¹ Mwa malaika we kanisa ye Efeso andika agane ne magambo goyo alibhukwatilile ezyo nsonda musamvu mukubhoko kwamwe kwe bhulyo, oyo akutumbagilanga hakati ye tala musamvu ekuyomba oti. ² Nekumanwya vigemo vyako ne kukankana kwako hamilimo ne kwiyomelezya kwako nekandi oti utekwisangizya ne bhabhezya mabhi nekandi wabhagemezye bhonane abho bhakwilanganga oti ne bhatumwa alahe kasi bhatalibhatumwa ne bhamazile kwigengeleka oti ne bhabhehi. ³ Nekumanwya ulinekwiyomelezya, nekandi wahitile habhi ne hasoga kulwe izina lyane alahe utalazobha. ⁴ Alahe ndine muhayo ogwa kuwako oti walekile bhusime bhwako bhwe kwandya. ⁵ Oti lelo hani ugeme kwibhukila aho ulanwyelelenka ulagwa usubhe ukubhe mabhi gako kandi ugasubhile magemo gako, olo utekugema otine kwiza ne kuipunwyaho tala yako aho ili. ⁶ Alahe obhe ulyoti wekugagaya magemo ge Bhanikolai ago bhekugagema ago nonene nekugagaya. ⁷ Olo uline matwi ugomvwe ago mwizo mutakatifu ekugabhwila makanisa, ne kwoyo alakakinda ndakamuha kulya visumo vye muti gwe bhuhanga ogwo guli hakati ye mugunda gwe mwa Mungu.' ⁸ Mwa malaika we kanisa ye Smirna andika agane ne magambo goyone wekwandya ne wekwihelezya oyo alafwa nekandi alasila alabha muhanga. ⁹ Nekumanwya kwagalala kwako ne bhuhabhi bhwako (alahe obhe uli musabhi) ne bhubhehi bhwabho bhakwilanganga Bhayahudi (alahe nebhubhehi abhone ne bhelibhilingilo kye mwa syetani.) ¹⁰ Utakobhaha kwagalala okwo kulakupandike, oti syetani ekwenda kubhatagila bhamwi bhinu mumageleza mugemezibhwe ne kandi mwagalale itungo lye nsiku ikumi, mubhe bhatungilizya kuhikila kufwa none ndakabhaha ngikili ye bhuhanga. ¹¹ Olo uline mawi wimvwe magambo ago mwizo mutakatifu ekugabhwila makanisa, oti oyo alakakinda atalakabhona lufu lwe kabhili.' ¹² Mwa malaika we kanisa ye Pergamo andika; agane ngenago ekuyomba oyo ali ne lupanga lwogi lwe bhunolwe habhili. ¹³ Nekumanwya aho wekwikala ne halwande olwo itebhe lye bhwami lye mwa syetani liliho, nolo notine wekulikwata muno igambo lyane ne utalakukema kuzumya kwako munsiku zye mwa Antipa mukanilizya wane mutungilizya oyo alafwa mubhutonzi bhwinu aho akwikalanga syetani. ¹⁴ Alahe ndi ne magambo madone kuwako oti ulinabho bhantu abho bhakukwatanga malangisyo ge mwa Balaamu oyo alamusosagizya Balaki kubhatulila isiki lye kwikumpa bhana bhe Israeli oti bhalye silibhwa esyo syali bhupunibhwe luhambo ha mizimu ne kwiingizya mubhusohozya. ¹⁵ Nolo nobhene ulinabho bhamwi bhahe abho bhekugakwata malangisyo ge Bhanikolai. ¹⁶ Alilelo ukubhe mabhi gako olo utekugema namuna eyone nekwiza bhwangu nendakasola nanko kulupanga olwo lukuvwanga mumulomo gwane. ¹⁷ Olo uline matwi wimvwe ago mwizo mutakatifu ekugabhwila makanisa, oyo alakakinda ndakamuha kulya [mana] eyo ilibhubhise, nekandi ndakamuha ibhale lyepe elyo lilibhwandikeho izina ihyahya higulya yahe izina elyo ataliho oyo enkalimanwya alahe oyo ekulyanukula tuhu.' ¹⁸ Mwa malaika we ikanisa lye Thiatira andika agane nga magambo ge mwana we mwa Mungu oyo aline minso kati lulabhi lwe mulilo, ne lugele lwamwe lwekwikola ne swuma esyo sili bhukulusibhwe muno. ¹⁹ Nekusimanwya esyo wagemile bhusime bhwako ne kuzumya kwako ne bhutumami bhwako ne kwiyomelezya kwako, oti vigemo vyako vyekwihelezya vyekukila vigemo vye mbele. ²⁰ Alahe ndine muhayo ogwa kuwako oti wekumuzumilizya oyo mukima Yezebeli oyo akwilanganga kubha ne mufumbuzi kubhalanzya mukubhahubya bhazyana bhane oti bhasihye nekulya silibhwa esyo syapunibhe sitambo. ²¹ Ndamuha ikanza lye kukubha mabhi alahe atekuzumya kukubha mabhi gamwe. ²² Ulinge nkumutagila habhulili sihamwi nabho bhakusihyanga sihamwi nabho mumagalalo makulu olo bhatakuvile ago bhagemile. ²³ Nitawapiga kubhahula bhanabhamwe bhafwe ne kanisa zyona zikumanwya oti one ngenoyo nkuga kengelelanga miganiko ge mizo none ndakamuha tyoyowona kulwe vigemo vyamwe omwo vili. ²⁴ Alahe bhamwi bhinu abho mwasagile mu Thiatira, kwabho bhona abho mutekukwata malangisyo agone nabho mutekumanwya oti bhamwi bhinu bhakulanganga malangisyo ge mwa syetani, nekuyomba oti ntalakatula muligo tyogwo gwona kandi. ²⁵ Nemusyomelele esyo mulinasyo mpaka aho ndakizila. ²⁶ Tyoyowona oyo alakakinda nekugema magemo gane kuhikila kumuhelo ndakamuha bhudula kumahanga gona. ²⁷ Alakabhasuga kumulanga gwe swuma, nekati omwo zili nungu zye ibhumba alakabhabelagula makango makango. ²⁸ Kati omwo ndanukulila kupuna mwa Dada wane ndakamuha ne nsonda ye mulabho. ²⁹ Olo uline matwi ugomvwe ago mwizo mutakatifu ekugabhwila makanisa.'