¹ Kansi mwe bakwane kebesie kuya mwali ni ntono, kabili kebesie kuya mwali ni byabupe bya kimweo. Pa;iibufi kyabupe kyakulanda mpunda yakua Leza. ² Olia aliwalanda ndimi yeni wene tezi kulanda na bantu, inzi aliwalanda na Leza pantu tekuli muntu aliwamunvua. Wene aliwalanda twebo twa mu kafiso walombwelue na Mweo Muzuuke. ³ Inzi olia aliwalanda mpunda iapeelue na Leza, aliwalandila bantu evi abakoselezie mu kiketekelo ni kukoselezia kilonghano. ⁴ Olia aliwalanda ndimi yeni, aliwaikoselezia mu kiketekelo kyakue bunke. Inzi olia aliwalanda mpunda yakua Leza, aliwakoselezia kilonghano kyonse. ⁵ Nene ntonene mwe bonse mulande ndimi yeni. Inzi ntoneesie mwe bonse muye mwalanda mpunda yakua Leza, namyana kisinka nangue olia aliwalanda mpunda iapeelue na Leza i aliwawamia kukila olia aliwalanda ndimi yeni. Inga sie kine kuli umo wakulondolola belia bialiwalanda, evi kilonghano kyonse kikoseleziwe mu kiketekelo. ⁶ Kansi mwe bakwane, namiipuzyanke. Kine naiza kwenu ni kutendeka kulanda ndimi yeni, nawamia? Nsiwamiizie. Inga sie kine namileetela nfyulo ya keebo kakua Leza ao kulanda mpunda inmpeelue na Leza, ao kusambilizia. ⁷ Ale tupalanie ku bimbayambaya bya nghimbo nga evelia mumpyeta ao lizeeze. Bebi bintu kine tebititikiilue ni kuliziiwa bwino, lwimbo lulimukwimbua telunvwika. ⁸ Kabili muntu wakulizia ntandala ya bului kine taliziizie mu musango wakuti bantu bonvue kialimukuliziizia, tekuli muntu alikwiteania kuya ku bului. ⁹ Evi ivili ni muntu aliwalanda ndimi yeni. Kubako kuti waunvwiwa syani kine alimukulanda bintu bisimanikile? Kulanda kwakue ni kwa mpuni. ¹⁰ Monse mwaya kyalo muli ndimi ingi ilekenkeene, ndimi yonse iliyalandua, iliyaunvwika. ¹¹ Inzi kine muntualimukunanzia lulimi lunsyunvwile, nsyunvua bialimukulanda, ni wene tonvua bindimukulanda. ¹² Kansi, pantu mwemue mutoneesie kuba ni byabupe bya Mweo Muzuuke, kebesie kuba ni byabupe bilibyakoselezia bazumizi mu kiketekelo. ¹³ Ni pakako, olia aliwalanda ndimi yeni, amulombe Leza amupeele kyabupe kya kulondolola ezio ndimi. ¹⁴ Pantu kine napepela mu ndimi yeni, mutima wane i ulimukupepa. Inzi maano ane asyala sie tekuba alimukubomba. ¹⁵ Eba, ale ndikukita syani? Ndikupepela mu mutima ni kupepela mu maano ane. Ndikwimbila mu mutima ni kwimbila mu maano ane. ¹⁶ Kine ulimukusantila Leza mu mutima obe bunke, olia akutwiliziizie,alikwitabila syani nangue, "Amen" Kine tonvwile luulimukusantila? ¹⁷ Anzia kine mapepo obe a kumusantila Leza ali bwino, teamukoselezia ozo atwiliziizie. ¹⁸ Nene namusantila Leza pantu ndinalanda ndimi yeni kukila mwe bonse. ¹⁹ Inzi mukulongana kwenu kwa Kikristu, ndinatonesia kulanda twebo tusaano tunvwikile pakuti nsambilizie bange kukila kulanda twebo 1,000 mu lulimi lusyunvwikile. ²⁰ Mwe bakwane, tekuti muye mwali nga banike mukulangakana. Namyana muye mwali nga nkeke mu