¹ Hanuma yagogona ndabhona malaika undi akutikila kupuna mwilunde, awe ali ne bhudula bhukulu ne nsi ilamolekwa mukubhaho kwamwe. ² Alalila kusilaka sikulu alayomba oti syagwa syagwa syalo sikulu babeli, bhwabha bhwikalo bhwe misambwa ne lwande olwo lukwikalangwa mizo mibhi yona ne lwande olwo yikwikalanga kila noni mbi. ³ Kungoko mahanga gona ganwele sikozi sye bhumalaya bhwamwe eyo ikumuletelanga syaha,bhami bhemunsi bhasihizye nage, ne bhasuluzya bhemunsi nabhe bhabhele bhasabhi kulwe nguzu zyamwe." ⁴ Hanuma ndomvwa silaka sindi kupuna mwilunde sikuyomba oti nemumwilukeyo imwe bhantu bhane mutakiza kwisangizya mumabhi gamwe nekandi mutakiza kwanukula mahano kungoko yamwe. ⁵ Mabhi gamwe gilundike mwilunde ne Mungu ibhukile vigemo vyamwe vibhi. ⁶ Nemumulihe kati omwo alabhagemela bhandi, mumulihe nkandagu ibhili kati omwo alagemela; sikombe esyo alasangilizya mumusangilikizye malakabhili. ⁷ Kati omwo alikugizya mwenekili nekandi alikala mukugema [anasa] nemumuhe makoye minki sihamwi ne bhupina kulwekubha akuyombanga mumwizo gwamwe oti ndibhwikale kati muka mwami nekandi ntalafwililwe ne mugosya nolo ntalakabhona nkungwe. ⁸ Kulweyo kulusiku lumwi mahano gamwe gakumutimbila; kufwa nkungwi ne bhutamo akutokoleka kumulilo kulwekubha mukama Mungu awe newenguzu nekandi nge wekumuhukumu." ⁹ Bhami bhemunsi abho bhalasihyanage bhalalulunganika sihamwi nage bhakulila nkungwe olo bhalakabhabhabhona lyonsi lyekuhya kwamwe. ¹⁰ Bhalakimilila hale kubhwobha bhwe manegelo gamwe eno bhakuyomba oti Nelwagwo nelwagwo Babeli muzengo gwe nguzu kwikanza limwi hukumu yako yakupandika." ¹¹ Bhasuluzya bhemunsi mulile ne kuhulula nkungwe kulwewamwe, kulwekubha ataliho nolo umwi oyo ekugula vintu vyamwe kandi. ¹² Vintu vye dhahabu, hela, mabhale ge mpiya ninki, [lulu], [kitani] nsoga, zambalau, [hariri], zyeza, mbika zyona zye miti zye kumota kusoga, ne viseme vyona vye mahembe ge ndovu, ne siseme tyesyo syona syebhubhezibhwe kumiti ye mpiya ninki, shaba, syuma, ibhale. ¹³ Mdarasini,viungo, bhuvumba, mamanemane, bhubani, mvinyo, mafuta, bhufuma bhusoga, ngano, ng'ombe, ne ntama, farasi ne mituka, ne bhazyana ne mizo zye bhantu. ¹⁴ Visumo evyo ulavikumbwa kunguzu zyako vyakuvwaho. anasa zyako zyona sihamwi ne mapambo gakuvwaho, ne gatalakigela kandi. ¹⁵ Bhasuluzya bhevintu evyane abho bhalapandika bhusabhi kubhutogwe bhwamwe bhakumwima hale kulwe kwobhaha manegelo gamwe eno bhakulila nkungwe. ¹⁶ Eno bhakuyomba oti Nelwagwo nelwagwo muzengo mukulu ogwo gulambikwa [kitani] nsoga, zambalau, ne yeza, ne kubhegelezibhwa ku dhahabu, ne mabhale ge hela ne lulu. ¹⁷ Mwitungo limwi bhusabhi bhwonane obhwo bhwa bhasambala kila nahoza we meli, kila bahalia, ne bhavugi bhe minzi, ne bhona abho bhakutumamanga munyanza, bhali milila hale. ¹⁸ Bhalalila ahabhabhona lyonsi lye kuziga kwamwe, bhalayomba oti ne syalo si syekwikola nesya syalo sikulu? ¹⁹ Bhalitagila lubhubhu higulya ye mitwe zyabho, bhalalila eno bhakuvwa minsozi nelwagwo nelwagwo muzengo mukulu pyebhona abho bhali ne meli zyabho mweyo nyanza, bhali bhasabhi kulwe nsabho zyamwe, mwitungo limwi gwayamazibhwa. ²⁰ Mwihalale ilunde, bhazumya, bhazyana bhe mwa Mungu, ne bhafumbuzi, kulwekubha Mungu aguhukumu muzengo kulwewinu!" ²¹ Malaika we nguzu alabhusya ibhale lyekwikola nibhale ikulu lye kusyela alalitagila munyanza alayomba oti namuna eyane Babeli muzengo mukulu gulakatagwa hansi ne gutalakigela kandi. ²² Silaka sye sinanda bhahuzi bhe muziki bhatuma filimbi, ne tarumbeta mutalakabhomvwa kandi nolo fundi we mbika tyeyoyona mutalakamubhona nolo silaka situli mutalakasyomvwa kandi. ²³ Mwangalazima gwe lumole gutalakamoleka mukati yako, silaka sye muswezi ne muswelwa mutalakayomvwa kandi kulwekubha bhasuluzya bhako bhali bhakulu bhe nsi, ne bhemahanga bhabhehagwilwe kulwe bhulozi bhwako. ²⁴ Mukati yahe magazi ge bhafumbuzi galigelamo, ne magazi gebhona abho bhalafwa higulya ye nsi."