¹ Kisha varihochira kahiya Amfipoli na Apoloni vachifika Thesalonike, ambako pkekala na sinagogi ra Ayahudi. ² Na Paulo here irivyokala kawaidaye, achenjira mumo varimo, achihojiana navo pka maneno ga maandiko pka sabato tahu. ³ Achifunula na pkeleza kukala, vyemupasa, Jesu kuteswa na kufufuka kahiza nyufu, na kukala, Jesu yuyu nivaaambiraye m'wim'wi habarize be ndiye Masihi. ⁴ Anjine miongoni m'wao be va chaamini, vachibgwirana na Paulo na Sila, na Ayunani vario mogoha Mulungu, anji sana, na anaache vario na cheo so achache. ⁵ Na Ayahudi be vachona wivu, vachidzi-harira atu sehemu vario ovyo na vasio na sifa mbidzo, navo vachitsutsa kundi ra atu, vachihenda fujo mo mudzini, vachitua atu va nyumba ya Yasoni, vachimala kuvahirika mbere za atu va mudzi. ⁶ Na variho vakosa, vachimu-buruta Yasoni na baadhi ya ndugu mbere za abomu va mudzi, vachibiga kululu vachamba, "Atu vava vario-pendula urim'wengu, be vafika kuku nako. ⁷ Na Yasoni yudzivakaibisha, na vava vosini be vanahenda mambo garigo chinyume cha amuri za Kaisari, vachamba kukala, yukuko mufalume munjine, aehe-waye Jesu. ⁸ Vachangalaza wo mukutano na go abomu va mudzi vario-sikira maneno gago. ⁹ Ela variho mutoza makosa ye Yasoni na anzie be vachivaricha vende zao. ¹⁰ Bai usiku uwo, vo ndugu vachivahirika Paulo na Sila mupaka Beroya. Na variho fika kuko, vachenjira pkenye sinahogi ra Ayahudi. ¹¹ Atu vava be vere no arim'wengu kushinda atu va Thesalonike, pka kukala verihochera to neno, pka udzo wa moyo, vachigachunguza go maandiko chila siku, I'll vaone kukala mambo gago be neo garivyo. ¹² Bai atu anji miongoni m'wao, be vachaamini, na anaache vachiyunani enye cheo na anaalume we achache. ¹³ Ela vo Ayahudi va Thesalonike variho pata habari kukala neno ra Mulungu rina-hubiriwa ni Paulo kuko Beroya, vachenda kuko nako ili kuvachafua na kutatiza wo mukutano. Bai pka haraka sana vachimusa Paulo ende hata pwani, Ela ye Sila na Timotheo vachisala kuko. ¹⁵ Ela vavo vario-musindikiza Paulo, vachimuhirika mupaka Athene, na baada ya kuhochere malagizo ili vagahirike pka Sila na Timotheo, kukala be vasitoe kumutua, vachuya. ¹⁶ Bai Paulo arihokala be yunavarinda anzie kuko Athene na kona wo mudzi ambao udziofzala vizuka, rohoye be yetsukirwa sana. ¹⁷ Bai kahiza ro sinagogi ,achi-hojianana Ayahudi na atu vario mogoha Mulungu, na vavo vario-tungana ko sokoni chila siku. ¹⁸ Ela baadhi ya atu va Waepikureo na Wastoiko, enye ujuzi, vachonana Nate. Anjine vachamba, "Ni mupuzi yuyu yunamala kugombani? Anjine vachamba, " Yunaonekana kukala yuyu ni mutangaza habari za milungu misha, pka kukala were yunahubiri habari za Jesu na ufufulo. ¹⁹ Vachimubgwira Paulo, vachimuhirika Areopago, vachamba, "Je! hunaweza kumanya maana ya elimu in mbisha ambayo unaigomba? ²⁰ Pka kukala unareha mambo masha no masikironi m'wehu, bai hundahenza kumanya, yo maana ya mambo gaga. ²¹ Pka kukala vo atu va Athene na ajeni variokala kuko, vere kavana nafasi ya neno rorosi ela nikomboza habari na kusikiza habari za mambo masha. ²² Paulo achema kahikahi ya Areopago, achamba, "Hem'wi atu va Athene, kahiza mambo gosini naona kukala m'wim'wi be muatu va kufikiria sana mambo ga dini. ²³ Pka sababu nirihokala ninachira kuku na kuko na kona mambo ga ibada yenu, neona madhabahu iriyo andipka maneno gaga, " Pka Mulungu Asiye manyikana. Bai Mimi navahubiri habari-ze iye ambaye m'wim'wi be munam'wabudu bila kumumanya. ²⁴ Ye Mulungu ariyeumba urim'wengu na vitu vyosini virivyo mumo, iye, Pka kukala ni Bwana wa mbingu na itsi, iye be kakala kahiza hekalu ririrodzembwa pka mikono. ²⁵ Ela be kahumikirwa pka mikono ya anadamu here pkamba yunamala chochosi, pka kukala iye ndiye yunavapa atu vosi uzima na pumzi na vitu vyosini. ²⁶ Kula pka mutu mum'wenga be weumba chila taifa ra anadamu, vakale dzulu ya uso wa itsi, baada ya kuvaikira misimu, arizo zipanga hangu kapindi, na mihaka ya makalo gao. ²⁷ Ili vamutafute Mulungu, idzahokala ni pka kupapasa papasa, vakamone, idzaho kala kakala kure na chila mum'wenga wenu. ²⁸ Pka kukala ndaniye iye hunaishi, kisha hunanenda, na kukala na maisha gehu. Here vivyo ambavyo mum'wenga wenu, mutungaji wa maira arivyo-emba, "Maana be fwi fwi hosini hu lukolwolwe. ²⁹ Bai pka kukala fwi fwi be hu lukolo lwa Mulungu, kaihupasa kufikiria kukala U Mulungu be se mufana wa dahabu au pesa au dziwe, vitu virivyo-stombwa pka ujuzi na akili za anadamu. ³⁰ Bai, ho zamani za ujinga, Mulungu wedzihwenda kaona, ela bai sasa yunalagiza atu vyosini va chila hatu vatubu. ³¹ Pka kukala be ye Mulungu weika Sikh andiyohukumu arim'wengu pka hachi, pka mutu iye ariye mutsagula, naye wevapa atu vosini uhakika wa mambo gaga, pka kumufufula kahiza nyufu. ³² Bai varihosikira habari zizo za ufufulo wa nyufu, anjine vehenda muzaha, anjine vachamba, "Hundasikiza kaheri, kahiza habari zizo. ³³ Bai baadaye Paulo achuka na kuvaricha. ³⁴ Ela baadhi ya atu vachibgwirana na ye Paulo, vachaamini, kahiza vavo no Dionisio, Mwareopago, na m'wanamuche mum'wenga dzinare ni Damari, na atu anjine ham'wenga navo.