¹ Bai hurihokala hudzi dzitenga navo na pkenjira mo melini hwepkenda na huchifika Kosi pka chandarua chim'wenga, na siku ya hiri-ye huchifika Rodo na kula kuko huchifika Patara. ² Huchipata meli indiyovuka mupaka Foinike, huchipanda na huchenda. ³ Na huriho-ona Kipro, huchiiricha upande wa kumotso, huchisafiri mupaka Shamu huchitima Tiro. Maana kuko yo meli yehu ndiko were indatimisha mizigoye. ⁴ Kisha baada ya kuvaona anafunzi, huchikala kuko pka siku fungahe, navo vachim'wambira Paulo pka uwezo wa Roho asipande pkenda Jerusalemu. ⁵ Baada ya siku zehu kugoma, hweuka na huchenda zehu, na atu vosini, ham'wenga na ache ao na ahoho ao, vachihomboza mupaka konze ya mudzi, huchibiga magoti ho pwani huchivoya. ⁶ Na baada ya kulagana navo huchipanda meli, navo vachiuya madzumbani m'wao ⁷ Hata huriho-marigiza safari yehu kula Tiro, huchifika Tolemai, huchivalamusa ndugu na huchikala pkao siku m'wenga. ⁸ Madzachage huchuka, na huchifika Kaisaria, huchenjira nyumbani m'wa Filipu, muhubiri wa injili, ariyekala mum'wenga wa vavo afungahe, na huchikala pkapke. ⁹ Mutu yuyu be wekala yuna asichana ane, anaali, varikala vana-tabiri. ¹⁰ Bai hurihokala be hunakala kuko siku nyinji, nabii mum'wenga dzinare ni agabo achiteremuka kula Uyahudi. ¹¹ Ariho hufikira, achihala ukanda wa Paulo, achidzifunga magulu na mikono, achamba, Roho Mutakatifu be yunaamba vivi, "Vivi ndivyo Ayahudi va Jerusalemu vandivyo mufunga mutu m'wenye ukanda uu, navo be vanda-m'wenjiza kahiza mikono ya atu va Mataifa ¹² Bai hurihokala husikira gaga, fwi fwi na atu va hatu haho, huchimusihi asipande pkenda Jerusalemu. ¹³ Ndo ye Paulo achijibu achamba, munahendadze, kurira na!kunivunza moyo? Pka kukala be Mimi, richa ko kufumbwa, nitayari hata kolabgwa kahiza Jerusalemu pka ajili ya dzina ra Bwana Jesu. ¹⁴ Bai ariho kahala wamuzi wehu, huchinyamala, huchamba, "Mahenzo ga Bwana be nagakale. ¹⁵ Baada ya siku zizo, huchihala vyombo vyehu, huchipanda pkenda Jerusalemu. ¹⁶ Baadi ya anafunzi va Kaisaria be vachi-hutua, vachimuhala mutu aehewaye Munasoni, mutu wa Kiprpo, m'wanafunzi wa kapindi ambaye ndiye be andiye kala pkapke. ¹⁷ Huriho-fika Jerusalemu, vavo ndugu be vachihukaribisha pka furaha. 18 Hata Siku ya hiriye, Paulo achenjira pka Jakobu ham'wenga nafwi, na vo atumia vosini vario- kalako. ¹⁹ Na baada ya kuvalamusa, achivaelezera mambo gosini, achitala m'wenga m'wenga, go mulungu arigo gahenda kahiza mataifa pka yo hudumaye. ²⁰ Navo variho sikira gago vachimutukuza Mulungu, vachim'wambira, "Ndugu yehu, anaona jinsi Ayahudi vario-m'wamini variyo elifu nyinji, navi vosini vans wivu sana pka ajili ya torati. ²¹ Navo veambirwa habari za pkako, kukala unavafundisha Ayahudi vosini vakalao kahiza Mataifa, kumuricha Musa, uchivaambira vasivatahiri ahoho-ao, wala vasitue mila. ²² Bai vino huhe-ndedze? Bila shaka vandasikira kukala