¹ Ale unvue ngasuke palua bilio byeleelue mikisi: Tumanine nangue "fwefue bonse tulini maano." Maano alialeeta kiitoni, inzi ntono iliyasimpa kiketekelo. ² Kubalua muntu emwene nangue amanine, tanamane viapalile kumana. ³ Inzi muntu atonene Leza, i amaninue na Leza. ⁴ Ni pakako, kukonkana ni bilio byeleelue mikisi, tumanine nangue "mukisi te kantu mono mu kyalo". Kabili tumanine nangue kuli sie Leza umo. ⁵ Anzia kine kuli kwakuutua tuleza twingi mu muulu ni pa kyalo, ni tulopue twingi, ⁶ "Fwefue tuketekeele nangue kuli sie Leza umo, Leza situe kalenga wa byonse ni waatulengele. Kabili kuli sie Mulopue umo Yesu Kristu, muli wene i mwaalengeelue bintu byonse, ni fwefue i mutukoseele." ⁷ Inzi te bantu bonse bamanine keki kisinka. Pantu bantu bamo bezibiile kubombela mikisi, ni lenu kumo baba bantu balibalia bilio koku bamanine nangue byeleelue mikisi. Kabili pantu mitima yabo inakile, lubalibalia balibalangakana nangue baluvia. ⁸ Inzi bilio tebivinda kutupalamika kuli Leza. Kine twakaana kulia, tetukeepeelue kantu, kabili kine twalia tetusonsekua kantu. ⁹ Inzi ilabukile mukulubuka kwenu mukeeza kuponia balia banakile mu kiketekelo. ¹⁰ Pantu kine olia anakile mu kiketekelo wakumona we amanine bwino palua kiketekelo walimukulila mu nghanda ya mikisi, wamukoselezia munake kuti aye walia bilio byeleelue mikisi. ¹¹ Ni pakako, mana nangue ozo munake waafwiliilue na Kristu kine wazeeza, wewe i walengia. ¹² Kine mwababazia bakwene mu ozu musango, ni kwinoona malanga a banake, mwamubala Kristu mwine. ¹³ Kine bilio binalia byaponia wakwane mu kiketekelo, kansi ndekele kulia nama nkeeza kumubazia wakwane.