bibiipile, inzi mukulangakana muye mwali nga bakulu. ²¹ Unvue vyaalandile Mulopue mu malembo, "Naakabaana baba bantu kupitila mu baba balibalanda ndimi inge, kabili naakalanda kupitila mutunua twa baeni. Anzia kikabe evio, bantu bane bene tebakanghunvua." ²² Kansi kyabupe kya kulanda ndimi yeni, ni kalangi kalangisiiziwe bantu basizumiine, tekuba bantu bazumiine. Inzi kyabupe kya kulanda mpunda yakua Leza, kyene ni kalangi kakulangisia bantu bazumiine, tekuba bantu basizumiine. ²³ Kine bazumizi bonse bakolonghana, batendeka kulanda ndimi yeni, penka papo kwaiza kale bantu basimanine ao basizumiine, bamisanga mwalimukulanda ndimi yeni. Ati, tebalikulanda nangue muzambukile? ²⁴ Inzi kine bantu bonse balimukulanda mpunda yakua Leza, penka papo kwaiza kale muntu asizumiine, twebo tualikunvua twalandua na bonse i tulikumusyuta nangue ali ni bibalo, kabili i tulikumupingula. ²⁵ Malanga akue a mu kafiso alikufyulua. Kabili alikufukama ni kupupa Lezawalanda, "Kisinka Leza ali pakati kenu." ²⁶ Mwe bakwane, kuti twakita syani? Kubalua muntu kine ali ni lwimbo lwa kwimba, ni unge kine ali ni masambilizio a kusambilizia, ni unge kine wafyulilua na Leza, ni unge kine watendeka kulanda ndimi, ni unge niye kine watendeka kulondolola, namilomba bebi byonse bikitike pa mulandu wa kukoselezia bazumizi mu kiketekelo. ²⁷ Kine bamo pakati kenu balanda ndimi yeni, bantu babili ao batatu, balande, tekuti bakile pa babo, baba bantu balande umo umo,inzi paye pali ni unge wakulondolola bintu bilimukulandua. ²⁸ Inzi kine tepali muntu wakulondolola, olia alimukulanda ndimi yeni atalale mu kilonghano, alombele sie mu mutima kuli Leza wakue. ²⁹ Bantu balibalanda mpunda yakua Leza, balande babili ao batatu, bange batoosia bintu bilimukulandua. ³⁰ Inzi kine umowafyulilua keebo na Leza, olia alimukulanda, atalale. ³¹ Bonse kuti mwalanda mpunda yakua Leza, inzi mulande umo umo, evi bonse basambilile ni kukoseleziwa. ³² Balia bali nikyabupe kya kulanda mpunda yakua Leza, baye bateekameene. ³³ Pantu Leza te Leza wa kinvulunghania, inzi wene ni Leza wa mutende. Nga vilivyakita bilonghano byonse bya bantu bakua Leza. ³⁴ Banakazi beekale bateleele mu kilonghano. Bene tebetabiiziwe kulanda, inzi banakile nga mulandiile mizilo ya Bayuda. ³⁵ Kine batona kwipuzia kantu, baye beepuzie balume babo ku nghanda pantu mwanakazi tapalile kulanda mukulonghana kwa Kikiristu. ³⁶ Ati emwe,keebo kakuaLeza kaafumine kwenu? Ao kaamiiziile sie mwemue bunke? ³⁷ Kine umo pakati kenu emwene kuya wali mukenzi wakuaLeza ao kuya wali ni kyabupe kya Mweo, enike nangue bebi bintu bindimukumilembela nghaninue na Mulopue. ³⁸ Inzi kine muntu wasuula bebi bindimukulanda,ni ye asuulue. ³⁹ Kansi mwe bakwane, tonesiepo kulanda mpunda yakua Leza. Tekukaanie bantu balibalanda ndimi yeni. ⁴⁰ Inzi kite bintu byonse bwino bwino mu mukinzi.