¹ Palua belia bimwaanembeele. Ee, kine muntu taupile, kili sie bwino. ² Inzi pa mulandu wa kutiina kukita bukende, kubalua mwalalume, aye wali ni mukazi wakue. Kabili kubalua mwanakazi, aye wali ni mulume wakue. ³ Mubili wa mwalalume ubeeleeleko pa mulandu wa mukazi wakue, mubili wa mwanakazi ni o ubeeleeleko pa mulandu wa mulume wakue. ⁴ Mukazi tali na nsambu pa mubili wakue mwine, inzi mulume i ali ni nsambu pa mubili wa mukazi wakue. Kabili mulume ni ye tali na nsambu pa mubili wakue mwine, inzi mukazi i ali ni nsambu pa mubili wa mulume wakue. ⁵ Tekutanane kyupo, inga sie kine mwaunvwana kukita evio pa musita unini kuti mupepe. Kabili mane mubwezyanie paakale mukeeza kubembua na satana pa mulandu wa bunake bwenu. ⁶ Keki kinamyana ni nsokezi, te lifunde lyakua Mulopue. ⁷ Nene ntoneesie bantu bonse muye mwingi nga vindi. Inzi kubalua muntu apeelue na Leza kyabupe kiibeeleele, umo kyabupe kya ozu musango, ni unge kya unge musango. ⁸ Kansi basimbe ni bamukanfwilua, bene nabaana nangue, kuti kyakila luwama kubeelelela mu busimbe nga vindi. ⁹ Inzi kine baandua kusipikizia, baleke boope ao boopue, pantu bapalile boope ao boopue kukila kuba ni lwinso. ¹⁰ Bazumizi boobile, bene nabaana evi, "Te nene walanda inzi ni Mulopue wabaana," mwanakazi opilue, tekuti akaane mulume wakue. ¹¹ Inzi kine wamukaana ekale mu busimbe, kine te evio, abwelele ku mulume wakue. Kubalua mulume tekuti amukaane mukazi wakue. ¹² Bange bene nabaana evi,- inzi ni nene walanda te Mulopue, kine mwalalume azumiine ali ni mukazi asizumiine, inzi mukazi waitabizia kutwalilila kwikala nakue mu kyupo, mulume tekuti amukaane. ¹³ Mwanakazi azumiine ni ye kine ali ni mulume asizumiine, inzi mulume waitabizia kutwalilila kwikala nakue mu mu kyupo, mukazi tekuti amukaane. ¹⁴ Pantumulume asizumiine, etabiilue na Leza mukwampana na mukazi azumiine. Kabili mukazi asizumiine ni ye etabiilue na Leza mukwampana na mulume azumiine . Kabenge te evio, baana babo nga bali nga bantu basizumiine,inzi evi betabiilue na Leza. ¹⁵ Inzi kine asizumiine watona kakaana azumiine, muleke aye waya. Kine kyakitika evio, azumiine kine ni mwalalume ao mwanakazi alubukile. Pantu Leza waamikuutiile kwikala mu mutende. ¹⁶ Ati we mwanakazi azumiine, kubako usininkiziizie nangue waakamupusia mulume obe? Ao we mwalalume azumiine, kubako usininkiziizie nangue waakamupususia mukazi obe? ¹⁷ Kansi kubalua muntu ekale ni kyabupe kiapeelue naMulopue mu musango uakuutiiluemo na Leza. Leli ni lifunde lindinasambilizia mu bilonghano byonse. ¹⁸ Kine mwalalume waakuutilue na Leza wateetelue yando, tekuti ebeepezie nangue tateetelue yando. Kabili kine mwalalume waakuutilue na Leza tekuba wateetelue yando. tekuti ateetue yando. ¹⁹ Pantu kuteetua yando ao kusiteetua yando te kantu, kya mponvu ni kunakila mafunde akua Leza. ²⁰ Kubalua muntu ekale nga viali