¹ Mwe bakwane, ntonene kumilangulusia mpunda iweme inaamisimikiile, mpunda imwimeenemo sinta mu kiketekelo. ² Ezi mpunda inaamisimikiile iliyapususia kine mwaimana sinta mu kiketekelo. Inzi kine temwimeene sinta, kiketekelo kyenu ni kya mpuni. ³ Nene naamileeteele masambilizio akindamiisie anaapokeleele. Kintu kya mponvu ni keki: Kristu waafwiliile bibalo byetu nga mulandiile malembonangue, ⁴ Waaziikilue, ni busiku bwa butatu waatuntumukile. ⁵ Waamwenue na Petro ni batumua bonse likumi na babili. ⁶ Kabili waamwenue na basambi bange bakilile pa kipendo kya bantu 500 pa musita umo. Bange bakikosele, inzi bange baafwile kale. ⁷ Kabili waamwenue na Yakobo ni batumua bonse. ⁸ Pa mpeleezio, ni nene wewnka naamumwene anzia kine ndi nga muntu waavyelue wali kabisi. ⁹ Ee,kulanda kisinka nkeepeesie kukila batumua bonse. Kabili nsipalile kukuutua mutumua pantu naali naemia sana kilonghanokyakua Leza. ¹⁰ Inzi ndi mutumua kupitila mu buwame bwakua Leza.Buwame bunaapeelue tebwaali bwa mpunipantu naabombele kukila batumua bonse. Inzi te nene waabombele, buwame bwakua Leza buli pamo ni nene i bwaabombele. ¹¹ Anzia kine bene i baasimikiile ao kine ni nene, te kantu, inzi keki i kitulitwasimikila, kabili i kimuzumiine. ¹² Fwefue tulitwasimikila nangue Kristu waatuntumukile, ati, ale bange pakati kenu balibalandila ki nangue bafwile tebakatuntumuka? ¹³ Kine tebakatuntumuka, kansi Kristu niye taatuntumukile. ¹⁴ Kine Kristu taatuntumukile, kansi kusimikila kwetu ni kwa mpuni, buzumino bwenu ni bo bwa mpuni. ¹⁵ Kine i evio, kansi fwefue tulitwasininkizia bya bufi palwakua Leza pantu tulitwasininkizia nangue Leza waamutuntumwine Kristu. Kine bafwile tebakatuntumunua, kansi Kristu ni ye taatuntumukile. ¹⁶ Pantu kine kutuntumunua tekuli, kansi ni Kristu niye taatuntumwinue. ¹⁷ Kabili kine Kristu taatuntumwinue, kansi kiketekelo kyenu ni kya mpuni, kabili mukili mu bibalo. ¹⁸ I kulanda nangue balia bonse baafwile baketekeele muli Kristu, bazeezele. ¹⁹ Kine maswapi etu muli Kristu ni a penka pano pa kyalo, kansi fwefue i bali ni bulanda kukila bantu bonse. ²⁰ Inzi mwe bakwane kulanda kisinka, Kristu waatuntumwinue wa mambo, kabili i kisininkiziizie nangue bafwile ni bo baakatuntumunua. ²¹ Lulu lwaaleetelue na muntu umo. Kutuntumuka ni ko kuleetelue na muntu umo. ²² Pantu nga evelia bantu bonse vibalibafua pa mulandu wa buumo ni Adamu, i vibaakaba bakose pa mulandu wa buumo ni Kristu. ²³ Inzi kubalua muntu waakatuntumunua pa musita wakue, Kristu i waali wa mambo, paakabwela, mane bantu bakue ni bo bakatuntumunue. ²⁴ Kabili lwaakeeza mpeleezio ya kyalo, Kristu waakapwisia buteeko bonse, ni buvinde bonse pamo ni maka onse, mane akabwezie bukolo kuli Leza se. ²⁵ Pantu Kristu waakateeka mpaka Leza paakanzia balwani bonse ni kubabiika pensina makasa akua Kristu. ²⁶ Lufu i mulwani waakaloviwa pa mpeleezio. ²⁷ Pantu malembo alialanda evi, "Leza waakabiika bintu byonse pensina makasa akua Kristu." Inzi kimwenekele evi, koku kulanda nangue, "Bintu byonse," Leza talimo pantu wene i aliwabiika bintu byonse pensina makasa akua Kristu. ²⁸ Lwaakabiikua bintu byonse pensina makasa akua Kristu, mwana ni ye waakeebiika pensina makasa akua Leza. Leza i waabiikile bintu byonse pensina makasa akua Kristu, ni Kristu waakabiikua pensina makasa akua Leza. Evi Leza akabe kateeka wa bintu byonse. ²⁹ Kine baafwile tebakatuntumunua, balia bantu balibabatizia bantu pa mulandu wa bafwile baakakita syani? ³⁰ Ale ni fwefue benka kitulitwaitwalila mu busanzo bwa lufu nsita yonse ni kiki? ³¹ Mwe bakwane, kubalua busiku ndinaenda nafwile, namyana kisinka nangue, "Kwitona ku ngitonene ni pa mulandu