¹ Kahiza chitabu cha pkanza, hewe ndugu Thiofilo, neandika na nichigomba gosini, Jesu arigoanza kugahenda na kufundisha. ² Mupaka siku ambayo Iye wehocherwa dzulu. Ii yekala baada ya komboza amuri kuchirira Roho Mutakatifu, pka vo ahum'wi ariyokala yudzivatsgula. ³ Baada ya matesoge, iye Jesu be weonekana hai kaheri, hamwenga na dalili nyinji zichimushudia. Na pka siku mirongo mine achidzonyesa pkao, na kugomba kuhusu ufalume wa Mulungu. ⁴ Hata wakati yudzi kutana navo, we va lagiza vasombole Jerusalemu, ela vatarize ahadi ya Baba, ambayo weamba, "M'wesikira kula pkangu, ⁵ Kukala Johana webatiza pka madzi, ela m'wi m'wi munda batizwa kahiza Roho M'weri kahiza siku zizi chache. ⁶ Kisha baada ya korerana ham'wenga, vachimuza, "Bwana uno ndo wakati unaudzya ufalume pka Izraeli?" ⁷ Achivaambira, "Se haja yenu mumanye wakati au muda Baba arigo ika pka mamulaka-ge m'wenye. ⁸ Ela munda hochera nguvu, haho Roho M'weri andiho kudza dzulu yenu. Na mundakala mashahidi vangu, hangu Jerusalemu na Judea yosi na Samaria, na muhadi pembe zosini za dunia. ⁹ Baada ya Bwana Jesu kugomba gaga, kuno vana lola dzulu, achunulwa dzulu na ingu richi muhochera mbere za matso gao. ¹⁰ Varihokala vadina kulola dzulu mulunguni, kuno Jesu yunenda zapke, gafula ana alume airi vachema mbere zao, venye nguo nyeruhe. ¹¹ Vachamba, "Hem'wi ana alume va Galilaya, mbona m'wemire hano muchi lola mulunguni? Jesu yuyu adziye halwa pkenu na pkenda dzulu mulunguni, yundadza kaheri jinsi iyo iyo here mudzivyo mona achenda mulunguni." ¹² Kisha vachuya Jerusalemu, kulaiza murima ambao una ehewa Murima wa Mizeituni, urio hehi na Jerusalemu, inapata m'wendo wa Sabato. ¹³ Na variho fika, vachipanda gorofani, ambamo vekala mumo. Vere ni; Petero, Johana, Jakobu, Andirea, Filipu, Tomasi, Batholomayo, Mathayo, Jakobu m'wana wa Alifayo, Simioni Mukananayo, na Juda m'wana wa Jakobu. ¹⁴ Vosini vava vedumu pka moyo mum'wenga kahiza mavoyo, ham'wenga nao pia, na ana ache, na Marimu mameye Jesu na nduguze. ^{15 15} Kahiza siku zizo, Petero weema ho kahi kahi ya vo ndugu, vanapata gana na ishirini pka hesabu yao, na achamba, ¹⁶ Ndugu, were ni lazima maoro gakamilike, ambaye ho kapidi, Roho Mutakatifu wenena pka kanwa ra Daudi kuhusu Juda, ariye va longoza vavo vario mubgwira Jesu. ¹⁷ Wekala ni mum'wenga wehu na wepata sehemu kahiza huduma ii" ¹⁸ (Bai mutu yuyu wegula munda pka mushahara wa mapato ga ui, achibgwa haraka sana, hata achahuka tumbo na mahumboge gachi m'wagika hotsi. ¹⁹ Na vosini vakalao Jerusalemu vegasikira gaga, ndo munda uwo uchehewa pka luga yao "Akeldama," maanaye ni "Munda wa Milatso.") ²⁰ Maana ye andikpa kahiza chuo cha Zaburi, "Makaloge be na gakale chia, wala musikale mutu wa kukala mumo, "kisha chikaloche cha wemerezi be nachihalwe ni munjine." ²¹ Bai ni muhimu, sana kahiza vavo atu ambao vaham'wenga nafwi na hwe bgwirana hosini, na Bwana Jesu kahiza kombola na pkenjira. ²² Kulaiza ubatizo wa Johana mupaka wakati yuna halwa pkehu, pkenda mulunguni ni akale shahidi ham'wenga nafwi kahiza ufufulo.' ²³ Bai mvachika mbere za atu airi, Yusufu aehewaye Barsaba ariye kala na dzina ra hiri yuna ehewa Yusto, na Mathiya. ²⁴ Kisha vachivoya vachamba, "Uwe, Bwana, umanyaye mioyo ya atu vosini, honyese ni hiye udziye mutsagula kahiza vava airi. ²⁵ Abgwire nafasi ii kahiza huduma na uhum'wi ario ukosa Juda na achenda m'wenye hatuhe." ²⁶ Bai vachibiga kura, na kura ichimu bgwerera Mathiya, naye achitalwa kukala ham'wenga navo ahum'wi kumi na m'wenga.