¹ Hanuma yagone gona ndimvwa silaka sikulu kati silaka sye bhantu bhinki, mwilune sikuyomba oti Haleluya bhulokozi bhubheho, ne nguzu ne zyemwa Mungu witu. ² Hukumu zyamwe ne zye nhana ne bhutungilizya, kulwekubha amuhumu musihya mukulu oyo alaibhihya nsi kulwe bhusihya bhwamwe, alagema nsika kulwe magazi ge bhazyana bhamwe, eyo alaisesa awene mwenekili." ³ Kulukandagu lwe kabhili bhalayomba oti Haleluya lyonsi likupunanga kuwamwe bhwelelo ne bhwelelo." ⁴ Bhanampala makumi abhili na bhane sihamwi nabho bhe bhuhanga bhane bhalinama bhalamulamya Mungu oyo akwikalanga hitebhe lye syami, eno bhakuyomba oti, "Amina Haleluya!" ⁵ Ngenaho silaka silapuna hitebhe lye syami ikuyomba oti, "Mumukumilizye Mungu witu imwe bhazyana bhamwe bhona, imwe abho mwekumukuzya awe nebhona bhado ne bhakulu." ⁶ Ngenaho ndomvwa silaka kati silaka sye bhantu bhinki ne kati silaka sye minzi minki, ne kati muhindo gwe lukubha gukuyomba oti "Haleluya mukama ne Mungu witu mutemi we bhona. ⁷ Tufule mpundu tuyege ne tumuhe ikuzyo kulwekubha bhwenga bhwe mwana we ntama yahikile ne muswelwa itayalisye. ⁸ Alazumilizibhwa kwambikwa [kitani] nsoga nekandi ye kulabhagila (ne kitni nsoga ne magemo ge bhutungilizya ge bhazumya). ⁹ Malaika alayomba oti gandike agane oti bhali bhufuhulwe abho bhalalalikwe habhwenga bhwe mwana we ntama, kandi alongezya kumbwila oti agane ne magambo genhana ge mwa Mungu. ¹⁰ Ndasukamba bhutonzi ye magulu gamwe ndamulamya alahe alambwila oti utakagema otine kungoko one ndi muzyana mwisyako ne webhaduguyo, mukwata bhukanilizya bhwe mwa Yesu." ¹¹ Hanuma ndabhona ilunde ligwike, ndabhona farasi yepe,noyo ali amwipakile alanganangwa mutungilizya ne we nhana, akupunwyanga hukumu kunhana ne kusola nsola. ¹² Minso gamwe gikolanga kati lulabhi lwe mulilo,ne higulya ye mutwe gwamwe ali ne ngikili ninki, alinizina lyebhwandikwe higulya yamwe elyo atekulimanwya muntu, tyoyowona alahe awene mwenekili. ¹³ Alibhwambale syambalwa sye bhusompe mumagazi, ne izina lyamwe ekulangwa igambo lye mwa Mungu. ¹⁴ Majeshi ge mwilunde galondezyanga higulya ye farasi yepe, bhalambikwa [kitani] nsoga yepe. ¹⁵ Mumulomo gwamwe lukupunangamo lupanga lyogi olyo lukuyabhazyanga mahanga, nawe alakatema higulya yabho kumulanga gwe silanga, nawe akukandagilanga viseme vye mvinyo kusyaha sye Mungu akutemanga kubhona. ¹⁶ Nawe alibhwandike higulya ye syambalwa syamwe ne habhutonzi bhwe bhusyo bhwamwe oti MWAMI WE BHAMI NE MUKAMA WE BHAKAMA. ¹⁷ Ndabhona malaika imilile higulya ye izyobha, alazilanga kusilaka sikulu noni zyona zikulalanga higulya nemwize mwibhilinge hasilibhwa sikulu sye mwa Mungu. ¹⁸ Mwize mulye nama zye bhami ne zyebhe bhudula, ne zye bhantu bhakulu, ne nama zye farasi ne abho bhakuzigegelanga, ne zyebhantu bhona bhazyane ne bhatali bhazyana ne abho bhatali ne nguzu ne bhenguzu." ¹⁹ Ndaibhona ndimu ne bhami bhemunsi sihamwi ne majeshi gabho, bhali bhipangile kulwe kwandya nsola ne umwi oyo ali agegele farasi ne majeshi gamwe. ²⁰ Munandimu alakwatwa sihamwi ne mufumbuzi we bhubhehi oyo alabhezya malebha mukubhaho kwamwe, kulwe malebha agane alabhabhehagula abho bhalanukula bhwole bhewoyo munandimu nabho bhalamya sanamu yamwe, bhona bhabhili bhalatagilwa bhahanga munyanza ye mulilo ogwo gukubhakanga ne sibhiliti. ²¹ Abho bhalasaga bhalafwa kulwe lupanga olyo lulapuna mumulomo gwoyo aliagegele higulya ye farasi, noni zyona zilalya nama ye mibhili zyabho.