wa bwikazi butwikeele nenu muli Mulopue wetu Yesu Kristu. Keki i kinengele kulanda evi. ³² Kuti namonamo ki mukulua na nama ya mu kisonso kono ku Efeso kine bafwile tebakatuntumunua? "Kansi tulie, tumine pantu lukeele twakaba kufua." ³³ Mwe bakwane, "Tekwibeepe pantu bibuza bibiipile bilibyainoona mibeele iweme." ³⁴ Lekele bibalo mubambe kukita biweme! Nalanda evi kuti nmimonie busoni pantu pakati kenu bange tebamumanine Leza. ³⁵ Bange kuti bangipuzia nangue, "Ati, bafwile baakatuntumunua syani? Kabili baakaba na mubili wa musango ki?" ³⁶ We kilubi! Musita uuli wabyala lubezu mu bulongo, mpaka lufwenke mane lumene. ³⁷ Mbezu iuliwabyala ni mbezu sie, pange uliwabyala mbezu ya nghano ao mbezu inge. Inzi luiliyamena, iliyamena mu musango unge. ³⁸ Leza aliwamenia mbezu mu musango unge muatoneene, Leza aliwapeela kubalua lubezu musango wa kukulilamo. ³⁹ Mibili ya bilengua byonse bili ni bukose ipuseene. Mibili ya bantu iibeeleele, ni mibili ya nama ni yo iibeeleele, ni mibili ya byoni ni yo iibeeleele, ni mibili ya masabi ni yo iibeeleele. ⁴⁰ Kuli bintu bya mu muuluni bya pa kyalo. Kuwama kwa bintu bya mu muulu ni bya pa kyalo kwibeeleele. ⁴¹ Kusaama kwa koba kwibeeleele, ni kusaama kwa kwezi ni ko kwibeeleele. Ntanda ni yo iliyasanika yaibeeleele, kubalua lutanda lulilwasanika lwaibeeleele. ⁴² Evi ivyaakaba bantu baakatuntumunua. Mubili luuliwaziikua, uliwazuukua wafwile, inzi paukatuntumunua teukikafua. ⁴³ Mubili luuliwaziikua, uliwaziikua tekuba wakindeeme. Inzi paukatuntumunua waakaba wakindeeme. Mubili luuliwaziikua, uliwaziikua wali utope, inzi paukatuntumunua, waakatuntumunua walumine sie ndi. ⁴⁴ Mubili luuliwaziikua, uliwaziikua sie wali mubili. Inzi paukatuntumunua, waakaba mubili wa kimweo, kine kuli mubili wa kimubili, kansi kuli ni mubili wa kimweo. ⁴⁵ Pantu malembo alialanda evi, "Muntu wa mambo Adamu, waalengeelue kuti aye wali mukose." Inzi Yesu, Adamu wa mpeleezio, i Mweo aliwapaana bukose. ⁴⁶ Papa twamona nangue te mubili wa kimweo uliwatangila, Inzi ni mubili wa kimubili i uliwatangila, kusyali kukonkapo mubili wa kimweo. ⁴⁷ Adamu wa mambo waafumiiziwe ku bulongo, wene wa pano pa kyalo. Kristu, Adamu wa bubili wene waafumine mwiulu. ⁴⁸ Kubalua muntu ali pano pa kyalo wene apaleene na Adamu waafumiiziwe ku bulongo. Inzi balia bali mwiulu ni bo bapaleene na Kristu waafumine mwiulu. ⁴⁹ Kansi nga evelia vitupaleene na olia waafumiiziwe ku bulongo, i vitwaakapalana na olia waafumine mwiulu. ⁵⁰ Mwe bakwane, kulanda kwane ni koku, mubili ni mulopa tebikavinda kwingila mu bukolo bwakua Leza, kabili ni kilikyafua, tekikalundana na kisilikyafua. ⁵¹ Unvue nmibwile kafiso ka kiine: Tetukafua fwe bonse, inzi fwe bonse twaakaalulua pa musita unini nga kukapa kwa linso lwaakalila ntandala ya mpeleezio. ⁵² Pantu paikalila, bafwile baakatuntumunua tekuti bakafue kabili, ni fwefue bonse baakasangua bakosele, mibili yetu yaakaalulua. ⁵³ Pantu kelia kilikyainooneka, kyaakaba ni mubili usiliwainooneka. Ni kilikyafua, kyaakaba ni mubili usiliwafua. ⁵⁴ Kansi mubili uliwainooneka luukaaluka mubili usiliwainooneka, kabili mubili uliwafua luukaaluka mubili usiliwafua, i lwaakafikiliziwa keebo kalandile mu malembo nangue, "Lufu lwaloba, bwanzio bwamoneka!" ⁵⁵ "We lufu, bwanzio bobe buli pi? We lufu, maka obe a kwipaana ali pi?" ⁵⁶ Maka a lufu a kwipaana, aliafuma ku bibalo, bibalo ni byo bilibyafumia maka ku mizilo. ⁵⁷ Ale tumutasie Leza aliwatupeela maka a kwanzia kupitila muli Yesu Kristu Mulopue wetu. ⁵⁸ Kansi mwe bakwane, imane sinta mu kiketekelo, tekutente. Kinkimane mukubomba miilo yakua Mulopue pantu miilo imulimwabombela Mulopue te ya mpuni.