luakuutilue na Leza. ²¹ Ati, waali wali muzia luwaakuutilue na Leza? Kansi tekusambooka. Inzi kine uli ni lisyuko lya kulubuka, lubuka. ²² Pantu muzia akuutilue na Mulopue, alubwilue na Mulopue. Kabili muntu waakuutilue tekuba wali muzia, i muzia wakua Kristu. ²³ Leza waamisitile na mutengo ukata, tekwaluke kabili bazia ba bantu. ²⁴ Kansi mwe bakwane, kubalua muntu ekale bwino ku menso akua Leza nga evelia viali luakuutilue. ²⁵ Palua basimbe, te Mulopue walanda, inzini nene, namyana nmumweneene ne muntu waunvwiliilue nkumbunaLeza pakuti ngie nali muntu wa kisinka. ²⁶ Kukonkana ni maavia alipo, malanga ane ali evi, kuti kyawama muntu ekalilile mu busimbe. ²⁷ Kansi wewe kine uupile, tekukeba musango wa kumukaana mukazi obe. Kine teuupile, tekukeba kuupa. ²⁸ Inzi kine waupa, teulubile. Kabili kine mukazyana waupua, ni ye talubile. Balia balibaupa ni balibaupua, baakaba ni maavia mu bwikazi bwabo. Kinalandila evi, nakeba sie kuti nmifumie mu aza maavia. ²⁹ Mwe bakwane, namyana nangue, musita pasyaupue . Kansi kutula lelo, balalume boopile, babe nga basimbe. ³⁰ Balia balimukulila, babe nga basilimukulila. Balia balimukuseka, babe nga basilimukuseka, balia basitile bintu, babe nga basisitile. ³¹ Balia balibabombia bintu bya mu kyalo, babe nga basilibabombia, pantu keno kyalo kimwenekele nangue pasyakipue. ³² Nsitonene kuti muye mwasambooka. Unvue, musimbe aliwaipeela ku mwilo wakua Mulopue, pantu aliwakeba kumuwamiizia. ³³ Inzi olia opile wene aliwasambookela bintu bya mu kyalo, pantu aliwakeba kuwamiizia mukazi wakue. ³⁴ Ni pakako, malanga a ozu muntu opile ali pabili. Mwanakazi musimbe ao mukazyana wene aliwaipeela mu mwilo wakua Mulopue, pantu atonene kwipeela kuli Leza mutima ni mubili wakue. Inzi olia opilue, wene aliwasambookela bintu bya mu kyalo pantu aliwakeba kuwamiizia mulume wakue. ³⁵ Nalanda evi pantu ndinakeba kumikwasia, nsilimukumipatikizia. Inzi ntonene muye mwali ni mapange aweme mukumubombela Mulopue na mutima umo. ³⁶ Kabili palua muntu asakile mukazyana kine baunvwana tekuti bakwatilane kale pa mulandu wa kubombela Mulopue, kine ozu muntu wamona nangue wamupisiizia mukazyana musita, kabili niye wamona nangue lwinso lwamukila maka ope. Kine wakata evio, talubile. ³⁷ Inzi kine ozo mwalalume walanda nangue nsyupa ozu mwanakazi, kabili kine ali ni maka a kusipikizia, ni kumona mwakuti akitile, wakila kuwamia. ³⁸ Kansi mwalalume watona kuupa musakua wakue, wakita bwino, inzi kine taupile wakita kuwamia. ³⁹ Mwanakazi opilue akakilue na mulume wakue musita wakikosele. Inzi kine mulume wakue wafua, ozo mwanakazi wasyala walubukile ku kuupua na unge mwalalume alikumuwamina. Inzi ozo mwalalume aye wali Mukristu. ⁴⁰ Kabili ozo mwanakazi waakakila kuwaminua kine waikala sie pasili kuupua. Koku i kumona kwane, pantu nmwene nangue ni nene wenka ndi ni Mweo wakua Leza.