¹ Mwe bakwane, ntonene mumane bwino bwino palua bebi byabupe byakua Mweo Muzuuke. ² Mumanine nangue lumwaali temunazumine, mwaali mwanzeezele ni kuya mwapupa mikisi. ³ Keki i kinamyanina nangue muntu alombwelue na Mweo Muzuuke tavinda kulanda nangue, "Yesu atiipue" Kabili tekuli ata umo wakuvinda kulanda nangue, "Yesu ni Mulopue" kine talombwelue na Mweo Muzuuke. ⁴ Mwe bakwane kuli misango ilekenkeene ya byabupe byakua Mweo Muzuuke. Inzi aliwapaana ni mweo umo sie. ⁵ Kuli misango ilekenkeene ya kubomba, inzi Mulopue aliwabombelua niumo. ⁶ Kuli miilo ilekenkeene, inzi Leza aliwabomba miilo yonse mu bonse ni umo. ⁷ Inzi kubalua muntu aliwapeelua kyabupe na Mweo Muzuuke pakuti bonse bakuulue. ⁸ Mweo aliwapeela umo keebo ka maano, ni unge aliwapeelua keebo ka mulangue na Mweo umonke. ⁹ Kabili Mweo umonke i aliwapeela umo kiketekelo, ni unge aliwapeelua buvinde bwa kukosia balwele na ozo wenka Mweo. ¹⁰ Umo aliwapeelua kyabupe kya kukita bipezia maano, unge aliwapeelua kyabupe kya kulanda mpunda iapeelua na Leza, unge aliwapeelua kyabupe kya kwinika byabupe kine ni bya kiine ao kine ni bya bufi. Ozu wenka Mweo aliwapeela umo kyabupe kya kulanda lulimi lweni, kabili aliwapeela unge kyabupe kya kulondolola musango wa keebo kalikalandua. ¹¹ Ozu wenka Mweo Muzuuke i aliwakita bebi bintu byonse ni kupeela kubalua muntu kyabupe kiibeeleele muatoneene. ¹² Kulanda kisinka Kristu ali nga mubili umo uli ni biizo bingi, anzia uli ni biizo biibeeleele, mubili wene ni umo sie. ¹³ Fwefue bonse, anzia kine tuli Bayuda ao Bazima, kabili anzia kine tuli bazia ao balubukile, twaabatiziiziwe mu Mweo Muzuuke kuti tube mubili umo. Fwe bonse twaapokeleele Mweo Muzuuke. ¹⁴ Mubili teukitilue sie na kiizo kimo, inzi ukitilue na biizo bingi. ¹⁵ Kine kuulu kwalandanangue, "Nene nsili kiizo kya mubili pantu nsili kuboko." Ati, kuulu te kiizo kya mubili? ¹⁶ Kabili kine kutui kwalanda nangue, "Nene nsili kiizo kya mubili pantu nsili linso." Ati, kutui te kiizo kya mubili? ¹⁷ Mubili onse ubenge linso, nga uliwaunvua syani? Kabili mubili onse ubenge kutui, nga uliwanunsia syani?. ¹⁸ Kisinka Leza waabiikile kubalua kiizo kya mubili pa nkendo ipalile muatoneene. ¹⁹ Kabenge kwalisie kiizo kimo, nga tekuli mubili. ²⁰ Kisinka mubili ni umo, inzi biizo byene ni bingi. ²¹ Linso telivinda kwana kuboko nangue, "We wakwane, nene nsili na mwilo nobe." Mutue nio teuvinda kwana maulu nangue, "Emwe, nene nsili na mwilonenu." ²² Inzi biizo bimwenekele byali binake, i bikindamiisie. ²³ Kabili ni belia biizo bitumwene tekuba byakindeeme, i bitulitwakindikisia kukila binge, ni pakako, belia bitulitwatiina kuzimbula, tulitwabikindikisia kukila binge. ²⁴ Leza lualundaniizie biizo bya mubili, waukitile mu musango wakukindikilamo belia bisikindeeme. ²⁵ Evi tekuti kuye kwali bulekano kumubili, inzi byonse biye byakwasyania. ²⁶ Kine kiizo kimo kya mubili kyakisua biizo byonse byakisua pamonakio. Kine kiizo kimo kya mubili kyakindikua, biizo byonse byawaminua pamo nakio. ²⁷ Unvue, mwe bonse muli mubili wakua Kristu. Kubalua muzumizi ni kiizo kya ozu mubili. ²⁸ Evi i vyaatantikile Leza mu kilonghano, ba mambo ni batumua, ba bubili ni bakabika, ba butatu ni bakasambilizia, ba buna ni balia balibakita tupapo, ba busaano ni balia bali ni buvinde bwakukosia balwele, ba mutanda ni balia bali ni miilo ya kukwasia bange, ba kilooba ni balia balibalombola bange, ba mwanda ni balia bali ni kyabupe kya kulanda ndimi yeni. ²⁹ Ati, kubako bonse ni batumua? Ao bonse ni bakabika? Ao bonse ni bakasambilizia? Ao bonse bali ni buvinde bwa kukita tupapo?. ³⁰ Ati, bonse bali ni buvinde bwa kukosia balwele? Ao bonse balibalanda ndimi yeni? Ao bonse balibalondolola musango wa keebo kalikalandua? ³¹ Mwe bakwane namyana nangue, kebesie kyabupe kiwamiisie. Pembele nmyane kintu kiwamiisia pa byonse.