹ Aapathi, Aamedi na Aaelami na vavo va kalao Mesopotamia, Uyahudi na Kapadokia, Ponto na Asia. ¹⁰ Firigia na Pamfilia na Kirene, Misiri na pande za Libia hehi na Kiren na ajeni vakalao Rumi Ayahudi na aongofu, ¹¹ Akirete na Arabu, vachamba, hunavasikira vava pka luga zehu, gaga ni mahendo mabomu ga Mulungu Vosini ve shangaa na vachenjirwa ni mashaka, vachambirana, "Maanaye be ni noni mambo gano?" ¹³ Ela anjine vachi dihaki, vachamba, "Vadzirea pka divai mbisha." ¹⁴ Lakini Petero achema, ham'wenga na vo kumi na m'wenga, achenula sautiye achamba, "Hem'wi atu va Judea na mosini m'wishio Jerusalemu, manyani jambo riri, na musikize maneno gangu. ¹⁵ Vava atu kavadza rea here ambavyo munafikiria. Maana ni mutsana wa saa tahu tu. ¹⁶ Ela jambo riri ndiro ambaro re nenwa ni Joeli nabii: ¹⁷ Indakala kahiza siku za m'wisho, yunaamba Mulungu, nida va m'wagira Roho wangu, na avulana enu na asichana enu vanda tabiri, na vijana venu, vanda ona maono, na atumia enu vanda loha ndoso. ¹⁸ Na hakika pka atumishi vangu vachilume na vachiche siku zizo, ninda m'waga Roho wangu na vanda tabiri. ¹⁹ Ninda onyesa ishara dzulu mulunguni, na maajabu tsini duniani, damu, moho na vuche ra mosi. ²⁰ Dzua rinda galuka chiza na m'wezi kukala damu, kabila kudza yo siku iyo ya Bwana iriyo bomu. ²¹ Na indakala chila andiye reha dzina ra Bwana, yunda okoka. ²² Hem'wi ana alume va Israeli, sikirani maneno gaga: Jesu wa Nazareti were ni mutu airiye ipka lwazu pkenu ni Mulungu, pka miujiza, maajabu na ishara, ambazo Mulungu wezihenda pka mukonowe, kahi kahi yenu, here m'wi m'wi enye mumanyavyo. ²³ Mutu yuyu ariho ombozwa pka shauri ra Mulungu ririro pkambwa, na pka kumanyapke hangu kapindi m'wi m'wi muchi musulubisha, na pka mikono ya atu ai,muchimolaga pka kumu biga misumari musalbani. ²⁴ Ela Mulungu wemu fufula, achimu fugula utsungu wa chifo, maana were kaiwezekana abgwirwe ni chifo. ²⁵ Maana Daudi yuna munena, "Nemona Bwana mbere za uso wangu, maana yuupande wangu mukono wa kurya, pka vivyo sindauswa. ²⁶ Pka vivyo moyo wangu una furaha na lulimi lwanu lunda shangilia. Na m'wiri wangu undaka kahiza matumaini. ²⁷ Maana kunda iricha roho yangu kahiza kuzimu, wala kunda momboza mueri wa pkako aone kubanangika. ²⁸ Udzini manyisa njirazo za uzima, undano dzaza furaha pka usowo. ²⁹ Ndugu zangu, ni tototo mimi be ni nene pka nguvu kuhusu baba yehu Daudi, kukala wefwa achizipka na mbiraye be ihaha hehu hata rero. ³⁰ Pka vivyo wekala ni nabii, achimanya kukala Mulungu we vaapira chiraho, kukala lukolwe baadaye, yundadza musagaza kahiza chihiche cha enzi. ³¹ Ye m'wenye weona gago gandigo kudza kala baadaye na achi gomba habari za kufufuka pka Masihi, kukala rohoye kainda richwa kuzimu, wala m'wiri wa pkapke ubana ngike. ³² Jesu yuyu ambaye Mulungu wemu fufula, ambao fwi fwi hosini be huma shahidi. ³³ Bai iye achikala wepandishwa mupaka mukono wa kurya wa Mulungu, na kuhochera pka Baba iyo ahadi ya Roho M'weri, yudzichi m'waga chitu chichi muchonacho sasa na kuchi sikira. ³⁴ Maana Daudi kapandire mulunguni, ela yunaamba, "Bwana we m'wambira Bwana wangu, Sagala upande wa mukono wangu wa kurya. ³⁵ Mupaka ni ndiho vaika adui vo, tsini ya magulugo." ³⁶ Pka vivyo nyumba yosini ya Israeli sasa,nai manye kukala Mulungu yudzi muhenda Bwana na Kristo, iye Jesu muriye musulubisha. ³⁷ Navo variho sikira gaga veochwa mioyo yao, na vachi mwambira Petero na vo mitume anjine, "Ndugu zehu huhendedze? ³⁸ Petero achi vaambira, " Yubuni muka batizwe,chila mum'wenga pka dzina ra Jesu Masihi, mupate kusirwa dambi zenu, nam'wi munda pata chipawa cha Roho Mutakatifu. ³⁹ Pka kukala be ahadi ii nipkenu, na pka ahoho enu, na pka atu vosini vario kure, na pka vosini vandio ehewa ni Bwana Mulungu wehu." ⁴⁰ Na pka maneno manjine manji achiva shuhudia na kuvaonya, achivaamba "Dziokoleni kahiza chivyazi chichi chibaya." ⁴¹ Na vavo vario rihochera ro neno, vachi batizwa, na siku iyo vacho njezeka atu vapatao elifu tahu. ⁴² Bai vachidumu kahiza mafundisho ga mitume, na ushirika, na kahiza kumega mukahe na mavoyo. ⁴³ Chila mutu achenjirwa ni woga, na ajabu nyinji na ishara zichihendwa ni mitume. ⁴⁴ Na vosini vario amini vekala hayu ham'wenga, na kukala navitu vyao shieika. ⁴⁵ Na vachiguza vitu vyao na mali zao na kuvagavira atu vosini here chila mutu arivyo na mahitaji. ⁴⁶ Na siku zosini pka moyo mu'wenga, vedumu ndani ya hekalu, vachimega mukahe nyumba pka nyumba na kushiriki chakurya chao pka raha na pka moyo m'weruhe. ⁴⁷ Vachimusifu Mulungu, na kuva henzeza atu vosi. Bwana achi zidisha kanisa, chila siku pka vavo vario kala vana okoka.