¹ Mwa malaika we kanisa lye Sardi andika; agane nge magambo goyo ekukwatilila ezyo mizo musamvu zye Mungu sihamwi ne nsonda musamvu, nekumanwya ago wagemile uli ne lukumo lwekubha oti uli muhanga alahe uliwe bhufwe. ² Uhalamuke ne kandi ugagumwye ago galibhusagile ago gekwenda kufwa, kulwekubha ntalagabhona magemo gako kubha galibhuhikane muminso ge Mungu wane. ³ Kulweyo wibhukile ago ulaganukula ne kugomvwa, gimvwe ne uhungame mabhi gako alahe olo utagemile otine nekwiza wako kati mwivi nekandi utalakamanwya oti nikanza si elyo ndakakwizako. ⁴ Alahe galiho mazina madone mu Serdi abho bhatalachafwile mwenda zyabho abhone bhalakayunga sihamwi none eno bhambele mwyenda zye pe kulwekubha bhekunigelela. ⁵ Oyo alakakinda alakambikwa mwyendazye pe nekalahi ntalakalifutamo izina lyamwe musitabho sye bhuhanga ne ndakalilanga izina lyamwe mubhutonzi bhwe mwa Dada wane ne mubhutonzi bhwe bha malaika. ⁶ Olo uli ne matwi ugitegelezye magambo ago mwizo mutakatifu ekugabhwila makanisa." ⁷ Mwa malaika we kanisa lye Philadefia andika; magambo ge mutakatifu ne wenhana oyo aline nfungulo zye mwa Daudi, akwigulanga ne ataliho oyo akwegekanga nekamdi akwegekanga ne ataliho oyo akudulanga kwigula. ⁸ Nekusimanwya esyo wagemile ulinge nakutulile mubhutonzi bhwako muzigo gwe bhwigule ogwo ataliho oyo enkadula kugwegeka, nekumanwya ulinazyo nguzu ndone alahe walikwatile igambo lyane neka nekandi utalalikana izina lyane. ⁹ Ulinge bhonane abho bhali mu libhilingilo lye mwa syetani abho bhakuyombanga oti ne bhayahudi alahe byo ne bhabhehi ndakabhagema bhize kusukamba ne kwinama mubhutonzi bhwe magulu gako, ne bhalakamanwya oti nakusimile. ¹⁰ Oko wakwatile silagilo syane ha kwiyomelezya sekeseke ndakakulinda ne mwikanza lye kugemezibhwa okwo kwekwiza mubhwelelo yona kubhagemezya bhona abho bhakwikalanga munsi. ¹¹ Nekwiza bhwangu syomelele munone esyo ulinasyo atiza kwiza muntu alasisola esyo ulinasyo. ¹² Kutyoyowona oyo alakakinda ndakamugema kubha nsinzi mwi hekalu lye Mungu, ne atalakapuna helu nehado, ndakalyandika kuwamwe izina lye mwa mungu wane ne izina lye muzengo gwe Mungu (Yerusalemu nhyanhya eyo yekutikila kupuna mwilunde mwa Mungu wane)ne izina lyane inhyanhya. ¹³ Oyo aline matwi ne omvwe ago mwizo mutakatifu ekuyomba ku makanisa.' ¹⁴ Mwa malaika we kanisa lye Laodikia andika;agane ne magambo goyo ali Amina, mukanilizya mutungilizya mwami mu bhusumbi bhwe mwa Mungu. ¹⁵ Nekuvimanwya vigemo vyako nemukubha oti obhe utali muneteke nolo utali we musebhe nekwikumbwa oti ubhe wabha muneteke nolo musebhe. ¹⁶ Oko uli mulungule tuhu utali musebhe nolo utali muneteke nkukuluka uvwemo mumulomo gwane. ¹⁷ Oko wekwigamba oti one ndi musabhi ndine nsabho ninki ne tekwenda tyesyosyona alahe utekumanwya mukubha oti obhe uli kafuse muno nekandi wekunegelwa muhabhi muhofu ne we bhuvule. ¹⁸ Udegeleke bhuyangu bhwane; ugule hawane dhahabu ye bhuhitibhwe mumulilo, ubhe musabhi ne myenda zyepe zye kulabhagila wiyambike ubhise bhuvule bhwako bhutakigela, ne ne mafuta gekwisiga haminso gako gabhukizye kubhona. ¹⁹ Tyoyowona oyo nekumusima nkubhalondolanga ne kubhalanzya omwo bhekwendelwa kazile, kulweyo ubhe mutungilizya ukubhe mabhigako. ²⁰ Ulinge nekwimilila hamuzigo ne kuhodisya oyo alimvwa silakasyane aligula muzigo nkwiza nekwingilamunumba yamwe nekandi kubhoneka silibhwa sihamwi nage nawe sihamwi none. ²¹ Oyo alakakinda ndakamuha kwikalisya shamwi none hitebhe lye bhwami kati one omwo ndakindila nekwikalisya sihamwi ne Dada wane higulya ye itebhe lyamwe lye bhwami. ²² Oyo aline matwi agomvwe magambo ago mwizo mutakatifu ekugabhwila makanisa.