¹ Hanuma yagone magambo ndalinga, ndabhona mukubha muzigo gwali gwigwilwe mwilunde, silaka esyo ndandya kusimvwa sikuyomba none kati [tarumbeta] ikuyomba oti newize eno none nkukulanzya ago gakwizakubhaho hanuma ye magambo agone ² Mwikanza elyone nali mumwizo, ndabhona lyaliho itebhe lye syami lyali lyatuzilwe mwilunde ne muntu alikalile. ³ Oyo ali bhulikalile elyone itebhe ikolanga ne [yasipi ne akiki] gwaliho mufulumizya gwe mvula gwalipilime elyone itebhe lye syami, ogwone mufulumizya gwe mvula gwikolanga ne (zumaridi). ⁴ Hampelo yelyo itebhe lye syami galiho matebhe ge syami gandi makumi abhili ne ane, nabho bhali bhikalisyeho hamatebhe ge syami bhali bhanampala makumi abhili ne bhane, nabhe bhali bhambikwe vyambalwa vyepe ne ngikili zye [dhahabu] mumitwe zyabho. ⁵ Mwelyone itebhe lye syami zyapunangamo ndabhi zye lukubha ne mighindo ne nkubha, mole musamvu zyabhakanga bhutonzi bhwelyo itebhe lye syami, mole ezyo ne mizo musamvu zye Mungu. ⁶ Nekandi mubhutonzi bhwelyo itebhe lye syami yaliho nyanza yekwikola nilole, nekulipilima elyone itebhe lye syami bhaliho bhe bhuhanga bhane, abho bhali bhwokale minso bhutonzi ne numa. ⁷ Oyo we bhuhanga wekwandya ikolanga ne nsimba, webhuhanga wekabhili ikolanga kati ndama, webhuhanga wekasatu ali ne bhusyo kati muntu, ne webhuhanga wekane ikolanga te mbesi yekulala. ⁸ vibhumbwa vye bhuhanga vyona vyaliane manana mukaga,nekandi bhalibhwokale minso honane bhwile nizyobha bhatakwifulanga kuyomba oti mutakatifu mutakatifu mutakatifu ne mukama Mungu mwami higulya ye bhona oyo aliho ne oyo alakiza." ⁹ Kila ikanza abhone bhe bhuhanga bhabhanga olo bhakupunwya ikuzyo ne isima ne kulumbilizya mubhutonzi bhwoyo ali ikalisye helyone itebhe lye syami oyo ne muhanga bhwelelo ne bhwelelo. ¹⁰ Abho bhanampala makumi abhili ne bhane bhalasukamba ne kwinama mubhutonzi bhwamwe oyo ali alikalisizye elyone itebhe lye syami bhaiamwinamila oyone akwikalanga bhwelelo ne bhwelelo ne kuzitaga ngikili zyabho mubhutonzi bhwelyone itebhe lye syami eno bhakuyomba oti. ¹¹ "Wekwendelwa obhe mukama witu ne Mungu witu kwanukula ikuzyo ne isima ne nguzu kulwekubha ulavibhumba vintu vyona ne mubhusime bhwako vilabhumbwa ne vilabhaho."