¹ Kansi kite mundinakitila nga evelia nene vindinakita mwaali mwakitila Kristu. ² Namitasia pantu lyonse mulimwananguluka ni kukonka bwino bwino nga vinaamisambiliziizie. ³ Inzi ntonene mumane nangue Kristu i mutue pa balalume bonse. Mulume i mukulu pa mukazi wakue, ni Leza i mukulu pali Kristu. ⁴ Mwalalume lualiwapepa ao kulanda mpunda iapeelue na Leza wavwele kisote ku mutue, wamonia Kristu busoni. ⁵ Inzi mwanakazi asivwele kitambala ku mutue lualiwapepa ao kulanda mpunda iapeelue na Leza, wamonia mulume wakue busoni. Pantu waaluka nga mwanakazi atebwilue kakuuzu. ⁶ Kine mwanakazi tavwele kitambala ku mutue, atebulue kakuuzu. Inzi pantu mwanakazi kutebulua kakuuzu kilikyaleeta busoni, kansi avwale sie kitambala ku mutue. ⁷ Mwalalume ni ye tekuti avwale kisote ku mutue wakue,pantu wene apaleene ni Leza, kabili i bulumba bwakua Leza. Inzi mwanakazi i bulumba bwa mulume wakue. ⁸ Pantu mwalalume luabumbilue, taafumine ku mwanakazi. Inzi mwanakazi wene luabumbilue, waafumine ku mwalalume. ⁹ Mwalalume taabumbilue pa mulandu wa mwanakazi, inzi mwanakazi i waabumbilue pa mulandu wa mwalalume. ¹⁰ Mwanakazi i kialiwavwalila kitambala ku mutue wakue evi kie kyali kilangililo kya kukindika mulume wakue, kabili aliwakita evi pa mulandu wa bamalaika. ¹¹ Inzi mubwikazi bwetu muli Mulopue, mwanakazi bunke takumeene pasili mwalalume, mwalalume ni ye takumeene pasili mwanakazi. ¹² Pantu nga evelia mwanakazi viafumine ku mwalalume, mwalalume ni ye aliwavyalua na mwanakazi. Inzi baba babili baabumbilue na Leza waalengele bintu byonse. ¹³ Pingule mwe bene: Ati, mwanakazi kuti wamulomba Leza tekuba wavwele kitambala ku mutue? ¹⁴ Mibeele yetu ni yo iliyamilangisia nangue ni kya busoni mwalalume kuya wali ni misisi ileepele. ¹⁵ Inzi mwanakazi kine ali ni misisi ileepele, bukindami bwakue. Mwanakazi waapeelue misisi ileepele pakuti iye yamuvimbile ku mutue wakue. ¹⁶ Inzi kine kuli muntu aliwakeba kuleeta bikanza palua ozu mulandu, amane nangue fwefue pamo ni bilonghano byakua Leza, tekuli namibeele inge musita wa kupepa. ¹⁷ Inzi nsimitasia pa bintu binsyalinamyana, pantu kulonghana kwenu tekuweme. ¹⁸ Naunvwile nangue lumulimwalonghana mulimwapusana, nene ndinaitabiziako bimo. ¹⁹ Ee, evio ivikipalile kuba kyali, evi balia baketekeele kisinka bamanike. ²⁰ Kulanda kisinka, lumulimwalonghana temwalia kintamba kyakua Mulopue. ²¹ Pantu lumwalia, kubalua muntu aliwalia sie bunke bilio byakue ni kumina divai yakue. Ni pakako bange balibazikia ni nzala koku bange balimukukolua. ²² Eba, temuli na nghanda mwakuti muye mwaliila ni kuminina? Evi ivimulimwafuupula kilonghano kyakua Leza ni kumonia busoni balia basili na bilio. Eba, mulimukukeba nmyane syani? Mutonene nmitasie? Iya, nsimitasia!. ²³ Aza i masambilizio anaapeelue na Mulopue ni anaasambiliziizie nangue busiku bwapeenue Mulopue, waabuulile mukate, ²⁴ Wamusantila Leza, waumokola walanda, "Poke mulie, ozu i mubili wane upeenue pa mulandu wenu. Kite evi lyonse lumwananguluka." ²⁵ Kabili lubaapwile kulia, waabuulile kikombe walanda, "Keki kikombe ni kipingo kya lenu kyakua Leza kifikiliziiziwe na mulopa wane. Lyonse lumulimwamina, kite evi lyonse pakunanguluka." ²⁶ Lyonse lumulimwalia ozu mukate ni kumina ezi divai, mulimwasimikila nfua yakua Mulopue mpaka luakabwela. ²⁷ Ni pakako, kine muntu walia mukate wakua Mulopue ni kumina divai yakue mu musango ubi, ozo muntu wabalila mubili ni mulopa wakua Mulopue. ²⁸ Kansi kubalua muntu etoosyenke mane alie ozu mukate ni kumina ezi divai. ²⁹ Pantu kine muntu walia ni kumina pasili kwinika bupilibulo bwa mubili wakua Mulopue, ozo muntu waikolomwena kukandua luali walia ni kumina. ³⁰ Ni pakako bengi pakati kenu i kibalwaliile ni kwaluka batope, bange ni bo i kibaafwiliile ³¹ Kabenge tulitwatendekanke na kwitoosia, nga tetulitwakandua na Leza. ³² Inzi tulitwafundua ni kukengeziiwa na Mulopue, evi tekuti tukatanininue nsambu pamo ni bantu ba mu kyalo. ³³ Ni pakako mwe bakwane, lyonse lumulimwakolonghana kulia kintamba kyakua Mulopue, pembelane. ³⁴ Kabili kine umo pakati kenu ali ni nzala, aye alie ku nghanda yakue akeeza kukandua na Leza mukulonghana kwenu. Inzi pa milandu inge, naakeeza nkalungike koko kwenka.