Bai, mutu mum'wenga dzinare ni Anania, na muchewe Safira, veguza sehemu ya mali yao. ² Na achika pka siri kanda yo sehemu ya pesa adziyo pata,(ela ye muchewe gaga wegamanya), na achireha yo sehemu injine na achiyika maguluni ha mitume. ³ Petero achamba, "Anania, ni pka noni shetani yudzi wodzaza moyoo ili umukenge Roho M'weri na wike kanda pesa injine ya cho chiwanja? ⁴ Wakati kudza uguza wo munda, kawekala wako? na wakati udziuguza wo munda, yo pesa be, kayekala mikononi m'wako? Ni pka noni m'wako moyoni udzipanga vino? Kuva kengere atu ela udzimukenga Mulungu." ⁵ Ariho sikira maneno gaga tu, Anania achibgwa hotsi na achifwa. Woga munji uchivapata atu vosini vario sikira gaga. ⁶ Bai avulana vachuka na vachi mulinga sanza, na vachi momboza konze kumuzika. ⁷ Kisha baada ya here masaa mahahu, ye muchewe achenjira, na kamanya chitu chochosi chidzicho kala. ⁸ Petero achim'wambira, "Hebu nambira ujeri, wo munda ndo m'weuguza pka pesa iratu? Ye Safira achamba, " Ee, hwe uguza pka bei iyo! ⁹ Kisha Petero achim'wamba, "Ni pkanoni be mudzipatana na mulumeo mumu jaribu Roho wa Bwana? Lola bai, magulu ga avulana vadzenda muzika mulueo, ga haha muryangoni, na pia vanadza kuhala uwe nawe. ¹⁰ Gafula naye achibgwa hotsi ho maguluni ha Petero na achifwa. Vijana variho kudza, vachimona naye yudzefwa, vachimuhala naye na vachenda muzika lwavuni ha mulumewe. ¹¹ Woga munji, be uchipata kanisa, na atu vosini vario sikira habari zizi. ¹² Bai, miujiza minji na ishara zichi hendeka kahiza atu, pka mikono ya vo mitume. Vosini vekala ham'wenga kahiza baraza ra mufunga wa Solomoni. ¹³ Na kahiza vo anjine va kanda, kahana hata mum'wenga are jeza kutsanga nyikana navo, ela vo atu, be, veva harira hali ya dzulu sana. ¹⁴ Kisha vario amini vachizidi konjezeka pka Bwana, anji, ana alume pka ana ache. ¹⁵ Hata ichikala, mo barabarani, be akongo vanaipka, anjine vekudza vitandani, anjine pkenye makochi, ili Petero atsupavyo, cho chivuri vuriche chibgwerere mum'wenga wao. ¹⁶ Kisha bai makundi ga atu mbali mbali pkenye midzi idziyo zunguluka Jerusalemu, vachidza, vareha akongo, na vavo vadzio golomopka ni mapepo, na vosini vachihola. ¹⁷ Kisha achuka ye mubomu wa makuhani, na vavo vario kala ham'wenga naye,(ambaro ndo kundi ra masadukayo); na vachona wivu. ¹⁸ Na vachi goloza mikono pka vo mitume, ili kuva dhuru, na vachivabgwira na kuvenjiza ndani ya jela. ¹⁹ Bai kuriho kala usiku, malaika wa Bwana wekudza na achifugula yo miryango ya jela na achivaomboza konze. ²⁰ Na achivaamba "Nendani, mukaeme mo hekaluni, na munene maneno ba uzima." ²¹ Navo variho ambirwa vivi, vepkenda kamiri miri kenye mo hekaluni na vachanza kufundisha. Kuhani mubomu achidza na vavo variokala vaham'wega naye, vachikusanya baraza zima na atumia vosi va Israeli, vachihuma atu vende ko jela ili mitume varehewe. ²² Ela vo shikari variho pkenda, kava onere atu mo jela, na vachuya na vachidza eleza. ²³ Vachamba "Hudzona jela ifumbwa salama, na vo arinzi pia veemire ho muryangoni, ela hudziho fugula, be kahonere mutu mo ndani." ²⁴ Bai ye shikari mubomu wa hekalu na vo abomu va makuhani, variho sikira gaga, vachenjirwa ni woga, pka ajili ya vo mitume kuhusu jambo riro inda kaladze? ²⁵ Kisha mutu mum'wenga achidza na achidza vaambira, "Vavo atu murio vaika ndani ya jela, be vaemire mo ndani ya hekalu na vana fundisha atu." ²⁶ Baiye mubomu wa shikari achenda vatua na achi vareha ela se pka fujo, maana veogoha vo atu, kukala vandaibgwa mawe. Na variho vareha, vachivaika kahikahi ya ro baraza. Kuhani mubomu achivauza, achamba, "Hwe vaamuru kabisa, kukala musifundishe pka dzina riri?, haya lolani mudziyodzaza Jerusalemu pka mafundisho genu, na munamala muirehe damu ya mutu iye dzulu yehu. ²⁹ Ela Petero na vo mitue anjine vachivajibu, "Idzi hupasa humutii Mulugu kuriko anadamu. ³⁰ Mulungu wa baba zehu we mufufula Jesu, ambaye m'wi m'wi m'wemolaga pka kumuhajika dzulu za muhi. ³¹ Bai Mulungu mutu iye wemutukuza pka mukonowe wa kurya na kumuhenda Mubomu na Mokoli, avape Aisraeli toba na musamaha wa dambi. ³² Na fwi fwi be humashidi wa wambo gaga, ham'wenga na Roho M'weri ambaye Mulungu navapa vosini va m'waminio. ³³ Na wakati vo atu va baraza variho sikira gaga, veochwa mioyo yao hata vachihenda njama ya kuvaolaga vo mitume. ³⁴ Ela farisayo mum'wenga pka dzina naehewa Gamalieli, m'walimu wa sheria, ambaye yuna heshimika ni atu vosini, achema kahi kahi ya ro baraza, na achamuru vo mitume vaombozwe konze pka muda chidogo. ³⁵ Kisha achi vaambira, "Hem'wi anaalume va Israeli, kalani chonjo vivyo ambavyo munamala muvahende atu vava. ³⁶ Maana kabila ya siku zizi, Theuda weombola na kudzidai kukala iye ni mutu mubomu, atu vapatao magana mane vachimutua, naye weolabgwa na vo atu varo bgwirana naye vachitsamuka na vachikala se chitu. ³⁷ Baada ya mutu yuyu, kuchombola Juda wa galilaya, siku zizo za kutalwa pka atu, na achipata atu wa kadhaa. Naye pia achangamika na vo atu vachitsamuka. ³⁸ Bai sasa mimi avaambira, kalani kanda sana na atu vava, maana, shauri riri au kazi ii ichikala be ila pka m'wanadamu indavunzika. ³⁹ Ela ichikala be ni ya Mulungu, kamunda weza kuivunza, musidze mukaonekana munabigana na Mulungu." Kisha vachikubali. ⁴⁰ Na vachi vaeha vo mitume ndani, na vachivabiga na kuvaamuru, vasifundishe kaheri pka dzina ra Jesu, kisha vachi vaomboza venende. ⁴¹ Bai vachombola haho henye baraza, enye furaha, vachitala kukala vere vana stahili mateso na kuaibishwa pka Dzina Riro. ⁴² Bai chikala chila siku va ndani ya hekalu na vachenda nyumba pka nyumba pka kufundisha na kuhubiri habari mbidzo za Jesu kukala ndiye Masihi