¹ Baada ya gago kugoma, Paulo achiveha anafunzi ili kuvaonya, achilagana navo na achihauka achenda Makedonia. ² Naye baada ya kuchira pande zizo na kuvafariji pka maneno manji, be achifika Uyunani. ³ Ariho sagala kuko miezi mihahu, na Ayahudi kumupangira mai, arihomala pkenda Shamu pka njira ya bahari, bai yemubidi kuya na njira ya Makedonia. ⁴ Bai atu vava vachimutua naye ni Sopatro Mberoya, m'wana wa Piro, na Aristarko na Sekundo, atu va Thesalonike, na Gayo mutu wa Debe, na Timotheo na Tikiko na Trofimo, atu va Asia. ⁵ Ela atu vavo vehutangulia na kuhutariza Troa. ⁶ Na fwi fwi huchisafiri baada ya siku za mikahe isiyo-enjizwa hamira, huchombola Filipi, na huchifika Troa, safari ya siku tsano, huchikala kuko siku saba. ⁷ Hata siku ya pkanza ya wiki, hurihokala hudzonana ili kumega mukahe, Paulo achivahubiria vo amini, naye achenderera na maneno-ge hata usiku wa manane. ⁸ Pkekala na taa nyinji kahiza yo horofa iyo hurihokala hudzikutanika. ⁹ Na muvulana mu'wenga, dzinare ni Eutiko, were yusegere dirishani, achiremerwa ni usinzizi sana, hata Paulo ariho-enderera kuhubiri sana, achiremerwa ni usinziziwe na achibgwa kula gorofa ya hahu, achunulwa be yudzefwa. ¹⁰ Ela Paulo achitima na achidzi-goloza dzulu ya yo maiti, na kumukumbatia,achamba, "Musihende fujo maana uzimawe be ucheremo ndaniye. ¹¹ Paulo be achipanda zdulu kaheri, achimega mukahe, achirya, na achizidi kuhubiri hata madzcha, naye be siye achenda zapke. ¹² Vachimureha ye muvulana yu muzima vachifarijika faraja Bomu sana. ¹³ Ela fwi fwi huchikala mbere za Paulo huchipanda meli kenda Aso, huchikusudia kuupakia Paulo kuko, pka kukala vivyo ndivyo arivyokala be yudzilagiza,ela iye m'wenye were yupanga pkenda pka magulu. ¹⁴ Bai hurihofika kuko Aso huchimupakia, kisha huchifika Mitilene. ¹⁵ Na huchisafiri kula kuko, na Siku ya hiri huchifika hatu halolanao na Kio, Siku ya hahu huchifika Samo, huchikala Trogilio, Siku ya nane huchifika Mileto. ¹⁶ Pka sababu Paulo were yupanga kuchira Efeso pka meli ili asitoe Asia, pka kukala were yuna haraka, achimala afike Jerusalemu siku ya Pentekoste, chikala indewezekana. ¹⁷ Kula Mileto Paulo achihuma atu pkenda Efeso, achiveha atumia va kanisa. ¹⁸ Varihofika pkapke Paulo achivaambira "M'wim'wi enye be munamanya hangu siku ya pkanza nirihovyoga Asia, jinsi nirivyokala pkenu wakati wosini. ¹⁹ Nichimuhumikira Bwana pka unyenye-kevu wosini, na pka matsozi, na majaribu nirigo gapata pka njama za Ayahudi. ²⁰ Munamanya sidzi-epushire kahiza kuvatangazira neno rorosi riwezaro kuvafaa, ela nevafundisha wazi wazi na nyumba pka nyumba. ²¹ Nichivashuhudia Ayahudi na Ayunani vatubu pka Mulungu, na kum'wamini Bwana wehu Jesu masihi. ²² Bai sasa lolani nabgwira njira pkenda Jerusalemu hali nidzifumbwa mo rohoni, nisimanye go mambo gandigo nipata kuko. ²³ Isihokala Roho Mutakatifu, mudzi pka mudzi yunani-shuhudia achamba, "Vifungo na shida vinanitariza. ²⁴ Ela be sigatala maisha gangu kukala ni chitu cha muhimu pkangu here kumarigiza m'wenendo wangu na huduma iyo niriyo-ihochera pka Bwana Jesu, kushuhudia Habari Mbidzo za neema ya Mulungu. ²⁵ Na sasa lolani, mimi namanya kukala m'wi m'wi nirio vahubiria ufalume wa Mulungu, nichenda kuko na kuko, be kamunda-niona uso wangu kaheri. ²⁶ Pka vivyo navashudia siku ii ya rero, kukala mimi be sina lawama pka mulatso wa mutu yoyosi. ²⁷ Pka kukala mimi sikaharire kuvahubiria habari za kusudi rosi ra Mulungu. ²⁸ Bai, mudzitunze roho zenu, ham'wenga na ro kundi rosini, ambaro ye Roho Mutakatifu yudzim'wika m'wi m'wi kukala aemereri, mupate kuririsa kanisa ra Mulungu, ariro-rigula pka mulatsowe m'wenye. ²⁹ Mimi namanya be baada ya mimi nidzihauka, mbala vario akali vanda-enjira pkenu, vasihurumie ro kundi. ³⁰ Kisha kahiza m'wi m'wi enye vandauka atu vagombe mai, vava-vuhe anafunzi ili vavatue vavo. ³¹ Pka vivyo Bai chesani, muchimanya kukala pka miaka mihahu, usiku na mutsana, sirichire kumuonya chila mutu pka matsozi. ³² Bai sasa mimi navaika kahiza mikono ya Mulungu na pka neno ra neema-ye ambaro rinaweza kuvadzenga na kuvapa urithi ham'wenga na vosini vario-takaswa. ³³ Sitamanire pesa za mutu au dahabu au nguo za mutu. ³⁴ M'wi m'wi enye be munamanya kukla pka mikono yangu ii, be ihumika pka mahitaji gangu na vavo vario kala ham'wenga nami. ³⁵ Kahiza mambo gosini, mimi nidzivaonyesa kukala pka kubgwira kazi vivi, idzivapasa kuvasaidia achia na kugakumbuka maneno ga Bwana Jesu, jinsi arivyogomba m'wenye, "Ni baha komboza kuriko kuhochera. ³⁶ Arihomarigza kunena gaga, webiga magoti, achivoya ham'wenga navo vosini. ³⁷ Vachirira sana vosini, vachi-mubgwerera Paulo singoni vachimu-busu busu. ³⁸ Vachihuzunika sana zaidi pka sababu ya ro neno ariro amba kukala "Kamunda-niona uso wangu kaheri. Vachimusindikiza hata melini.