uwe ukudza. ²³ Bai uwe henda neno riri, hupkambiraro. Huna atu ane haha ambao veika nadhiri. ²⁴ Vahale atu vavo udzitakase ham'wenga navo, nawe uvagarimie ili vanyole chigungunyu, atu vosini vapate kumanya kukala, zo habari varizopata kuhusu uwe sechitu, ela uwe m'wenye be unanendato pka kuibgwira torati. ²⁵ Ela pka habari za vo atu va Mataifa varioamini, hweandika na huchomboza hukumi yehu pka ajili yao kudzirinda vavo enye na vitu virivyo ombozwa sadaka pka vizuka na damu, na chitu chiricho hongo-lolwa na usharati. ²⁶ Kisha Paulo be achivahala vavo anaaalume, na Sikh yahiriye achdzitakasa ye ml'wenye na vavo ario kala navo, achenjira ndani ya hekalu, achitangaza habari za kutimiza Sikh za utakaso na sadaka yombozwe pka vavo vosini. ²⁷ Bai zo Siku fungahe ziriho sira, Ayahudi vario-ombola Asia vachimona mo ndani ya hekalu, vachi-tishira atu vosini, na vachimubgwira Paulo. ²⁸ Vachi-biga kululu, na pkamba, "Hem'wi anaalume va Israeli, husaidieni. Yuyu ndo mutu afundishaye chinyume cha taifa rehu na torati na hatu haha, yudzi-vaenjiza Ayunani kahiza hekalu, na pkenjiza uchafu hatu haha hatakatifu. ²⁹ Pka kukala were vadzimona Trofimo, Muefeso vaham'wenga mo mudzini, ambaye ve-fikiria kukala ye Paulo yudzim'wenjiza mo hekaluni. ³⁰ Mudzi wosini uchangalazika, atu vachikusanyika malo malo, vachimubgwira Paulo vachimuguruta, vachimomboza konze ya hekalu, nayo miryango ichifumbwa. ³¹ Na varihokala be vanatafuta njira ya kumolaga, habari zichimufikira jemadari wa shikari kukala, yo Jerusalemu be ichafuka mudzi muzima. ³² Mara iyo achihala shikari na maakida na vachiteremuka malo pka ro gurupu, navo varihomona ye jemadari na vo shikari, vachiricha kumubiga ye Paulo. ³³ Kisha ye jemadari vachimubgwira, na achilagiza afumbwe pka minyororo miri, achuza, "Yuno nani? Kisha be yuhendadze? ³⁴ Anjine kahiza wo mukutano vachibiga kululu, vara vanamba vino vara vino. Bai arihokala be kaweza kupata ujeri wa so habari, pkasababu ya so kululu, achomboza amuri ahiripke ndani ya rumande. ³⁵ Bai Paulo arihofika ndani mo vipkezani were ni asaidiwe ni shikari pka kulumizwa no wo mukutano. ³⁶ Bai kundi bomu ra atu re mutua, kuno vanabiga kululu, na pkamba, "Museni mutu yuyu. ³⁷ Bai Paulo arihokala yunahiripka ko rumande, Paulo achim'wambira ye jemadari, "Je nina ruhusiwa nipkambire neno? Naye jemadari achamba, "Jee! Unamanya Chiyunani? ³⁸ Jee, we siwe yuya Mumisiri ambaye kabila ya siku zizi, be weva-fitinisha vara atu elifu ine, vario-ehewa Aolagi, achivalongoza ko nyika? ³⁹ Paulo achamba, "Mimi be ni mutu wa Chiyahudi, mutu wa Tarso, mudzi wa Kilikia, m'wenyeji wa wo mudzi usiokala munyonge. Nakuvoya be unipe ruhusa nigombe na vava enye mudzi. ⁴⁰ Bai, ariho-mupa ruhusa, Paulo achema ho vipkezani, achivapungira mukono vo enyeji, na varihokala vanyemere zi, achigomba navo pka luga ya Chiebrania, achamba,