¹ Hanuma ndabhona mukubhoko kwe bhulyo kwoyone ali ikalisye hitebhe lye syami [igombo]elyo lyali bhwandikwe bhutonzi ne numa nekandi lyali bhutulilwe [mihuri] musamvu. ² Ndamubhona malaika we nguzu akuhubili hasilaka sikulu muno akuyomba oti, "nende oyo ekwendelwa kulifundukula elyane [igombo] ne kuzitalambulu mihuri zyahe?" ³ Atabhangaho muntu mwilunde nolo mubhwelelo nolo hansi ye bhwelelo oyo aladula kulifundukula elyone [igombo] nolo kulisoma. ⁴ Ndalila kumanegelo makulu kulwekubha ataligela muntu tyoyowona oyo endelangwa kulifundukula elyone [igombo] nolo kulisoma. ⁵ Alahe umwi wabhone bhanampala alambwila oti utakalila ulinge nsimba ye kabhila ye Yuda izinga lye mwa Daudi awe alakindile nawe enkaduzya kulifundukula elyone [igombo] sihamwi ne mihuli yahe musamvu." ⁶ Aho hitebhe lye syami ne bhebhuhanga bhane ne mubhanampala, ndabhonamo mwana we ntama imilile nawe ali kati webhufwe, ali ne mahembe musamvu ne minso musamvu, ezyane ne mizo musamvu zye mwa Mungu ezyo zilatumilwe mubhwelelo yona. ⁷ Alazya alalisola elyone [igombo] mukubhoko kwe bhulyo kwoyo ali ikalisye helyone itebhe lye syami. ⁸ Alabha alisola [igombo] bhebhuhanga bhane ne bhanampala makumi abhili ne bhane bhalasukamba bhalinama bhutonzi ye mwana we ntama, nekila umwi ali ne ihembe ne ibakuli lye dhahabu elyo lyali lyokele [uvumba] obhwo ne kulomba kwe bhazumya. ⁹ Bhalimba lwimbo luhyahya, wekwendelwa kulisola elyone [igombo] nekuzifundukula mihuli zyahe, kulwekubha ulasikwa ne kumagazi gako ulamugulila Mungu bhantu bhe nganda zyona ne ndimi zyona ne mahanga. ¹⁰ Ulabhagema kubha bhami ne bhagabhizi kulwe kumutumamila Mungu witu nabhe bhalakatema higulya ye nsi." ¹¹ Nekandi ndalinga ndimvwa silaka sye bhamalaika bhinki bhapilime itebhe lye syami ne bhwinki bhwabho bhwali 200,000,000 sihamwi ne bhebhuhanga ne bhanampala. ¹² bhalahamuka kusilaka sikulu oti ekwendelwa mwana we ntama oyo alasikwa kwanukula bhadula ne bhusabhi ne bhwenge ikuzyo ne nguzu ne lukumo." ¹³ Ndabha nomvwa vibhumbwa vyona vye mwilunde ne vye hansi ne mukati ye hansi ne higulya ye nyanza vintu vyona mukati yahe vikuyomba oti kwoyo ali ikalisye hitebhe lye syami ne kumwana we ntama libhe ikuzyo ne nguzu ne kutawala bhwelelo ne bhwelelo. ¹⁴ Bhe bhuhanga bhane bhalayomba oti Amina ne bhanampala bhalinama hansi ne kulamya.