¹ Hem'wi ani ndugu na ani-baba, nisikizani, nichidzi-hehera mbere zenu sasa. ² Na vo atu variho-sikira ye Paulo kukala yunagomba navo pka luga ya Chiebrania be, vachizidi kunyamala, achamba, ³ Mimi be nimuyahudi, na nevyalwa Tarso, mudzi wa Kilikia, ela mimi be nererwa mudzi uu, maguluni m'wa Gamalieli,na nichifundishwa sharia za baba zehu pka usawa kabisa na nichikala mutu wa bidii pka Mulungu here m'wi m'wi mosini murivyo vivi rero. ⁴ Nichivatesa atu va njira ii hata kuvaolaga, na kuvafunga, na muvaenjiza jela, anaalume pka anaache. ⁵ Here vyo kuhani mubomu anishuhudiavyo, na vo atumia va baraza pia vosini, ambao venipa barua ili nivahirikire ndugu vakalao Dameski, ili nivarehe vavo va kuko mupaka Jerusalemu, hali vafumbwa ili vaadibiwe. ⁶ Bai nirihokala nina safiri na nina karibia Dameski, wakati wa mutsana, gafula m'wanga mubomu, kula mulunguni be uchinimirika lands zosini. ⁷ Mimi be nebgwa hotsi, na nichisikira sauti ichinambira, Sauli, Sauli, mbona unani-tesa? ⁸ Nichi-mujibu, "We ndiwe ani Bwana? Achinambira, "Mimi ndimi Jesu Munazareti, ambaye uwe be unanitesa. ⁹ Bai vavo vario kala vaham'wenga nami, vewona wo m'wanga, ela be, kavaisikirire yo sauti ya iye ariye gomba nami. ¹⁰ Nichamba, "Mino nihendedze Bwana? Bwana achinambira, " Ema, wenjire Dameski, na kuko be undaambirwa habari za mambo gosini urigo pangirwa ugahende. ¹¹ Nami niriho kala sona pkasababu ya m'wanga munji, nichilongozwa pka mikono ya vavo variokala ham'wenga nami, nichenjira Dameski. ¹² Kuko neona mutu mum'wenga dzinare no Anania, mutakatifu pka kuitua sheria na weshuhu diwa udzo ni Ayahudi vosini variokala kuko. ¹³ Achini-dzirira, na achema hehi nami, achinambira, "Ndugu yangu Sauli, wone. Nichi-munurira matso gangu, saa iyo iyo. ¹⁴ Kisha achamba, "Mulungu wa baba zehu be yudzikutsagula uwe ili umanye mahenzoge, na kumona iye m'wenye hachi na kuisikira yo sauti kombola kanwani m'wapke. ¹⁵ Maana be undakala shahidiwe pka atu vosini, wa mambo gago udzigo gaona na kugasikira. ¹⁶ Bai we unatoerani? Ema, ubatizwe,wojese dambizo na uchireha dzinare. ¹⁷ Baada ya mimi kuya Jerusalemu, nirihokala nichivoya ndani ya ro hekalu, nichikala hali ya kuzimia roho. ¹⁸ Nichimona, Nate achinambira,"Upesi wombole Jerusalemu, pka sababu vava kavanda-ukubali ushuhuda wapkako, kahiza habari zangu. ¹⁹ Mimi nichi-m'wamba, "Bwana, vanamanya vavo kukala mimi nere nichivafunga jela vavo variokala vadzi- pkamini, na kuvabiga kahiza chila sinagogi. 20 Na damu ya Stefano shahidi wa pkako yem'wabgwa, mimi nami nere nemire hehi, nichi-kubaliana na kutunza nguo zao vavo vario molaga. ²¹ Naye achinambira, " Enenda zako, pkakukala mimi be nakuhuma, wende kure pka atu va Mataifa. ²² Vachi-musikiza mupaka neno riro, vachikota kululu vachamba, "Museni iye kahiza itsi maana kafaa kuishi. ²³ Bai varihokala vanabiga kululu na kutsuha nguo zao na kutsuha -tsuha vumbi dzulu, ²⁴ iye jemadari achilagiza, aenjizwe ndani rumande,achamba, auzwe pka kubibgwa fimbo, ili amanye yo sababu hata vanamubigira kululu hali ii. ²⁵ Hata variho mufunga pka nyubgwe, Paulo achim'wambira ye akida ariyeema hehi naye, "Jee! Ni sawa sawa m'wi kumubiga mutu ariye Murumi naye kadzambwe kuhukumiwa? ²⁶ Ye akida arihosikira achenda na kum'wambira ye jemadari, achim'wamba, " We be unamala uhendedze? Pkakukala mutu yuyu be ni Murumi. ²⁷ Jemadari achidza na achimuza, "Nambira, we u Murumi? Achamba, " Ee. ²⁸ Jemadari achim'wamba, "Mimi nepata wenyeji uu pka maili nyinji. Paulo achamba, " Mimi be ni Murumi wa kuvyalwa. ²⁹ Bai vavo variokala vatayari kumuuza vachihauka. Na iye jemadari naye be achogoha, arihomanya kukala Paulo ni Murumi na pkasababu yudzimufunga. ³⁰ Siku ya hiriye ili amanye uhakika ni pka noni yushitakiwa ni Ayahudi,achimufugula, acahamuru abomu va makuhani na baraza yosini vaonane. Achimureha Paulo tsini, na achim'wika mbere zao.