¹ Eba, nene nsilubukile? Ati, msili mutumua? Ati, nene nsyaamumwene Yesu Mulopue wetu? Eba, mwemue temali kibwezia kya miilo yane indinabombela Mulopue ? ² Anzia kine bange tebanghinikile nangue ndi mutumua, mwemue munghinikile nangue ndi mutumua, pantu mwemue mu buumo bwenu ni kristu musininkiziizie nangue nene ndi mutumua. ³ Kwisampulula kwane ku bantu bandebwile ni koku. ⁴ Ati, kubako nene nsili na nsambu ya kupeelua bilio ao bya kumina pa mulandu wa mwilo undinabomba? ⁵ Eba, nsili na nsambu ya ya kuupa mwanakazi azumiine ni kuya nakue nga vilivyakita batumua bange, ni vilivyakita Petro ni balabakue kwa Yesu? ⁶ Kubako nene ni Barnaba, i bapalile kwibombela na maboko etu pakuti tube ni bintu bitubuliilue? ⁷ Ati emwe, ni lukale ki aliwabombela kyalo ni kuya waisazia ye mwine? Ati, ni mulimi ki asiliwalia bya mu bukaba bwakue? Kabili ni musungi ki aliwasunga nghombe koku tekuba wafinako mabeele a kumina? ⁸ Eba, temumanine nangue nene ndimukulanda palua bintu bilibyakitika nsiku yonse? Pantu mizilo yakua Musa ni yo iliyalanda evio vyenka. ⁹ Mu kitabu kya Mizilo mulembelue evi, "Tekumukaka nghombe ku kanua luuliwamubombia pakusokola nghano." Ati, kubako papa Leza alimukulanda palua nghombe? ¹⁰ Eba, Leza talimukulandila fwefue? kulanda kisinka fwefue i baalembeelue totu twebo. Olia aliwalima ni olia aliwazombola, bonse balibabomba baswapiile kusoloziiwa. ¹¹ Kine fwefue twaabyele mbezu ya kimweo mukati mwenu, ati, kuti kyabiipa kine twazombola bintu bya kimubili kuli mwemue? ¹² Kine bange bali ni nsambu yakuti mubakwasie, paliibufi fwefue? Inzi fwefue tetwizi kukonka nsambu yetu. Tulitwasipikizia lyonse tukeeza kwanzia mpunda iweme yakua Yesu kupokelelua. ¹³ Mwemue mumanine kisinka nangue balia balibabomba mu nghanda yakua Leza balibalia bilio bya momo mwenka. Ni balia balibaelela ngelelo pa altare, ni bo balibalia bintu bilibyaelelua pa altare. ¹⁴ Evi Mulopue i vyaanine balia balibasimikila mpunda iweme baye balia bintu bilibyafuma mukusimikila mpunda iweme. ¹⁵ Inzi pa ezi nsambu, nene nsyaakonkelepo ata imo. Kindimukulembela evi, te pa mulandu wa kumilomba . Pantu kuti kyawama ne nfue evi unge akeeza kughinoonena kindinaitasiiziapo. ¹⁶ Mwe bakwane, nsivinda kwitasia lundinasimikila mpunda iweme, ndinasimikila sie pantu i vinaaninue. Kabili kine nsisimikiile mpunda iweme, kyaakanmbiipila!. ¹⁷ Kine ndinabomba mwilo wane natonene, ndi ni kilambu. Inzi kine ndinaubomba tekuba natonene, ndinaubomba sie pantu i vinaaninue. ¹⁸ Eba, ale nsazio yane ni kiki? Nsazio yane ni kusimikila mpunda iweme pasili malipilo, ni pasili kulomba nsambu indinayo mukusimikila mpunda iweme. ¹⁹ Nene ndubukile nsili muzia wa muntu, inzi anzia kine kili evio, ngialwile kuba muzia wa bonse pakuti ntwale bantu bengi kuli Yesu Kristu. ²⁰ Lunaya nali pamo ni Bayuda, ndinaya nali nga Muyuda kumona nmbapwanike ni Kristu anzia kine ne mwine nsilombwelue na mizilo yakua Musa. Naitabiile kulombolua na mizilo lunaali pamo nabo pakuti nmbapwanike ni Kristu. ²¹ Kabili lunaya nali pamo ni Bazima, ndinaya nali nga Muzima pakuti nmbapwanike ni Kristu. Inzi tekulanda nangue nene nsinakiile mizilo yakua Leza, kulanda kisinka, nene nombwelue na mizilo yakua Kristu. ²² Ni pa bantu banake mu kiketekelo, ndinaalika nga bene kumona nmbapwanike ni Kristu. Ndinabomba na bonse mu bintu byonse kumona sie nmpususiepo bamo pakati kabo. ²³ Bebi byonse ndinabikita pa mulandu wa nsimiko kumona sie nene nmpaalue. ²⁴ Kisinka mwemue mumanine bwino nangue bantu balibakundukila kusaziiwa, bonse balibakunduka?. Inzi olia aliwakundukisia kukila bonse, i aliwasaziiwa. Kansi mwe bakwane kundukisie mwanzie kumona sie ni mwe mukasaziiwe. ²⁵ Nkunduki yonse iliyaibeelezia, iliyaibiikila mafunde ni kwikaania yo ine mu bintu bimo bimo. Ezi nkunduki iliyakita evio pakuti ilambulue kilambu kilikyainooneka. Inzi fwefue kitulitwakitila evi, ni pakuti tukalambulue kilambu kya muyayaya. ²⁶ Keki ikindinakundukila lubilo nakentele kundimukuya, nene ndinga ne muntualiwaumana makoofi, inzi nsili nga muumi wa makoofi aliwauma makoofi mu mwela. ²⁷ Nene ndinaemia mubili wane kuti nguteeke nkakeeza kukaanua pa kyamba kya kusimikila bange.