¹ Anzia kine nande ndimi ya bantu ao ya bamalaika, kine nsili na ntono,ndi sie nga muzowa wa nghoma ao nga muzowa wa nghengele. ² Kabili kine ndi ni kyabupe kya kulanda mpunda inmpeelue na Leza, ni kya kumana, ni kya kunvua twebo twa mu kafiso, ni kuya nali ni kiketekelo kikata kya kutelulula mpili, inzi kine nsili na ntono, ndi sie wa mpuni. ³ Kabili kine napaana mpango yane yonse, ni kupaana mubili wane kuti uziziiwe, inzi kine nsili na ntono, ndi sie wa mpuni. ⁴ Muntu ali ni ntono aliwasipikizia, aweme, tali na bunkua, tezi kwitanka, kabili tali na kiitoni. ⁵ Muntu ali ni ntono tezi kumoniania busoni, tezi kwitona, tezi kufiitua, tali na mbiikizi, ⁶ Tezi kuwaminua na bubi, inzi aliwawaminua sie na kisinka. ⁷ Muntu ali ni ntono aliwaya wateekameene mu byonse, aliwaya waketekeele mu bintu byonse, kabili aliwaya wasipikiziizie mu bintu byonse. ⁸ Ntono yene ni ya muyayaya. Kyabupe kya kulanda mpunda yakua Leza kyaakapua, kyabupe kya kulanda ndimi yeni kyaakapua, kyabupe kya kumana ni kyo kyaakapua. ⁹ Pantu kumana kwetu tekupwililikile, kulanda kutwalanda mpunda yakua Leza ni ko tekupwililikile. ¹⁰ Inzi musita waakeeza kipwililikile, bintu byonse bisipwililikile byaakapua. ¹¹ Nene lunaali mwanike, naali nalanga ni kumana pamo ni kulangakana nga mwanike. Inzi lunaakulile, naalekeele bintu byonse bya bwanike. ¹² Musango utumweneenemo lenu uli nga kiizino kilikyalangisia lukebu kivuuvuutila. Inzi pa mpeleezio twaakabimona mu musango upwililikile nga evelia vinmaninue na Leza. ¹³ Evi kuli bintu bitatu: Kiketekelo, maswapi, ni ntono. Inzi kintu kyaakatwalilila kubako pa bebi bitatu, ni ntono.