¹ Baada ya mambo gago, Paulo achuka Athene achenda Korintho. ² Achimona Muyahudi mum'wenga dzinare ni Akila, muvyalwa wa Ponto, naye wekudza kula itsi ya Italia siku chache tu, ham'wenga na Pricila muchewe, pka sababu Klaudio weamba Ayahudi vosini vaombole Rumi, naye Pauloa chenda ko pkao. ³ Na pka kukala kazi yao ya ufundi be were ni m'wenga, achikale navo, vachihenda kazi ham'wenga, pka kukala vere ni mafundi va kushona mahema. ⁴ Pka vivyo Paulo achomboza hojaze kahiza sinagogi chila sabato, achijaribu kuvavuha Ayahudi na Ayunani. ⁵ Bai Sila na Timotheo variho teremuka kula Macedonia Paulo be wedzombozera sanà kahiza ro neno, achivashuhudia Ayahudi kukala Jesu ni Kristo. ⁶ Bai varihokala vo Ayahudi vadzi-mupinga Paulo, na kumuhukana Mulungu, achikuta nguoze, achivaambira, "Damu yenu naikale dzulu ya vitwa vyenu, Mimi be nimudzo, hangu vivi Sara be nanenda pka mataifa. ⁷ Kisha achuka kuko achenjira nyumani m'wa mutu mum'wemga dzinare no Tito Yusto, mutu amogohaye Mulungu, ambaye yo nyumbaye were idzihakana na sinagogi. ⁸ Na Krispo, mubomu wa sinagogi, achim'wamini Jesu ham'wenga na nyumbaye yosini. Akorintho anji variho sikira, veamini na vachibatizwa. ⁹ Bwana achim'wambira Paulo kahiza maono usiku, "Usohohe, ela nena, na usinyamale. ¹⁰ Pka kukala mimi be niham'wenga nawe, wala kahana mutu andiye kudhuru, pka kukala mimi be nina atu anji kahiza mudzi uu. ¹¹ Bai Paulo achikala kuko muda wa m'waka mum'wenga. ¹² Hata Galio arihokala gavana wa Akaya, Ayahudi vachim'wemera Paulo pka akili m'wenga, vachimureha mbere ya chihi cha hukumu. ¹³ Vachamba, mutu yuyu be yuna vavuha atu ili vam'wabudu Mulungu chinyume cha sharia. ¹⁴ Na Paulo arihomala kugomba, Galio achivaambira Ayahudi, "Kala ringekala jambo ra dhuluma au ra utu ui, hem'wi Ayahudi, be ingekala ni hachi mimi pkelewana nam'wi. ¹⁵ Ela ichikala be ni kuhusu maneno na madzina ga sheria yenu, be, galoleni m'wim'wi enye, maan mimi be senzi nikale m'wamuli wa mambo gago. ¹⁶ Achi-vainga vahauke haho mbere ya chihi cha hukumu. ¹⁷ Bai vosini vachimubgwira Sosthene, mubomu wa sinagogi,vachimubiga mbere ya chihi cha hukumu. Ela ye Galio be kaonere mambo gago kukala ni chitu. ¹⁸ Paulo baada ya mambo gago, achizidi kukala kuko Siku nyinji sana, kisha achilagana na ndugu achivuka na pkenda Shamu, na Prisila na Akila vachenda ham'wenga naye, na arihomarigiza kunyola chitswa-che kuko Kenkerea maana were yuna nadhiri. ¹⁹ Variho fika Efeso, achivaricha Prisila na Akila kuko, ela iye m'wenye achenjira kahiza sinagogi, achihojiana na Ayahudi. ²⁰ Bai varihomala Paulo akale navo Siku nyinji zaidi,kakubarire. ²¹ Ela welagana navo, achamba, "Nindauya pkenu kaheri, Mulungu achiniajalia, na achivuka achihauka haho Efeso. ²² Na Paulo arihotima Kaisaria, achipanda dzulu ili kuvalamusa kanisa, kisha achiteremuka Antokia. ²³ Hats arihokala kuko Siku kadhaa, achuka, achichira kahiza itsi ya Galatia na Frigia, mudzi pka mudzi, achivaimarisha anafunzi. ²⁴ Bai Muyadi mum'wenga dzinare ni Apolo muvyalwa wa Iskanderia, mutu wa elimu, achifika Efeso, naye wekala be hodari kahiza maandiko. ²⁵ Apolo were yufundishwa njira ya Bwana, na pka kukala rohoye were inamusukuma, weanza kunena na kufundisha tototo habari za Jesu, naye be were yunamanya ubatizo wa Johana tu. ²⁶ Bai Apolo achanza kunena pka ujasiri kahiza sinagogi, hata Prisila na Akila, variho musikira, vachimuhala, na vachim'weleza njira ya Bwana tototo zaidi. ²⁷ Na arihomala kuvuka bahari ili ende mupaka Akaya, ndugu vachimuhiza, vachivaandikira vavo anafunzi vamuhochere, naye arihofika, achivasaidia sana go anafunzi ambavo veamini, pka neema ya Mulungu. ²⁸ Pka kukala Apolo be wevashinda vo Ayahudi wazi wazi mbere za atu vosini, achonyesa pka maneno ga maandiko kukala Jesu be ni Masihi.