¹ Ati, kine umo pakati kenu ali ni milandu na muzumizi nakue, alikusiila ki bazumizi nakue ni kuya kutwala milandu ku bantu basimanine Leza? ² Eba, temumanine nangue fwe bazuuke i baakapingula bantu bonse ba mu kyalo? Kine mwemue i baakapingula bantu bonse ba mu kyalo, ale mulimukwandua syani kupingula milandu inini? ³ Ati, temumanine nangue fwefue twaakapingula bamalaika? Kine twaakabapingula, ale kuti twaandua syani kupingula milandu yetu? ⁴ Kine kuti mwapingula milandu yenu, ale mulimwasongelanina ki ku bantu basizumiine? ⁵ Nalanda evi kuti nmimonie busoni! Eba, i kulanda nangue pakati kenu tepali muntu ali ni maano a kupingula milandu ya bazumizi nakue? ⁶ Inzi mwemue lumulimwabalana, mulimwatona kuya kupingulua na bantu basizumiine. ⁷ Koku kuba ni milandu mwe benenke i kulanda nangue mwandiilue mbeela. Ale ni kiki kimusilimwasipikiziizia lumulimwabeepeziiwa ni kwibilua? ⁸ Inzi mone, mwemue i balibabiibikizia bazumizi nenu ni kubeebila!. ⁹ Mumanine kisinka nangue babi tebakengila muBukolo bwakua Leza? Tekwibeepe. Balia balibakita bukambue ao kupupa mikisi ao bakende ao balia balibaupana balalumenke ni banakazinke, ¹⁰ ao bakabooko ao batani ao bakyakolua ao bantu ba lwambo ni bapompo, bene tebakengila mu Bukolo bwakua Leza. ¹¹ Evi ivyaali bange pakati kenu. Inzi evi musambilue bibalo byenu, musaakwilue kuba bantu bakua Leza. Mulubwilue kupitila mu liina lyakua Mulopue Yesu Kristu ni kupitila mu Mweo Muzuuke. ¹² Muntu umo kuti walanda evi, "Ndi ni nsambu ya kukita byonse." Ee, inzi te byonse bimuwamiine. Kuti nalanda evi, "Ndi ni nsambu ya kukita byonse." Inzi nsitonene kuteekua buzia na kantu. ¹³ Kabili unge kuti walanda evi, "Bilio ni bya kuya munda, munda ni mo mwaakitiilue mwa kuya bilio." Ee, ni bwino. Inzi Leza waakabiinoona byonse bibili. Mubili wa muntu tewaakitiilue bukende, wene ni wakua Mulopue, kabili Mulopue ni wakubombelua na mubili. ¹⁴ Kansi Leza waamutuntumwine Mulopue na maka akue, i waakatuntumuna ni fwefue. ¹⁵ Ati, temumanine nangue mibili yenu ni biizo bya mubili wakua Kristu? Eba, mumanine nangue nene kuti nabuula kiizo kyakua Kristu ni kukibiika ku mubili wa bukambue? Nsivinda ata kanini!. ¹⁶ Ati, temumanine nangue muntu aliwalaala na mukende, bonse babili balibaaluka mubili umo? Pantu malembo alandile evi, "Baba babili baakaba mubili umo." ¹⁷ Kansi onse aliwailunda kuli Mulopue, aliwalundana nakue mu kimweo. ¹⁸ Mwe bakwane, ilabukile ku bukende pantu kinge bibalo bilibyakita muntu bili kunze ya mubili wakue, inzi muntu aliwakita bukende wene aliwabalila mubili wakue. ¹⁹ Ati, temumanine nangue mibili yenu i nghanda yakua Leza mwikeele Mweo Muzuuke umwaapeelue na Leza? Mwemue temukili kabili bene ba mwe bene, inzi muli bantu nghwana. ²⁰ Leza waamisitile na mutengo ukata. Ni pakako, mutasie Leza na mibili yenu.