¹ Mwe bakwane, ntonene mulanguluke bintu byaakitikiile bikolue byetu byaali byaenda pamo ni Musa. Byonse byaalibyakingiliilue na lilezi, kabili byonse byaile kwabuka lyezi lyakasi. ² Bikolue byonse byaabatiziiziwe mu lilezi ni mu lyezi, evi baye bali basambi bakua Musa. ³ Bikolue byonse byaaliile bilio bimonke bya kimweo. ⁴ Ni kumina menda a kimweo. Azo menda a baali baminine aafumine mu lyalala lya kimweo lyaali lyaya pamo nabo leli lyalala, i Kristu mwine. ⁵ Inzi bengi pakati kabo pantu tebaamuwamiiziizie Leza, baafwiliile mu kaseeba. ⁶ Bebi bintu byaakitikile pa mulandu wa kutukengezia, kansi mwe bakwane tekuti tuye twali na lwinso lubi nga lolia lubaali nalo. ⁷ Mwemue tekuye mwapupamikisi nga vibaali bapupa bamo pakati kabo. Malembo alialanda evi, "Bantu baikeele, baaliile ni kumina, kabili baimeene ni kutendeka kukinda." ⁸ Kansi fwefue tulekele kukita bukende nga vyaakitile bamo pakati kabo. Bantu 23,000 bonse baafwile sie busiku bumo. ⁹ Mwe bakwane, fwefue tekuti tumwezie Mulopue nga bamo pakati kabo vibaamweziizie. Babo bene baasuminue na nzoka ni kufua. ¹⁰ Tetupalile kwitendooka nga vyaitendookele bantu bamo pakati kabo, babo bainoonenue na malaika ngipaani. ¹¹ Bebi bintu byonse byaabakitikiile evi bange baye bamwenako. Kabili byaalembeelue kuti biye byatusoka pantu tuli mu musita wa mpeleezio ya kyalo. ¹² Kansi kubalua muntu emwene waimeene sinta, elabukile akeeza kupona. ¹³ Meezio onse amulimwaeziwa, aliaeziiwa bantu bonse. Leza wetu ni wa kisinka pa bintu byonse bialaile. Kabili wene tavinda kumilekelela kweziwa kukila maka enu, Leza waya wamipeela maka a kusipikizia ni musango wa kwanzia azo meezio lualiaiza. ¹⁴ Kansi mwe bakwane, lekelele kupupa mikisi. ¹⁵ Ndimukumyana namanine nangue muli bantu ba mulangue. Pingule mwe bene pa bebi bintu bindimukulanda. ¹⁶ Musita wa kintamba, kikombe kya nsantilo itulitwasantila Leza, ati, lutulitwamina, tetulitwailunda ku mulopa wakua Kristu? Kabili ni musita utulitwamokola mukate ni kuulia, eba, tetulitwailunda ku mubili wakua Kristu? ¹⁷ Mukate ni umo, anzia kine tulitwalyako bengi, tuli sie mubili umo pantu tulitwalia ku mukate umo. ¹⁸ Mupalile kumana nangue Baizraeli balibalia bupe bweleelue Leza, balibailunda na altare yeleeluepo bupe bwakua Leza. ¹⁹ Kinaakeba kulanda ni keki? Mikisi ni byeleelue mikisi ni bya mpuni? ²⁰ Bebi byonse bibili tebili na kantu, inzi nene nalanda nangue, bantu basimanine Leza, balibaelela ngulu. Tebezi kwelela Leza, inzi mwe bakwane nene nsitonene mulundane na ngulu. ²¹ We muntu umonke teupalile kumina bya ku kintamba kyakua Mulopue ni kumina bya ku kintamba kya mikisi. Teupalile kulia bya ku kintamba kyakua Mulopue ni kulia bya ku kintamba kya mikisi. ²² Eba, tutonene kumulengia Mulopue aye wali ni bunkua? Ati, mulangakeene nangue fwefue tuli ni maka kukila Leza?. ²³ Bange bantu balibalanda evi, "Nene ndi ni nsambu ya kukita bintu byonse." Ee, inzi te byonse biweme, "Mwe bakwane, fwefue tuli ni nsambu ya kukita bintu byonse ." Inzi te byonse bili ni kibwezia. ²⁴ Kubalua muntu tekuti akebe kwiwamiizia. Inzi kubalua muntu akebe sie kuwamiizia bange. ²⁵ Muli ni nsambu ya kulia nama yonse iliyasitua mu kisisiizio pasili kwipuzisia palua nama imuzilikilue, ²⁶ Pantu malembo alandile evi, "Kyalo ni byonse bilimo, byakua Mulopue." ²⁷ Kine muntu asizumiine wamikupa ku matebeto ni mwemue mwaitabila kuya, lie byonse bimulikuteaniiziwa pasili kwipuzisia palua nama imuzilikilue. ²⁸ Kine muntu wamyana nangue, "bebi bilio byeleelue mikisi tekulie pantu wamyana," Kabili pantu muzilikilue. ²⁹ Kinalandila evi, te pa mulandu wenu, inzi ni pa mulandu wa unge muntu. Kuti mwangipuzia evi, "Ale nsambu yetu kiilikukaaniiziwa pa mulandu wa unge muntu ni kiki? ³⁰ Kine nene namusantila Leza pa bilio bindimukulia, ale ndikupingwilua ki pa bebio bilio?" ³¹ Kansi kyonse kiuliwakita, ni kyonse kiuliwalia ao kumina, kitila sie pa mulandu wa bulumba bwakua Leza. ³² Tekubazie Bayuda ao Bazima ao kilonghano kyakua Leza. ³³ Kite mundinakitila nene ndinakeba kuwamiizia bange mu bintu byonse bindinakita pasili kukeba kwiwamiizia ne mwine, ndinawamiizia bonse evi bakapusuke.